Dangdai - 4

 Isua ni lovin Juda zawk an khengbet tiin, film an siam:   Iran film director Nader Talebzadeh chuan, Iran hardline president Mahmoud Ahmadinejad nen an ngaihtuahna atangin Isua film siam thain an hria a, 'The Messiah' tih film an siam ta a; Lebanon-ah he film hi tihchhuah a ni a, Christian ten nasa takin an do dal a, chuvangin chhuah chhunzawm tawh lo tura tih a ni.
    al Manar and NBN television stations te chuan Security General's office-in chhuah chhunzawm tawh lo tura a tih avangin an tichhuak dawn tawh lo tih an puang a, Security General Office chuan ramchhungah ngaihdan inan loh avanga harsatna a thlen an hlauh vanga tih tawp tura ti an nih thu pawh heng TV Stations te hian an puang bawk a ni.

Thalai lawm zawng

    Jennifer Aniston in, exer lak that vang a nia, a ti: Hollywood actress kum 41 a tlin hnu pawha pian nalh tak, la in fit zek zawk tak Jennifer Aniston chu tun hnaia a thlalak chi hrang hrang darh vakah chuan thawmnhaw a in bel tlem a, a taksa a lang tamin a pian nalh zia a tarlang a, heta tang hian a kum ngaihtuaha heti taka a la nalh thei chu engvangnge tih zawhna a dawng nasa.
    'Ei duh tak mai ka ni a, a ei vak vak a, mahse, heng ka thil ei te avanga ka taksa ti mawi lo a, thau inchhek khawm tur paih tur hian a taksa a sawizawi tha hle niin a sawi. Yoga te pawh a lo ti thin a, ei leh inah insum lo mahsela, a taksa a sawizawi that avangin pian mawi lo lutuk turin a thau lova, a in fit tha hle niin a sawi a ni. Ni khatah minute 20 tal taksa sawizawi nan hun a hmang thin niin a sawi a, hei hian a thisen kal vel te pawh a siamthain chakna pawh a pe tha niin a sawi bawk.

MIN HRETHIAM TEH U

Nikhat leh zankhat zet mai Lunglei South lam pangin power kan nei leh tlat lo. Dt.29th Aug.2010 zan khan Power Supply a awm lo tan a, Dt.30th August tlai dar 5:00 hnu lam atang khan power kan nei ve leh chauh a, hei hi Luangmual-ah Power hruipui a chah vang niin kan hria. Hetiang a nih avang hian Blog pawh ka rawn update thei lo a ni. Min hriatthiamna ka ngen a ni e

96 Bn.BSF ten Hiv Screening test niminah an nei

Lunglei Aug 27, 2010:  Vawiin khan Zotlang BFS Comp ah Border Security Force te zingah HIV Screening test neih a ni. He Screening Test hi BSF Medical Section buatsaih a ni a, Civil Hospital Lunglei leh MHIP Drop-In Centre Project Manager, Migrant Project ten an puibawm a ni.
    HIV screening test neih hma hian a hawnna hun tawi buatsaih a ni a, he hun hi Dr. A.B. Das chuan kaihhruaiin, 96Bn. BSF Commandant SD. Sindhu chuan thutawi sawiin, an Rising Day an lawmna ni pahfawma HIV Screening Test buatsaih an nih thu a sawi a.  HIV lakah fimkhur a tul thu sawiin, tihdam aiin inven a that zawk thu a sawi a, zaa sawmkua 90% chu mimal tinten HIV kai lo tura invenna kawngah mahni kuta innghat a nih thu sawiin, vanduai palh thil thuin HIV chu kai ve theih tho ni mahse, chu chu 2% vel chauh a ni a ti.

Dangdai - 3

 Malaysian nu thla khat chhung Rul bawm chhungah a awm:   Malaysian nu pakhat kum 24 a upa Puteri Nur Ariyani Saiful Yazan chu Rul 100 awmna bawmah ni 30 chhung awm ve in Rul in an chuk miah lo. Tum khat erawh chu rei tak he bawm chhunga a awm avang hian nikhaw hre lovin a awm a, hospital-ah an enkawl a, a thatchhuah leh hnuah bawmah bawk chuan a lut leh a ni. Hetianga rul chuk tawk miah lova heti chen a awm theih avang hian a lawmzia thu a sawichhuak. Bawm atanga a chhuah hnu hian a lawmna entir nan King Cobra pakhat chu a luah a fawp a ni. Hmingthan duh hrim hrim avang hian mi fate hian nunna hial dah kham hian an lo va bei nasa ve le.

Thalai lawm zawng

Sandra Bullock inchei awlsam in sawi a hlawh:     Universal City, California-ah Teen Choice Award an sem a, heta award dawng a Sandra Bullock kal chuan mak tih a hlawh a, a inchei dan mawlmang lutuk chu media lamah an tarlang nasa chuai chuai khawp mai. Miss Congeniality star Sandra Bullock chuan T. Shirt a ha a, kekawr dum leather a ha leh tawp a, Choice Movie Actress award chu a dawng a ni.     Sandra Bullock hian tun hnai mai khan buaina a neih thin chu court in a chin fel sak a, mi pakhat Thomas Weldon (41) chuan, a zui, a zui a, a chenna in hnaihte hian a awm reng a, message leh pangpar te a thawn a, a atchilh tlat mai a, kum 7 chhung zet hetiang hian a lo awm tawh a ni. Court chuan Weldon chu Sandra Bullock in bul hnaiah kal a phalsak ta lo a ni.

New Zealand vaukamah Nghapui (Whales) intihlum turin an pungkhawm leh chiam

    New Zealand hmarlama Karikari tuifinriat kamah Nghapui (Whales) 73 zette chu thi turin an pungkhawm chiam a, zan lam atanga lo awm tawh a tuk zinga hmuh chauh an nih avangin tam takte chu an lo thi hman tawh a; 15 la damte chu tuipui chhunga dah luh leh tuma Department of Conservation in Kaitaia mi leh sa ten an bei ngial chung pawhin ruahsur nasa lutuk avangin an duh angin hna an thawk tha hlei thei lo.

