Miss America-ah kum 17 mi

    Kum 1993 hmalam kha chuan Miss America thlanah hian kum 18 aia naupang lo ni tur an ni a, upa lamah kum 28 aia upa lo tur tih a ni bawk a, he kum bithliah hi kum 1993 khan ti danglamin kum 17 - 24 ah bithliah a ni ta a, hetia an siam danglam hnuah Scanlan hi Miss America a thlan naupang ber a ni ta a ni. Scanlan hian Dan hremi nih a tum a, a ngaihdan chuan mipuiin mi duham leh thuneihna a tuihalte chu attorneys leh politicians te an ti thin a, a ni ngaihdan chuan mi dik leh rilru tha te chu heng hmunah hian an awm ngei tur a ni, tih a ni thung.

Bru Refugee lakleta Putlungasiha dah tur chhungkaw 286 chungchang rel

    Mizoram atanga Tripura Refugee Camp-a Bru raltlan laklet lehte Lunglei Dist. Bru dah tur chungchang Core Commtt. chu an chairman Pi. M. Zohmingthangi IAS, Lunglei DC kaihhruaina hnuaiah meeting neih a ni a, Lunglei District. chhunga Putlungasih-ah Bru chhungkaw 268 te chu dah turin State Level Committee-in a tih chungchang ngaihtuah ho a ni a. Hemi chungchangah hian Putlungasih MSU te chuan Ram leh Hnam tan a him zawk theih nan chhungkaw 268 te chu Putlungasih-ah vek dah lova a hmaa an awmna hmunah theuh dah kir leh turin ngenna an siam chungchang pawh sawi ho a ni a. Mahse, hei hi State Level atanga tih leh ruahmanna a nih avangin Dist. Level-ah chuan engmah tih theih an neih loh thu sawi ho a ni.

Air Marshall-in Rader bunna tur rawn en

    Nimin zing dar 8:00 khan Air Marshall KK Nohwar VM, AOC-In-C Eastern Air Command leh a thiannu in Lunglei an tlawh. Air Marshall hian Air Force Station Pukpui te tlawhin Sairep tlangchhip a Rader dahna tur leh Lunglei a Air Force in relbawl dan tur te a thlithlai a ni. Col.V.R. Kulkarni, C.O 40th Assm Rifle te Wing Commander G.P Sharma, Air Force Sub Unit Commander Pukpui te, Addl. S.P Rex Zarzoliana MPS te, ASO - I C.C Lalchhuangkima MCS te leh Miss Lalruatpuii Principal EMRS te chanchinbumiten Kawmzawl Helipad ah an lo hmuak a ni.

Lunglei Tualchhung News lawrkhawm

    ** NYK buatsaih intihsiak: NYK Lunglei chuan Kum 20 hnuailam intihsiakna Block Level Sports tun thla ni 22-26 hian Thuamluaia Mualah an buatsaih dawn a, intihsiaknaa tel tumte chuan Baptisma channa Certificate emaw Kohhran Secretary lehkha emaw ken theuh tur a ni. Intihsiakna tur Item te chu Volley Ball (M&W), Football (M), Basket Ball (M), Intlansiak (M&W), Long Jump (M&W) leh High Jump (M&W)-ah te a ni ang.

    ** Bial TKP Inkhawmpui: Chanmari Pastor Bial TKP chuan zanin atanga Pathianni zan thleng hian BCM Ramthar Biak inah Inkhawmpui vawi 37-na an hmang dawn a. Thupui atan ‘Rinawmna’ hmangin, speaker-ah  Rev.H. Lalengmawia, Muallianpui bialtu Pastor a ni ang. Naktuk Inrinni hian nilengin Rorel a ni ang.

