NIT Campus Lungleia dah MNF Sub. Hqrs. Lungleiin an phut

Nimin khan MNF sub Hqrs. Lunglei chuan Hnam Runah excutive committee meeting neiin, resolution pathum an pass a, heng an resolution pass zingah hian India sawrkar laipuiin, hmarchhak bial leh State bilin kan dil pawh ni miah lovin, khawvel ke pen ruala kan pen ve theihna turin, thiamna sang zawk zirna inpui, National Institute of Technology (NIT) paruk zet India hmarchhak mipuite tana min rawn pe hi lawmawm kan ti a. Central sawrkar lakah pawh lawmthu kan sawi a ni. Chutih laiin, Central sawrkar chuan he NIT hmun Campus thlan chungchangah State-ah thuneihna hlanin tunah hian Chaltlang Aizawl-ah mi in luahin Class tan tum mek a ni a, a hmun pawh zawn mek ni a hriat a ni.
He thiam zirna inpui pawimawh tak, NIT Campus hi Mizoram laili, Chhim leh hmar, chhak leh thlang ten khairual taka a zar kan zo tlan theuh theihna turin kan sawrkar hian Lunglei khawpui hmun tha leh remchang laia dah tura NGO hrang hrangte hmalakna hi keini MNF Sub.Hqrs. Lunglei chuan kan thlawp tlat a. Tin, chhimbiala Minister leh MLA te pawhin theihtawp chhuaha hma an lak kan ngenin kan phut tlat a ni, an ti a.
Hei bakah hian, "Rorelna dik chu luipui angin luang se" titu rorel lai Congress Ministry, kan hma lawka Village Council Bye-Election lo awm tura Dikna leh Dan pawisak nei miah lova, VC a pek tharte khua-a VC member dinglaite, dan tlawhchhan nei miah lova, thlan ngai lova tlinga a puang hi MNF sub. Hqrs. Lunglei chuan Democracy palzutna dik takah a ngai a. Kan sawrkar hian he thuthlukna a lo siam tawh hi sut leh ngei turin kan phut tlat a ni. A sut lo anih chuan, keini MNF Sub. Hqrs. Lunglei chuan Dikna leh Democracy humhim tur hian a tul ang zela hma lak kan tum a ni, tiin an thuchhuah siamah an tarlang.