Lunglei Tualchhung News Lawrkhawm

TOA in boulder Trip 10 nen hnatlang in Tlabung kawng an siam dawn:

Lunglei District Truck Owners Association chuan, Lunglei leh Tlabung inkar kawng chhe lutuk siamthain naktukah an hnatlang dawn.
    Lunglei Times in thu a dawn danin, TOA te hian boulder Truck trip 10 an lei a, hengte hi kawng chhuat khuar thuk leh chhe lai hnawhkhahna a tan an hmang dawn. Truck neitute an motor thawh turin an ngen a, Diesel an thun sak ang.
    Lunglei leh Tlabung inkar kawngpui ah kawng a chhiat nasat avangin buhfai phurh pawh a buaithlak sawt hle a, chetsual hlauhawm tak tak hmun a awm tawh an ti a, PWD lamah siamtha turin an ngen thin a, an tih theih mai si loh avangin boulder leiin hnatlangin siamthat hna an thawk dawn ta a ni.

Lunglei - Aizawl via Thenzawl road, Pukpui - Haulawng inkar kawng hawn nise tha an ti tlang

Vawiin khan Sub Divisional Magistrate Lunglei Office Chamber-ah Lunglei - Aizawl via Thenzawl road Pukpui leh Haulang inkar lirthei kal 144 Cr.PC dan hmanga khap chungchang chu AVOJAC, Sub Hqrs. YMA hruaitute leh Magistrate ho hian sawi ho a ni a, he kawng kal khap hi mipui zin veivakte tan phurrit thlentu niah an ngai a, chuvang chuan he kawnga kal khapna dan hi hlih tha in an hria a, mipui harsatnate hrethiamin AVOJAC chuan kawng hawn a nih avanga buaina an siam loh tur thu ziakin an intiam thei a, chuvang chuan kawng hi hawn nise an ti a ni. He Meeting-ah hian YMA Sub. Hqrs. Lunglei aiawhin, Pu. P. Lalhmangaihzuala President-in hming a ziak a, AVOJAC aiawhin Pu. Zairemthanga Sailo, President-in hming a ziak a, Pu. K. Lalhmingliana Sub Divisional Magistrate Lungleiin hming a ziak bawk.

Govt. J.B College atangin mi 987 in B.A an pass tawh ‘Zirlaite, nu leh pate phurrit satliah mai kan ni tur a ni lo’ - PC. Zoram Sangliana, A&C Minister

Lunglei 25th, August : Vawiin khan Govt. J. Buana College Lunglei chuan Fresher Social Programme Saikuti Hall Lungleiah an hmang a, he hun hi H. Muansangpuia, Vice President Students Union GJBC in a kaihruai a, khuallian Pu. PC. Zoram Sangliana, Art & Culture, Transport Minister chuan a hmanpui a ni.
    College Principal Dr. J. Zorema chuan thusawiin, kuminah an College-ah zirlai lu thar 229 an awm a, a pumpuia zirlai awm zawng zawng chu 367 an nih thu a sawi a, an college building a chhia a, a hmun hma a nuam em em lova chuvang chuan an College-a zirlaite chu tih tak takna nen an zirlai zir turin a fuih a, tih tak takna tel lova kal ve mai maite tan an College-ah hmun a awm loh thu a sawi.

Lunglei Tualchhung News Lawrkhawm

A&C Minister Lungleiah:      Art & Culture Minister Zoramsangliana Lunglei chamchilh mektu chuan tukin dar 7:00 - 8:30 Am thleng  Public Interview Circuit House ah a nei dawn a, chaw hma dar 10:30 ah JB College Fresher Social ah khuallian a ni ang. Chawhnu dar 1:00 Pm ah LDCC (Congress Bhawan) tlawhin van tlang inkhawm a puala buatsaihah thusawina a nei ang. Vawiin chawhnu hian Aizawl panin a hawng leh nghal dawn a ni.

PYD O.B pual Seminar :     Lunglei Dist. huamchhunga Local PYD Office Bearer te pualin August ni 27, 2010, chawhma dar 11:00 hian I&PR Conference Hall Bazar vengah Seminar buatsaih a ni dawn a, he hun hi Vanlalnghaka, Chairman LDKC in a kaihruai ang. He hunah hian, Incheina, Zuk leh hmuam bakah Internet & Computer, Mobile leh Television chungchang paper present neih a ni dawn a ni.

Thalai lawm zawng

Leonardo a leng tar law law maithei: Titanic star Leonardo DiCaprio chuan nupui a neih dawn leh dawn loh chungchanga a thusawi chuan a fans te a barakhaih a; nupui newi lova len tluan mai a tum nia ngaihna lian tak a awm. Leonardo hian a thian tha tak tak te atangin nupui neih hi a chak loh phah a ni awm a, 'An inneih hlim chuan an hlim em em a, hun a kal a, chu hlimna chu a chuai a, an inthen leh mai thin' a ti.           Israeli supermodel Bar Rafaeli nena in zui mek Leonardo hian, midangte nun atanga ngaihdan siam chu thil tha lo tak ni mahse, a nunah bu a khuar tlat niin a sawi.

Dangdai - 2

Myanmar mi zawk a upa ber em ni?:     Myanmar mi Daw Mya Kyi chu khawvela hmeichhe damlai zinga upa ber niin Xinhua chuan a puang a, kum 118 mi a ni tawh, a ti. Khawvela damrei bera an lo chhal thin French hmeichhia Eugenie Blanchard aiin kum li in Mya Kyi hi a upa zawk a ti. Mya Kyi hi kum 1892 a piang a ni a, Blanchard hi 1896 a piang a ni, tiin social welfare deptt. chuan a puang.
    Daw Mya Kyi hi Mandalay Division a Puak Chan Kone thingtlang khuaa cheng a ni a, a hriselna a la tha hle niin an sawi. Myanmar-ah hian mihring maktaduai 58.3 an awm mek a, heng zinga maktaduai 5.13 te chu kum 60 chin chunglam an ni a, he rama cheng mihring 100 zela 11 te chu kum 60 aia upa an ni.