    ** Petrol Pump dinhmun: Mizofed Lunglei Petrol Pump AOC, Ramthar-ah  nimin khan Petrol XP leh Diesel te a awm lova, vawiin hian a thlen hman beisei a ni. Petrol pangngai Permit a ni a, Diesel XM Free Sale a ni thung. Hetiang hi Rate a ni. Petrol XP - Rs. 58.74 , Petrol- Rs. 56.24 , Diesel XM- Rs. 38.26, Diesel - Rs. 36.41

    ** MBKHP & MTKP Rorel: MBKHP Rorel vawi 61-na  chu January 27, 2011 zing dar 9:30-atangin Zohnuai Biak inah neih tur a ni a. Rorel palaite kim taka kal turin kan inhriattir a ni.
    MTKP Rorel 2011 pawh Chanmari Biak in, Lungleiah February 3, 2011 hian neih tur a ni. Hemi hma, February 2, 2011 zan hian TKP Diamond Juiblee hawnna inkhawm Chanmari Biak inah tho hian neih a ni dawn a ni.

    ** NREGS ni dang: Project Director DRDA Lunglei hnen atanga kan thudawn danin, NREGS hmanga inhlawhfakna chu ni 10 dang thawk leh turin pekchhuah a ni leh tawh a ni. Lunglei District huamchhungah Block pali awmin, heng ni 10 inhlawhna pekchhuah lehte nen hian Lunglei leh Bunghmun Block-ah sawrkar kum kal lai mekah ni 80 inhlawhna pekchhuah a ni ta a, Hnahthial leh Lungsen Block-ah ni 70 inhlawhna tur chiah a ni thung. Project Director DRDA chuan sawrkar kum kal lai mekah Lunglei District in ni 100 inhlawh hman ngei a beisei thu kan palai a hrilh.

   ** Zu um 39 man: Lunglei Police te chuan Zothanmawii leh Lalmuanpuia Rahsiveng te hnen atangin Rakzu fun 39 manin Case siamsak an ni a, nimin khan Court-ah kalpui nghal an ni.

   ** PWD in thawmtha dawn:  Kanghmun - Lunglei kawng Tantia hnuaia awm 102 post chu Tantia lam hnathawktu mihring indaih lohna avangin anmahni pui turin Mizoram PWD an ngen a, an ngenna ang hian Mizoram PWD hian Kanghmun - Lunglei kawng hi thawmthat hna an thawk dawn a,  kawng thawmthat nana pawisa leh hmanrua tul angte chu Tantia Company hian a tum vek dawn niin kan thudawnna chuan a sawi. Tunah hian Haulawng bulah PWD te hi an inchhawp mek tawh niin thudawn a ni bawk.

    ** 96.59% thla la tawh: Lunglei Distric, Assembly Constituency hrang hranga EPIC cover tawh dan percentage hetiang hi a ni. 29 South Tuipui (ST) - 95.58%, 30 Lunglei North (ST) - 96.69%, 31 Lunglei East (ST) - 97.05%, 32 Lunglei West (ST) - 96.87%, 33 Lunglei South (ST) - 96.82%, 34 Thorang (ST) - 97.17%, 35 West Tuipui (ST) - 95.96% a ni. A pumpuiah 34 Thorang (ST) Constituency hian thla an la tha ber a, 29 South Tuipui (ST) ah thla la an la tlem ber a ni. A pumpuia thla lak tawh dan percentage hi 96.59% a ni.

    ** Mobile rutu man: Vaninmawii Electric veng mobile Nokia 5130 ‘C’ Rs 4950/- man chu Hmingzahawma Electric veng vek chuan ruk sakin, Hmingzahawma hi Lunglei Police te chuan manin niminpiah khan Court-ah kalpui a ni.

Miss England Katrina Hodge ralthuam nen Afghanistan lamah kal dawn

Nikuma Miss England a thlan Katrina Hodge (24) chu a sipai a ni a, Corporal niin Miss a thlan tlin hnuah thla thum chhung Miss Tour a zawh fel khan sipai-ah a lut a, Miss nihna a tawp hnuah Afghanistan ram buaia lut tur zingah a tel veleh ta. Afghanistan rama kal chu huphurh a hnekin a chak zawk a, ram tana fehchhuah chu ropui a tiin ram tana hnathawk theia a awm chu lawmawm a tih thu a sawi a ni. Taksa tuai fai a, nalh taka mipui hmaa no taka in pho chhuah ang chi kha chu a nunah a leng tawh dawn lova, silai nen ral ramah a ram mu ve dawn ta a ni. Hei, a hming lemah pawh Combat Barbie an ti.