Miss Universe 2010 atan Mexico nula Jimena Navarrete thlang

Nizan khan 59th Miss Universe  2010 thlanna chu Las Vegas hmunah result puanna neih a ni a, Miss Universe 2010 atan hian Mexico Miss Jimena Navarrete chu thlan a ni. Miss Mexico Jimena hi kum 22 a upa a ni a, khawvel ram hrang hrang atanga nula nalh fuankhawm 84 zet te zingah he dinhmun ropui leh duhawm nihna hi Jimena-i hian a chang ta ni.
    Jimena hi nikuma Miss Universe Stefania Fernandez  (Venezuela) chuan Crown a khim tir a ni. MIss Universe 2010 thlanna ah hian Yendi Phillipps ( Jamaica) chu first runner-up niin Miss Australia's Jesinta Campbell chu second runner-up a ni thung. 

Lunglei Tualchhung News dang Lawrkhawm

College veng leh Venghlun kawng siam dan tur niminah en:      Nimin khan Lunglei Govt. College leh College veng pan thlakna motor kawngpui chhuk tak chu a aia chhuk lo, zal deuh zawka siam theih dan tur a hmuna kalin Pu. Joseph Lalhimpuia leh hemi kawng chungchanga hmalatu Engineer te bakah a mah tawiawmtute chuan an en a, hetih rual hian Thuamluaia Mual atanga Venghlun lam pan pheina pawh motor kawngpui sial tlang tura ruahmanna kal meka hmalak dan tur leh hna thawh dan tur pawh an en nghal bawk. Hemi kawng siamna atan hian Lunglei Police quarter pahnih phei chu thiah a ngai dawn a, Lunglei Government College Principal quarter thlang lam pawh kawngpui zauhna tur a tan hian laih angai dawn a, hei hi thuneitute lamah tih fel vek tawh niin Pu. Mahima chuan  a sawi.

SADS ten Parvon Spas box 39 Rs 2,76,600 man hu an man

    SADS te chuan Parvon Spas box 39 nimin khan Lalengmawii (Maengi) (33) D/0 Hmingliana Chanmari area (Sobji Bazar) leh Lalnunkimi (Buangi) (28) D/o Lalzawna Venghlun te hnen atangin an man. Lalengmawii leh Lalnunkimi te hian an insawi danin Parvon Spas hi Aizawl-ah Lalengmawii pawisa hian vai ta an la chhawng a, box 5 an rawn hawn chu Venghlun YMA ten lo mansakin, SADS te kutah an hlan chhawng a, SADS te hian thu zawt chiangin, Parvon Spas box 39 dang chu Aizawla Mathaia Inah an thuhruk thu sawiin, SADS te hian Aizawl lama Central YMA ruihhlo dotu CADS te hrilhin anni hian Inrinni zan dar 11: 30 vel hian Parvos Spas an thuhruk chu la chhuakin, nimin Aizawl - Lunglei Sumo Service dar 9:00 chhuakah an rawn thawn phei ta a ni. Heng ruihhlo an mante leh a neitute hi SADS te hian Drugs Inspector kutah an hlan nghal a ni. Tualchhung rate anga chhutin heng ruihhlo an mante hi Rs 2, 76,600 man hu lai a ni.

Sports Minister-in State Sports Academy Zobawk a tlawh

    Nimin khan Pu. Zodintluanga Sports Minister chuan, Vaibelchhe  34 senna tur State Sport Academy Zobawk a mi chu tlawhin, kumin chhung ngei hian hna tan tum a ni ang a ti. Nimina State Sport Academy Zobawk Minister-in a tlawhnaah hian, sawrkar Officer thenkhat bakah Media lam leh Party hruaitute'n Minister hi an tawiawm a ni. Helai hmuna hnathawh dan tur hrang hrang te Minister hian chipchiar tak a enin, Engineer ten thil nih dan tur an  hrilhfiah bawka, Minister chuan, helai hmuna Sport Academy siamna tur hian sawrkarlaipui chuan Cheng Vaibelchhe 34 min phalsak tawh mai bakah tunah hian hna tanna turin Cheng Vaibelchhe 6 min pechhuak tawh a, he sum hmang hian kumin chhung ngeiin, hna hi thawh tan a ni ang a ti.

Lunglei Govt. College-ah zirlai an tam Lecturer an indaih lo

    Nimin khan Pu. Joseph Lalhimpuia Vice Chairman HPC chuan Lunglei Government College a thlawh a, Pu C. Hrangdula Principal Lunglei Govt. College chuan an College-in harsatna an tawh hrang hrang Pu Mahima hnenah hian a lo thlen a, an college dinhmun a tarlanah chuan zirlai 583 an awm mek a, fail re-admission la leh an awmte a nih phei chuan zirlai 600 chuang vel an ni thei dawnin a lang a, College a din tirh atanga zirlai tam ber kum a ni a, hetih lai hian an building-in a dawl zo chiah tawh lova, exam hunah phei chuan corridor-ah thutthleng remin an exam thin thu a sawi a, chuvang chuan exam hall neih an mamawh thu a sawi.

‘Ruihhlo tel lo infiamna’ Football tournament tan ta “Nun zirlaiah kan pass loh chuan awmzia a awm lo” - Joseph Lalhimpuia, MLA

Lunglei 24th, August : MZP Platinum Jubilee Lawmna chikhat MZP Hqrs. Lunglei chuan Inter Post Matric Football Tournament 2010, a buatsaih chu nimin atang khan khelh tan a ni ta a, inkhelh tan hma hian a hawnna hun inkhawm tawi buatsaih a ni a, he hun hi Pu. Lalbiakchhung Ralte President MZP Hqrs. Lunglei chuan kaihhruaiin Pu. Joseph Lalhimpuia Vice Chairman HPC chuan a hawng a ni.

    He Tournament ah hian 'Ruihlo Tello Infiamna' tih chu thupui ah hman a ni a, tournament hawngtu, khuallian Pu Joseph Lalhimpuia chuan, ruihhlo tel lo infiamna MZP ten an buatsaih chu lawmawm a tih thu sawiin zirlai inpawhna leh in tlangnelna tha zawk an neih phah a duh thu a sawi a, infiam mi ni tur chuan ngaihtuahna fim leh hriselna tha neih a ngai a, chu chu an zirlai an zirna atan pawh thil tangkai tak a ni tiin zirlaite hian Text book chauh hi zirlai a ni lo tih kan hriat a, text bu piah lamah zirlai tam tak kan nei a, Nun zirlaiah kan pass loh chuan awmzia a nei dawn lova, chuvang chuan mahni nun theuh uluk a pawimawh thu a sawi.

‘Rancho Das-a school chuan ‘All in not well’ an ti mek

    Ruahsur nasa avanga tuilian leh leimin in a chhiatna a thlen avangin Ladakh-ah chuan Prime Minister Manmohan Singh, AICC General Secretary Rahul Gandhi, Jammu & Kashmir CM Omar Abdullah leh mi pawimawh tak tak an kal a, heng zingah hian ngaihven hlawh ber chu bollywood star Aamir Khan a ni daih. '3 Idiots' film lar vanglai a ni bawk a; a ni hi a lar ber. Ruahsur nasa avanga Tuilian leh leimin avanga tuarna thleng mek chu pawi a tiin chhiat tawkte tanpui turin ram pum kan tanrual a ngai,. a ti.

Obama hmaa ruaka awm tur a zawng

    British mihausa tawntaw Alki David (42) chuan US President Barack Obama hmaa saruaka awm ngam hnenah dollar maktaduai khat pek a tiam mauh mai.
    David hian an chhungkaw ro khawmin pound tluklehdingawn 1.15 zet nei a ni a, Lawng leh bottle siamna hmunpui neitu a ni a, Nigeria chhul chhuak a ni daih nghe nghe.
    Internet kaltlangin hetianga ti thei tur hi a zawng a, thla thum kalta khan dollar 100,000 a tiam a, mahse, a chhangtu tam ber chuan sum a tlem em mai an tih avangin maktaduai khatah a san chho leh ta a ni.
    President hmaah hian saruaka in lan awm ta sela, a tih tirtu a nih dawn avangin man pawh a tawk ve ngei dawn tih chu a hria a, mahse, pawi engmah khawihna a ni lova, mi tam takin an lawm dawn em a ni, zuk ti tlat a !!
    Engvanga hetianga President Obama hma khera saruaka inlan tur hi zawng nge a nih a sawi lova, a tum ber ni zawka lang chu thil hlimawm leh mak tak tihchhuah a ni ber awm e.
 

The Hero Editor-in mual a liam ta

    Pu P. Lallawmzuala(60) Editor The Hero, Chanmari Lunglei chu hun rei tak Kal (kidney) avanga a bawksawp hnuin ni 22.8.2010 Pathianni zing dar 7.15 khan a thi a, hemi ni vek hian Chanmari Veng thlanmualah vuiliam a ni.
    Pu Lawmzuala hian kum 1990 atang khan nitin chanchinbu The Dawn chhuah tanin registration lamah harsatna a tawh avangin The Hero tiin a hming a thlak a, LJA leh Information & Public Relations deptt. in Lungleia nitin chanchinbu tha thlanna an buatsaihah a chanchinbu hi tha bera thlan a ni a, Pi Nuchhungi Cup a dawng a ni.
    Lunglei Journalists Association (LJA)-ah term thum General Secretary, Term hnih Information Secretary, term khat Asst. General Secretary lo ni tawhin  LJA hruaitu pawimawh tak a lo ni tawh thin. Press Information Bureau (PIB) buatsaiha India rama Editors Conference sang ber Economics Editor Conference Delhi-ah kalin Prime Minister te nen hun an lo hmang ho tawh.
    Zunthlum neiin chu chuan a mit leh Kal te khawih in phai lamah in enkawlin an kalpui a, In lamah hun rei tak enkawl a ni tawh bawk a, a natna hi thatchhuah pui hlei thei lovin a boral ta a ni.

MJA ten a kuang kan zawn

    Rev. LB. Khawpuimawia’n vuina hun a hmang a, Pu K. Lalrinpuia President MJA Lungleiin MJA aiawhin thu a sawi a, Pu Zodintluanga Minister Information & Public Relations, Pi M. Zohmingthangi DC (MJA Patron) leh Pu Lalthangmawia PRO te hovin MJA chuan thla an lak pui a, MJA te hian a kuang hi an in atanga Civil Hospital kawt thlenga zawnin an thlah liam a ni.

Hlimthla

Heng Cartoon hi  Pu. LT. Zohranga (Valbuanga) Zomoi Artist ziak thenkhatte a ni

Jimi Hendrix-a hringnun- I

Rock music tuipui mite chuan zaithiam leh guitarist turu Jimi Hendrix  hre lo an vang viau ang. A thih atangin kum 40 dawn lai a liam tawh a, mahse a sunhnu te chuan chul lam pan mai lovin a la thar reng tho a, a mah ngaisangtu te thinlungah chuan a cham reng mai a ni.