Lunglei Tualchhung News lawrkhawm

TFC training vawiinah nei dawn:     Vawiin chawhma dar 10:00Am atang hian A&C Auditorium-ah 13th Finance Commission Grants(PRIs) atanga Development Work VC ten an thawh tur chungchangah Account vawn dan tur Training neih a ni dawn a, he hunah LAD Minister Pu PC Lalthanliana chu khuallian a ni ang. Lunglei khawchhung VC member te kalvek tur a tih an ni.

Kawmzawlah chand kap dawn:     Ni 1.2.2011 atang a ni 28.2.2011 thleng hian Kawmzawl Chand kah naah 40 Assam Rifles te chuan Chand an kap dawn a zing dar 6:00 a tanga chhun dar 1:00 inkar leh tlai dar 3:00 atanga zan dar 8:00 inkar te hian Chand an kah leh dawn avangin an Chand kahna bul hnaiah tumah kal lo tur leh an ran te thlung tlat turin mipuite an hriattir.

Mizoram aiawh tur Lunglei mi 3 tel:     National U-16 Football Tournament lo awm turah Mizoram U-16 aiawh turin Lunglei Player pathum K.Lalhmunsanga (Ramthar), Eddy Zorammawia (Venghlun), K.Lalmuanzova (Chanmari) te thlan an ni a, vawiin atangin Camp an tan anga, tun thla ni 28-ah Maharashtra panin Mizoram an chhuahsan dawn a ni. LDFA chuan hlawhtlinna an chan zel theih nan duhsakna an hlan tih an sawi.

Vawiin thleng in report theih:     Pu. J. Vansangzuala DS&YO hnen atanga kan thudawn danin kum 2011 Republic Day lawmna chikhat atan Mipa leh hmeichhe Inter Village Hockey Tournament buatsaih a ni dawn a, heta tel tur hian veng leh khua a tam thei ang ber tel turin an sawm a ni. He tournament-a tel thei turte chu vawiin thleng Sport Office-ah in report theih a ni.

RTI Act chungchang sawiho dawn:     Lungleia sorkar Deptt. hrang hrangah RTI Act kalpui dan chungchang mumal lo tiin Y4M chu State Information Commission-ah a zual kova, hei vang hian State Information Commission houte hi naktuk hian Lungleiah lo kalin Sorkar Deptt. hrang hrang hotute chu RTI Act kalpui dan chungchang leh lo dawnsawn dan chungchangte an sawipui dawn niin kan thudawnna chuan a sawi.

Mualcheng 'S' In kangah in neitu leh a fanu an kang hlum

    Nizan hmasa 9:30pm vel khan Mualcheng ‘S’ a Pu Lianchhunga (67) in Assam Type  42x37chu Bungraw engmah chuh hman lohvin a kangral vek a, he in kang avang hian in neitu Pu Lianchhunga leh a fanu Chhuansangi (16) te chu an kanhlum bakah a fapa naupang ber Remruatdika (12) chu hliam natak tuarin Lunglei Civil Hospital-ah dah luh a ni.
    Kan thudawnna in a sawi danin Pu Lianchhunga te chhungkua hi chhungkaw member 8 niin, mi dang 4 te chu an zin bo hlan a ni a, he kangmei chhuah lai hian mi 4 chauh awmin Pu Lianchhunga nupui Pi Zalawmi chu a insa seng thei hlauh a,  chhungkaw pa ber Pu Lianchhunga leh a fanu Chhuansangi te hi an kanghlum ta a ni. Kan thudawnna in a sawi dan vekin Chhuansangi hi rualbanlo niin a sawi.

ABBA zai ho leh dawn?

Pop music-ah chuan khawvela hlawhtlin pui berte zinga mi niin an sawi thin a, chuvangin Pop supergroup ti hialin ABBA ho hi an sawi thin. An inthendarh atangin kum 30 a liam ta. In zawmkhawm leh tur anga sawi a awm fo a, mahse, a hlawhtling tak tak thei lo. Nikuma Rock N Roll Hall of Fame a lakluh an nih tum khan an zai ho leh ngei kha beisei a ni a, an harsatna ber chu Agnetha in a duh lo zel thin hi a ni a, kuminah erawh chuan an zai ho ngei beiseina sang tak a awm ta a; a chhan pawh Agnetha berin han inhmuhkhawm leh a, thil pawimawh bik show-ah chuan vawi khat na na na chu zai ho leh ngei pawh a duh thu a sawi vang a ni.

Band upa tak Rolling Stones te anga tour neih veleh lam chu a ni lova, inhmuhkhawm a, inkawm khawm a, tum khat emaw zai ho chu tul tihna lian tak a nei ve ta a ni. Tun hma anga rim taka show neih a, hmun hrang hranga zai ang chi kha chu a kham ve tawh hrim hrim. A mahin a sawi dan chuan, Kum 15 mi lek a nihin band a singer a ni tawh a, kum 18-ah record a siam tan a, kum 25 a nihin ABBA band-ah a tel a,. an darh hnuah pawh solo album 3 lai a siam leh tawh a, rimawiah a hun chu hmang tam tawk tawhin a in hria a ni. Chanchinbu leh TV lama lan chuai chuai chu thil chakawm takah a ngai tawh lo a ni.Kum 60 mi a ni tawh nen. Kumin April 29 a Prince William leh Kate te inneihnaah ABBA member te hi zai ho leh ngei tura ngaihna lian tak England-ah chuan a awm mek.

Lunglei Excise Deptt. 2010 record

Excise Deptt. Lunglei chuan nikum (1st January-31st Dec) chhung khan ruihhlo leh a kaihhnawih vangin mi 560 an man a, Case 477 an siam. Tualchhung Zu 7682.300 ltrs manin a Sen chi 750ml Um 1289, 180 ml-410 bots leh loose 17 bots an man. Foreign (Importred) Liqour-24 bots leh Beer (Imported) 11 bots an man bawk.Dawidim 5.350kgs leh buh chiahtawih 678 1/2 tin an man. Ruihhlo kaihhnawih avangin Lirthei hetiang hian an man: Two Wheller-1, LMV-10, HMV-1 leh Auto Rickshow-4 manin Zu thlawrna bel 104 an man . Drugs an man dan hetiang hi a ni: Ganja-17.441 Kgs, Nitrazepam-127 Tabs, Altrozelam-10 Tabs, Spasmo Proxyvon-3897 Caps leh Others(Parvon Spas)-110751 Caps. Excise Deptt. Lunglei hian Sapzu kan tih Foreign Ligour & Spirit atangin Chhiah Rs 43,40,725 hmu in Fines & Confiscation-ah Rs 8560 leh Others atangin Rs 35,800 chhiah an hmu.

Lunglei Tualchhung News lawrkhawm

Indian Airforce chuan Zobawk bul, Tlawng hnar Zopui tlang-ah thlawhna thlawk lo man theihna Radar leh Airforce hmunpui rawn neih an tum nia hriat a ni. Radar bunna hmun tur thlithlai hian Airforce hotute hi nikum (2010) khan Mizoram-ah an lo zin tawh a, tunhnai khan helai hmun hi rawn enfiah leh tura hian Indian Airforce hotute chuan kar kalta khan Silchar atanga Lunglei rawn pan an tum a, mahse rokhawlna engemaw avangin an thulh leh ta rih a ni.



Minister-in LAD Park tur atana rawt hmun a tlawh dawn: Lungleia cham mek, Pu. PC. Lalthanliana LAD & Social Welfare Minister chuan vawiin chawhma dar 10:00 hian LAD Park tur atana rawtna awm, Pukpui hmun a mi chu a tlawh dawn a, naktuk hian Trirteenth Finance Commission Training A&C Auditorium-a neih turah khuallian niin a hmanpui ang. Naktip Nilaini hian Lunglei chhuahsanin Aizawl lamah a kir leh tawh dawn a ni.