    Hendrix hian chanchin sawi tur a ngah hle a, an sawi danin mipat hmeichhiatna lamah pawh experience a nei hma hle niawm a ni. Kum 12 mi lek a nihin a pamiin guitar a leisak a, chu a guitar chu a lawmin a khal ngun hle thin a ni. Mahse a mah a la naupangin a pumrua a la tet em avangin a zo tha lo hle a, chhuatah tungin a vei perh ve tlauh tlauh thin. Hmeichhia a ngainatna hi a sim thei lo nge kum 15 mi a nih laiin an zirlai pui hmeichhe pakhat a kutah a vawn avangin an zirtirtuin a hau a, a thinrim chuan an zirtirtu chu chhiat khumin an school atangin an hnawhchhuah phah der. Vuan fuh lo nge chhiat khum fuh lo zawk, a ti fuh lo khawp mai.

     A lo tlangval tan tirh chuan US Army Air troopers ah a tang a, mahse a hnungzang a tih khawloh avangin tang rei thei lovin a bang leh a. Rimawi lam pang chu a luhchilh tak tak tan ta a ni. Hetih lai hi chuan khawvel hriatah heti khawp hian a la larin, guitarist ropui leh mi ngaihsan a la ni ang tih chu a mah pawhin a inring pha bik hauh lovang. Club velah a perh ve mai mai thin a, mahse hetia club vela a perh hi khawvel hriata guitarist ropui berte zinga mi ni tura a kawng intanna chu a lo ni reng mai.
    Tumkhat chu New York Club pakhatah guitar a play lai chu, khatih laia group lar tak  The Animals a an bassist thin Chas Chandler an a hmu a, thiam a tiin a future pawh bright hlein a hmuh sak a, hepa hi Hendrix a tan chuan khawvel hriata guitarist ropui leh thiam mite ngaihsan ni tura a kawng sial saktu pawimawh ber te zinga pakhat a ni ngei ang. Hepa hian Hendrix a chu England rama kal turin thurawn a pe a, chu thurawn chu pawmin a ni pawhin England lama kal tur chuan a rilru a siam fel ta a. Kum 1966 (Zoram buai kum) chuan London lamah chuan a kal ta nge nge a, a group hmasa ber a tan Experience chu a lo ding ta a ni.

Hollywood actress zingah Sandra Bullock in sum a la lut hnem ber

    Forbes magazine in kum khat kalta a Hollywood actress zinga sum la lut hnemte hming a puanchhuak leh ta a, Sandra Bullock chu la lut hnem ber a ni tlat. Kum 2009 June atanga kumin June thla chhunga an sum lakluh atanga teh a ni a, Sandra Bullock hian dollar maktaduai 56 zet he hun chhungte mai hian a lo la lut a; film chan man atanga a hlawh, a film chan tlangzarh hnua hlawkna a tel, a hminga perfume an siam hralhna atanga a lakluh, a puala thawmhnaw an siam an hralhna atang te leh fakna chi hrang hrang atana an hman atanga a hlawh belhkhawm a ni a. Tih fuh deuh mai a neih chu, 'The Blind Side' film a chanah nidanga a hlawh pangngai aia tlem daih a hlawh a, mahse, he film an tlangzarh hnua sum a lakluh atangin a share a ti tam thung a, chu chuan a sum lakluh hi a ti tha hle a lo ni.

Lindsay Lohan in Jail chhungah nitin lehkhathawn 250 a hmu thin

    Lindsay Lohan (24) chu zu nam chunga motor a khalh avangin Jail bang zut tura an tih angin Jail-ah a awm ta a, Jail chhungah hian nitin lehkhathawn 250 vel a hmuh thinte chhiarin a buai nileng ve a ni ber. A nu Dina a nau Ali ten an kan a, a nu chuan an enkawl dan chu misual pawikhawihte ang tho a ni, a ti a. Lukham a nei lova, Cellphone pawh a nei lova, darthlalang chhanah phone hmang chauhin an inbe thei tih a sawi a, Jail a hna thawk tute, tang vengtu leh tang dangte chu an tha hle niin a sawi a ni.

Nupui then lam ngaihtuah lo Shah Rukh Khan

    Bollywood star mipa zingah hian Big B an tih mai Amitabh Bachchan hnu a, ropui ber chu Shah Rukh Khan hi a nih a rinawm. A film chan tawh reng reng hit lo a awm mang lo. Hmeichhiaten an duh rawn, mipa ho nen lama ngaisangtu ngah em em a ni a, a khawlai mi vak lo thung a, inchhungkhur ngai pawimawh em em mai a ni a; tunhnaia chanchinbu hovin an kawmnaah a nupui leh fate a hmangaih thu leh an bula chen nuam a tih thu a sawi a, a nupui Gauri Khan chu ni khat pawh a mangnghilh ngai lo niin a sawi. Nupui fanau tha tak mai Pathianin min pek avang hian lawmthu ka sawi thin a, ka eizawnna lama hlawhtlinna ai hian chhungkaw hlawhtling neih hi ka ngaih pawimawh zawka chu a ni, a ti.

Lunglei Tualchhung News Lawrkhawm

K. Lalawmpuia 2nd Bn. MAP KM 15 intlansiakah pakhatna: Nimin zing dar 6:30 khan YMA Sub-hqrs. Lunglei leh Assam Rifle buatsaih, Marathon Race Competition neih chu zawh fel a ni ta a, he intlansiak-ah hian 15km tlan a ni a, pakhatna K. Lalawmpuia 2nd Bn. MAP, Venghlun niin, pahnihna CC. Sahu Assam Rifle niin, pathumna Lalhmingmawia Venghlun te an ni.
    Nimin zinga intlansiak hi Pu P. Lalhmangaihzuala YMA Sub-Hqrs President-in a vai liam a, mi 39 te Starting point atang hian tlan chhuakin a thleng thei chu mi 29 an ni. September thla a Aizawl-a ‘Open Marathon Race’ an neih turah Lunglei District aiawhin heta tlan tha 15 chinte an kal ang a, Lawngtlai leh Saiha atangin an lo kal bawk ang a, an vaiin mi 30 vel Aizawlah hian an kal dawn a ni. Mizoram pum Open Marathon Race neih tura Chhim lam atanga kal turte hian, September ni 1-ah Aizawl panin an kal ang.