 

Snooker Assn. hruaitu thar thlang: Inrinni khan MJA Lunglei kaihhruaina hnuaiah Snooker Assn. hruaitu Saikuti Hall 3rd Floor-ah inthlanna neih a ni. President: Lallianzuala Chanmari, Vice Pre: Lalnunsanga Pachuau Chanmari, Secretary: David Lalramhluna Chanmari, Treasurer: J. Lalramhuala Electric Vengte an thlang. Hruaitu thar leh hlui te hian tunkar chhungin charge inhlanin, hei bakah hian hruaitu post dang awm te hi an thlang nghal ang.

Lunglei Tualchhung News lawrkhawm

Inkap hlum palh: Niminpiah zing lam dar 7:00Am khan Hnahthial Aithaur ram Deu Mualzawl Melthum ramah ramvak a riak Thangzika(45) Hnahthial Model Veng chuan Lian-chungnunga (24) chu Sanghal emaw tiin a kap a, a hliam tuar lovin Hnahthial Hospital a dahluh a nih hnu hemini tlai dar 3:00Pm vel khan a thi a ni.
    Thudawnna in a sawi danin Thangzika hi Melthum ramah hian Sanghal changin alo riak sa a, hetih lai hian niminpiah zing khan Lian-chungnunga te unau pali te chu helai ramah hian thlai chi zawngin an fehchhuak a, raw tam hung che chu Thangzika hian sanghal emaw tiin a kap ta mai a, Lianchungnunga hian Silaiin min kap tiin a tawng chhuak a, hei hi Thangzika hian hriain Mihring a kap tih a inhria a a pan nghal a, a unau te punkhawmin ngaihdam a dil a, a tihpalh a nih thu leh a inthiam lo chuan min kaphlum ve nghal ru a ti a, mahse Lianchungnunga unaute hian i tihpalh a ni e an tihsak a, he pawikhawihna ah hian thichhungte leh Thangzika te hi an ingaidam a, mahse Police lam chuan dan angin an tih tur an ti ve thung.
    Nimin khan Lian-chungnunga ruang hi Postmortem a niin a ruang hi vui liam nghal a ni bawk.

Pawngsual tum:Niminpiah tlai dar 4:00 bawr vel khan Lalbiaknema (30) S/o Liankhuma Lungsen khua tuna Rahsivenga cheng mek chuan Auto Rickshaw Mz-02 - 4529-in Electric veng hmeichhe naupang kum 8 chu a phur a, Lunglawn Shalom Biak In bulah, a ke kawr a pawhthlak sakin, pawngsual tum a, hemi chungchangah hian hmeichhe naupang chhungte chuan Police -ah FIR thehlutin nimin khan Lunglei Police te chuan Lalbiaknema hi man nghalin nimin vek khan Jail-ah thawnthlak nghal a ni.