Case 216 register-ah Case 184 Chargesheet tawh “Police te hman theih, koh theihin kan awm reng tur a ni”- Lallianmawia MPS, S.P Lunglei

 Nimin chawhma dar 10:00 a.m khan Lunglei S.P Office Chamber-ah District Crime Conference S.P Lallianmawia MPS kaihhruainain neih a ni a, Lunglei District chhunga Case dinhmun hrang hrangte bakah Pending Case te chinfel thuai dan tur leh Police ten Discipline tha zawk an neih theih dan tur sawi ho a ni.
    He Crime Conference neiha Lunglei District Crime rate dinhmun, January ni 18 - August ni 18 , 2010 thleng chu hetiang hi a ni. Hemi hunchhung hian Case Register 216 a ni a, heng zinga Case 184 te hi Chargesheet a ni tawh. Case Chargesheet/Disposed percentage hi 85% a ni. Case chinfel tawh submit zat hi Case 6 a ni a, 3% a ni. Case Register zingah la chinfel lo pending Investigation hi case 26 a awm a, hei hi 12% a ni.

Tualchhung News lawrkhawm

 SADS ten ruih hlo man leh ta: SADS te chuan Lalhriatpuia (20) S/o C. Vanneihsanga Dawn hnen atangin Parvon Spas box 13 (mum 2600) leh Lalawmpuia (22) S/o Laldintluangi Ramthar hnen atangin Parvon Spas vek, box 9 (mum 1800) an man sak leh ta a. Heng ruihhlo an mante hi Dt. 14.8.2010 khan Sumo in Aizawl atanga rawn phurh phei a ni a. Dt.17.8. 2010 tlai khan an thuhrukna atanga phawrhin man sak an ni ta a ni. Tunlai hian Lungleiah Ruihhlo a vang ta hle a. A rate pawh a sang tawh hle. SADS te ruihhlo an mante hi tualchhung rate anga chhut chuan Rs 2, 20,000/- man hu lai a ni. Heng mite hi an thil man nen Escise & Narcotic Department hnenah an hlan nghal a ni.

Lunglei Police ten Ganja 11 Kg leh 59 gram niminah an man

    Nimin khan Lunglei Police te chuan Ganja 11 Kg leh 59 gram Piangsiamkhaia (22) S/o Ngokhampau of Hnahlan atangin an man sak a. Hei hi tualchhung rate anga chhut chuan Rs 69,540/- man hu zet a ni.
    Lunglei Police te hi Aizawl-ah tang lain an kal a, an tang lak hi Aizawl - Lunglei Sumo Service (LC) MZ-01 D, 9310 ah an rawn chuanpui a. He Sumo-ah hian Ganja rawn phurh a nih tur thu hi YMA Sub Hqrs. Ruihhlo dotu SADS chuan lo hre lawkin an lo chang nghe nghe a. Mahse, Police te an lo chuan ve avang hian an check zui  ta lova. He Sumo-a chuang ve Police te chuan an mi chuanpui pakhat Piangsiamkhaia chu a tawngkam leh a titi danah rinhlelh rukna an nei a, Lunglei Police Station an thlen velleh, Piangsiamkhaia bag chu an check sak ta a, Ganja thahnem tak hi an man ta a ni. Amah Piangsiamkhaia hi nimina Ganja an man sak lai hian a rui deuh niin, a mantu Police Officer chuan a sawi a, kan palaiin nimina Lunglei Police Station-a a tlawh lai pawh hian Piangsiamkhaia hi a la rui deuh niin a hmu.

Sholay film channa khua Ramgarh-ah

Bengalore kan thlenna hotel thawktute nen thla kan la

    Zing dar 7: 30 vel a ni a, Bengalore - 20 a kan thlenna Hotel nuam tak mai, Hotel Hosaya chu chhuahsan turin kan thawmhnaw bag ak chuan ground floor lam panin kan chhuk thla hnak hnak a, Bengalore kan cham chhung hian kan thian hmeichhe thenkhatte chuan bungrua engmawzat an lo lei leh hman tawh avangin a tira an bag ken bakah, bag dang pawh an lo neih belh leh hman tawh hlawm a. Chutiang a nih avang chuan puih loh theih loh an niin, an bag rit tak takte chu tlawmngai thenkhatte chuan an room, hotel chhawng thumna atang chuan kan put thlak sak lawp lawp a.
    Keini Tribal ho, phai lama la zin ngai mang lo tan chuan thian thenkhat fing var deuhte kan zui changin step-a kal chiam ngai lova lift-a kan chuan mai thinte kha hre reng mah ila, mahni mai chuan lift-a han luh ve rawk chu kan tih deuh hru avangin step chhuk chho tak tak pawh chu pawisa hleithei lovin bungraw bag chu kan pu lawp lawp a, hotel-a thawk thenkhat hote kha chuan mak min tih hmelin min en ve haw haw hlawm a nih kha!

Kan thlenna Hotel Hosay, kan room corridoor-ah

    Mahse, eng nge pawi! Duh leh Vai ho chuan min lo en ve mai mai rawh se tih chu rilru pu chuan, hotel hnuai lam chu kan pan thla a. Motor Parking a buaithlak deuh thin avangin hmanhmawh tak chuan kan Bus-ah chuan kan bungruate chu hlang lut vat vatin, zing dar 8:00 vel chuan Bengalore chu hnuchhawn chuan, Mysore lam panin kan tlan ta liam ta a.
    Zing dar 7:00 velah thingpui leh Puri (Atta) per khat emaw chauh ei kan nih avangin ril a tam duh angreng hle. Mahse, riltam satliah deuh mai a la niin, a la tawrh theih viau. Chung zawng ai chuan duh duhna hmunah kuva lei tur awm lo leh, kuva vang lutuk chu keini, tribal kuva heh ho, Mizo, Khasi leh Garo ho tan chuan a hrehawm lampang deuh chu a ni.

Bengalore-a ka Room mate te nen kan in posh

    Chumi zing pawh chuan kuva ei tur kan neih hauh lova, duh leh chak em em vang pawh ni lo chuan Vaiho in sahdah an nuai chawp ang chi hi chi, (a hming ka hre ta tlat lo) chu kan nuai chawp ve a, kan hmuam deuh chhen a ni ber. Zing dar 10: 00 vel chiah chiah a ni a, kan kal ang tih pawh kan rin phak loh leh suangtuah pawh kan la suangtuah chhin ngai aih lohna hmun, Ramgarh  thingtlang khaw pakhat kan thleng a. Min hruaitu (Guide), Indian Information Service pa chuan “Helai hi Sholay Film an channa khua kha a ni. Saw, saw saw an channa hmun tak tak kha a nia” a han tih chuan kan beng kan tun hru a, a kawhna lam chu kan hawi nghal suau a.

Basanti nen Dosa, Ramgarh khuaah kan ei

    A tak ngeiin kum 35 liam ta a, Dharmendra, Amitabh Bachchan leh Hema Malini te hovin lem an lo channa hmun chu kan hmu ve ta a nih kha! Kha an lemchan Sholay kha kum 1975 August ni 15 Independence Day tak khan tlangzarh a ni a. Kum 35 zet lo tling ve ta. Mahse, tunlai thlengin en a la hlawh a, film hlawhtling ber leh ropui ber zingah a la chhal theih reng. 1999 kum pawh khan BBC India chuan, “Film of the Millenium” ah a puang nghe nghe a, chu mai ni lovin, 50th Annual Filmfare Award pawhin, kum 50 chhunga film tha berah puangin, “ Best Film of 50 Years” Award an hlan nghe nghe a ni. Kan hriat zau mai mai nan Sholay film atang khan Rs 768,81,00,000/- zet hmuhchhuah tawh a ni a, chu chu US pawisa hlut zawng anga teh pawhi US $ 160 million hu zet a ni nghe nghe.
    Sholay film channa hmun kan thlir vang vang lai chuan, khatih hunlaia lung lianpui pui (the rocky terrain of Ramanagara, Karnataka) te chu a awm ngaiin a la awm reng a, Sholay film-a a changtupa, Veeru (Dharmendra) an Tanky atanga zuanthlak a tum lai a,  “Basanti” tia a changtunu, Hema Malini a han au vawng vawngte kha mitthlain ka hmu chuai chuai mai!  Kha Tanky kha a la ni reng angem tih chu ka hre hauh lo nain, Tanky kang sak taka siam kha chu a la awm reng a. Mahse, Sholay film chan hunlai, kum 35 vel liam ta a mi kha a la ni thei angem tih erawh ka chiang ngam tawh bik lo a ni. Chutih rual chuan, tanky hmuh tur a la awm ve hrim hrim leh Sholay film channa hmun ka hmu ve thei pawh hi a lawmawm tawh hrim hrim e.

Nununi leh William Nagar thinapa Mastor-a te thil ei, Ramgarh

    Sawi ve reng rengah tiin, Ramgarh khuaah chuan Breakfast  kan ei a, Restaurant dangdai ang reng tak, a tual zawla In, a chung atan pawha ‘Di’ an hman ve ang chiah chuan kan chawl a, khulai khawlumna hmunah pawh, a boruak zia ve pawl tak chu niin ka hria.
    Sholay Film channa khua a nih avangin hmun danga ka la ei duh ngai loh, South Indian hovin breakfast atan leh dinner atana an ei thin pakhat,  “Dosa” chu a hriatreng nan  kan ei ve reng reng teh ang ka ti a. Dosa chu thleng hlai deuh pakhatah, a chhip zum, a hmel ena mawi tak min chhawp chu a tui hmel hle a, len pawh a lian hle. Mahse, han ei chiah chuan Tribal kaah zawng a tui vak hran lo hle. Engemaw kawr kan ro hang dup hi a ang berin ka hria. Mizo hovin Zochhang kan ngaisang em em a, a hang dup a, a ban em em a ni ringawt mai! Hnamdang ho tan chuan “Zochhang” pawh hi eng tehchiam a ni lovin a tuina em em a awm vak ka ring bik lo.Kei nin ngaisang em em mah ila, a ban avang leh khawih a hrehawmna vang hrim hrim pawh hian hnamdang ho chuan “Zochang” ai chuan chhang dang ei awlsam zawk hi an ei duh zawk ngei ka ring a ni. Mahse, chutiang deuh chiah chuan kei pawhin, Sholay film channa hmun kan tlawh hriatreng nan tiin tui ti lo chung chuan, Dosa chu ka ei ve hrim hrim a, mahse, pakhat pawh ka ei zo thei meuh lo chu a nih kha!

Ramgarh: Breakfast kan eina Restaurant kawt with Mam

    Kan sawi tel mai mai, kha Restaurant nghaktu nula te kha a felin a polite reuh sia, a hmel pawh a chhe vak lo a nih kha! Han kawm a, han fiam mai maite pawh chakawm hle. Mahse, anni dawr nghak buai dan em em  han ngaihtuah leh keini hun nei loh dan nen han buk tawn chuan a intluk reng awm e. Chuta karah hnam dang nula a la ni zui! Ngaihtuah zui lo mai ang; engti kawng mahin khulai hmuna an tawng hman, Kannada language lah chu ka tan thiam ngaihna awm dawnin ka hre tlat lo. Vai ho zawng zawng hian Hindi an thiam vek emaw kan tih fo laiin, Kannada tawng hmangtu, khualai South Indian (Karnataka) velah khuan Hindi  thiam lo fe fe an lo la tam ve hle mai! Keini kawi khat pawh Hindi-a tawng thei lo ai pawha la hre lo chhah ve fe fe zawk an la awm ve nuk nia mawle!