HPC Vice Chairman leh Press mite inkawm: Nimin khan Pu Joseph Lalhimpuia, Vice Chairman HPC chuan a office chamber-ah MJA member te kumthar thingpui inpui pahin a titi pui a, Pu Mahima chuan Sorkar hotu Chief Minister leh Senior Minister dang  ten Lunglei Dist an duhsak naah lawmthu a  sawi.
    Pu Mahima hian sawrkarna an chan hnua HPC hmalakna hrang hrang leh an hmalak mekna leh hmachhawp an neih mekte Press mite hi a hrilh a ni. Pu. Mahima chuan Lunglei khawpui chhung kawngpui zauh chu a ngaih pawimawh thu sawiin, tun dinhmunah pawh hmun engemawzatah kawngpui zauh hna hi thawh a nih tawh thu a sawi a. Hei bakah hian Lunglei By-pass road Hrangchalkawn atanga Pukpuia chhuak tur pawh ruahmanna siam niin, Lunglei khawpui hnuaiah zel kaltir tum a ni a, ruahmanna an lo siam hmasak tawh angin sum hi Central lam atangin 20 crore chauh a ni a, tun dinhmunah thil man a san zel avangin  32 crore vel sen ngai tur a ni dawn a, DPR pawh siamfel a ni leh tawhin Central lamah thawn thlak a ni leh tawh a ni, a ti.
    Convention Centre MST Bus Station awmna hmuna sak tum chu building thiat tura Tender chhuah niin a Rs 5,00,000/- tala chhan ngai a nih laiin a chhang huai ber pawhin Rs 60,000 vel chauhva a chhan avangin pawisa awmsa ni mahse hma la lak tak tak theih a ni lova, PWD lam kut a nih avangin thiah ngawt theih a ni bawk si lo, ruahmanna dang siama building thiata sak thuai tum a nih thu erawh chu Press mite hi a hrilh a ni.
    Hei bakah hian 3-Gate-a Multi Unitily Building sak tur chungchang pawh sawi langin He Building-ah hian Sumo Park-na tur te bakah thlai thar zawrhna tur leh a chhawng chungber VC Rest House atana ruahman a nih dan te a sawi a, Nuai 45 vel ruahman a ni a ti a, tunah hian hna pawh tan  mek a nih tawh thu a sawi bawk.
     HPC Vice Chairman Pu Mahima chuan Kum 2 kalta chhunga Lunglei leh he Dist chhunga hmasawnna hrang hrang awm tawh mek leh hmachhawp mek awm hrang hrang te tarlang in heng hian lawmna tamtak min siam a ni a ti a, chutihrualin kan duhkhawp leh duhthusam ang taktak chu mihring kan nih chhungin a awm thei chuang lova, kan Sorkar-ah hian kum 3 vel hun kan la nei a, hemi chhung hian tun a hmalakna tur tamtak kan chhawp mek leh kan tih tur te hi engemawzat kan ti zo turah ngai ila, hemi hnuah chua Lunglei hmel hi nasa takin a  danglam tawh ngei ang tiin a sawi. Pu Mahima hian Lunglei khawpui chhung inkalpawhna kawngpui zauh chu a ngaih pawimawh ber anih thu sawi nawn lehin kawng hrang hrang a hmalak mek anih dan te a tarlang a ni.
         Pu Mahima hian 28th Feb. hi HPC Vice Chairman anih kum 2 na anih angin HPC anga achievement an neihna kawng hrang hrang te lehkhabu a phochhuah anih tur thu a sawi bawk.

David Beckham awmdan tur naktukah a chiang tawh ang

LA Galaxy atanga loan a David Beckham lakchhuah chungchang chu naktukah an zial fel thei tura ngaih a ni. Tottenham in Manchester United an hmachhawn turah Beckham hi lachhuak fel hman pawh nisela, Premier league a khel tura a fit that loh avangin a khel thei dawn lo, an ti. Spurs manager Harry Redknapp chuan, sign hman pawh ni ila, a fit tha tawk lova, chuvangin line-up ah telh a ni lovang. Chawlhkar engemaw zat chu in lak fit nan hun a duh ang, a ti.

Spurs hian kumin March thla laihawl thlengin Beckham hi chhawr an duh laiin LA Galaxy lam erawh chuan an remti thei lova, February ni 10 vel thleng bak an phal lo. Hetiang ang hi a nih chuan Spurs tan hian a khel tam hman dawn lo tihna a ni. Tuna loan a a chhuak a nih pawhin a hlawh pangngai aia tlem a la dawn a, mahse, Premier league a khel theihna a nih avangin a pawiti lo niin an sawi.

Ronaldinho a pianna ramah a kir leh ta

Brazil atanga rawn chawr chhuak, Europe-ah par chuang a, tum hnih lai World Footballer of the year a thlan lo ni tawh Ronaldinho(30) chuan a pianna ram a pan leh ta. Flamengo Club-ah kum 2014 thlenga khel turin contract a ziak a; sum engzat chiah nge an puang lo nain Premier club Blackburn Rovers in kum thum chhung a tan pound maktaduai 20 thehchhuah an in huam a hnawl avangin heta tang hian a man tur awm ang zat chu a rin theih mai awm e.

Inter Milan-ah hian thla 6 chhung contract a ziak sa a la awm chunga a chhuak ta hi a chhan lian ber chu Barcelona-a a vanglai ang kha a phak tawh lova, chuvangin starting line-up zingah a tel phak tawh lova, a ui chunag thut changh a tam tak vang ni berin a lang.

Lunglei Tualchhung News lawrkhawm

Tualthattu Distric Jail-ah dah:Nimina kan rawn tarlan tawh, Chawngte ‘L’ Halipad veng a mi Kapduailova kum 50 mi vawhlumtu Lalzarzova S/o Saitawnlovi Chawngte ‘L’ chu thawhlehni tlai khan amah hi Lunglei Police Station-ah a rawn in pe a, nimin khan Court-ah kalpui niin nimin vek khan District Jail-ah dahluh nghal a ni.

A vuakhlum tak Kapduailova hi MAP niin, thawhtan zan hian an inhlial buai avangin an insual a, Lalzarzova (26) hian thing 2x3 hmangin a tukkhumah a vaw ta niin kan thudawnna chuan a sawi. An insualna hmun hi Chawngte ‘L’ mual Pavilion-ah niin a tlai lam dar 5:00 vela insual niin a ruang hi a tuk zingah chauh an hmu niin kan thudawnna chuan a sawi a ni.

Pu. S. Dinga P/S lo kal dawn: Pu. S. Laldingliana Parliamentary Secretary pawh vawiin hian Aizawl atangin Lungleiah a rawn phei ang a, naktuka NLUP hawn tanna inkhawm Saikuti Hall-a neih turah khualzahawm niin he hun hi a hmanpui ang. Pu. Dinga hian Lungleia a cham chhung hian a bial chhung khaw hrang hrang tlawhin a zin chhuak ang a, karleh nilaini vek, ni 19 hian Lunglei chhuahsanin Aizawl lamah a kir ve leh bawk ang.

MCS leh Officer lian hna chelh kawp tam MJA in a ngaimawh

Lunglei 13th, January : Nimin khan MJA Lunglei ten Lunglei Press Club-ah General Meeting neiin he hun hi Pu. K. Lalrinpuia President MJA Lungleiin a kaihruai a, member kalkhawm an tha hle.

He hunah hian MJA kalphung hrang hrang bakah kum 2011 chhunga an hmalakna tur hrang hrang sawihona an nei a, hei bakah hian Press Club sak chhunzawm chungchang pawh sawiho niin, an pawisa neihsa hmangin Press Club hi sak chhunzawm thuai tha an tih thu an sawi a, hemi atan hian Press Club Committee pawh siam that thuai nise an ti bawk.

Lunglei Tualchhung News lawrkhawm

Indian Republic Day lawm dawn:

Indian Republic Day 2011, April ni 26-a lo thleng tur chu Lungleiah pawh lawm tura inbuatsaih mek a ni a, Thuamluaia Mualah zing dar 10:00-ah khuallianin hnam puanzar pawtparhin Parade chibai a chhanglet ang. Hei bakah hian chhun dar 12:00Pm ah VIP at Home DC lawn ah neih ni bawk ang. Republic Day pual hian Lungleia Home hrang hrang leh Dist. Jail te thil pek tum a ni bawk.

MJA Lunglei General Meeting nei dawn:

Vawiin chhun dar 12: 30 - 2:00 PM inkar hian MJA Lunglei General Meeting Lunglei Press Club-ah an nei dawn a, thu pawimawh tak tak an rel ang. Member-te kal vek turin Gen. Secy. Tv. K. Lalrochana chuan a hriattir a ni.

Chawngte ‘L’ ah an in vawhlum:

Chawngte atanga kan thudawn danin, nizan hmasa khan Chawngte ‘L’ Halipad veng a mi Kapduailova kum 45 mi vel chu Lalzarzova S/o Saitawnlovi Chawngte ‘L’ vek chuan a vawhlum a, hemite hi inthenawm lawk niin hetianga an invuakhlum chhan leh thil awmdan chiang zawka hriat tumin Chawngte lam hi biakpawh leh tum a ni a, inbiakpawhna lamah harsatna a awm avangin thuchiang kimchang kan rawn tarlang thei lo a ni.