Ramgarh chhuahsanin Mysore kan pan leh ta a....

    Chutiang chuan Sholay film channa khua leh hmun, Dharmendra, Sanjeev Kumar, Hema Malini, Amitabh Bachchan, Jaya Bhaduri, Amjad Khan leh Asrani  te ho tual lo chai tawhna hmun chu thlahlel tak chungin kan tlan liam san ta a, chhun dar 12: 40 p.m ah Mysore kan thleng a, Chandra Palace Hotel-ah innghatin, Room No. 103-ah thianpa, M.K Singh-a Tripura atanga lo kal, Journalist  ve tho nen chuan kan awm dun a, Hema Malini te vanglai ngaihtuah chung rengin Hotel-ah chuan kan chawl hahdam ta rih a..............

- V. Rokhawlkima (KKA)

Sholay film channa khua Ramgarh-ah

Mysore Palace kan tlawh thlalak thenkhat chauh

Mysore Palace kan tlawh chanchin leh, mi nazawng luh phal lohna, Confidential Room an tih maia kan luh chanchin, kan thil hmuh leh en hrang hrang chanchin ziak a chakawm khawp mai! Mahse, hun ka la nei lo em a, remchangah Palace kan tlawh chanchin tlangpui chu la rawn ziak ka tum ang.

Lang kim tura thla lakna tur a vang khawp mai

Sikkim lam pang Region unaute nen kan intawk khawm

Kan hotupa hovin kan thiante ho

Our tour Conducting Officer OL. Marbaniang & myself

A chhungah thlalak an phal si lo, a pawnah chauh hian aw!

Hei hi Mysore Palace chu a ni.

Zanin zanlaiah Manchester United in Newcastle United an mikhual dawn

Zanin hian EPL match hmuhnawm tak leh an khel kan hmuh chak tawh em em, Manchester United chuan EPL a rawn in pet kai ve leh ta, mikhual vak em em hran tawh lo, Newcastle United an lo mikhual dawn a, Season tharah Newcastle tan hian EPL an rawn kai thar leh tum a nih avangin Manchester United khelh hi a chakawm tawh hle ang tih a rin theih. Hetih rual hian an tan chuan United hmachhawn nghal hi thil huphurhawm tak pawh a ni tel thei tho awm e. Michael Owen atan, a Club hlui lo mikhual hi a chakawm tawh hleiin a rinawm bawk. Kan hriat tawh angin Season hmasa khan Newcastle hi Championship lamah khelin, EPL atanga an tlak hnuah Championship-ah season khat chiah an awm hman tihin EPL-ah an rawn inhlangkai ve leh ta a ni.

Lunglei khawpui chhungah thing lian sa phun turin hmalak tum mek a ni

    Inrinni chawhnu dar 1 khan Conservator of Forest chuan Lunglawn Forest Check Gate bula an Compound chhungah India ramin Zalenna a hmuh Champha vawi 63 na pualin thing an phun. He an thingphun hi Tei thing niin, Fet 8 vel a sang a ni a, Thing phuntu Pu Suanzalang IFS, CF , Southern Circle chuan thing te tak te te phun lova thing lian sa phun hi Technology thar a nih thu te, Urban Foresty Scheme hnuai ah Lunglei khawpui chhung hmun hrang hrang ah thing lian sa phun a hmalak tum a nih thu a sawi a, Thinglian sa phun hian hun rei lo te ah a pui tlin theih avangin a hlawk em em a ni a ti a, Seedling ai ah Planting hi uar chhoh zel an tum thu a sawi bawk.

Lunglei khawpui chhungah thing lian sa phun turin hmalak tum mek a ni

    Inrinni chawhnu dar 1 khan Conservator of Forest chuan Lunglawn Forest Check Gate bula an Compound chhungah India ramin Zalenna a hmuh Champha vawi 63 na pualin thing an phun. He an thingphun hi Tei thing niin, Fet 8 vel a sang a ni a, Thing phuntu Pu Suanzalang IFS, CF , Southern Circle chuan thing te tak te te phun lova thing lian sa phun hi Technology thar a nih thu te, Urban Foresty Scheme hnuai ah Lunglei khawpui chhung hmun hrang hrang ah thing lian sa phun a hmalak tum a nih thu a sawi a, Thinglian sa phun hian hun rei lo te ah a pui tlin theih avangin a hlawk em em a ni a ti a, Seedling ai ah Planting hi uar chhoh zel an tum thu a sawi bawk.

Electric Veng YMA in kumin chhungin Ruihhlo Rs 9,01,025/- man hu zet an man tawh

    Inrinni chawhnu dar 1 khan Electrict veng YMA hruaitu te chuan ruihhlo dova an kal zel dan tur chung changah veng chhung NGO hrang hrang te leh Kohhran hrang hrang te, VC member te Electirc veng Community Hall ah ko khawmin hma lak zel dan tur an sawi ho. He meeting a kal te chuan YMA in ruihhlo do kawng a hma an la chu tha an tih thu an sawi a, ruihhlo dona kawng a an hmalak zelna tur a tan tanpuina sum fai pawh an hlan nghal bawk a ni.YMA ten ruihhlo an dona kawngah hian anmahni tanpui nan inrinni khan MHIP Branch Electic veng ten Rs 2000/-, MUP Unit ten Rs 1000, VC ten Rs 1000/- an hlan nghal a ni. 

Lunglei Dist. khaw kar kawng siam nan sum ruahman dan

    Pu. John Rotluang liana Dy. Speaker Mizoram Lagislative Assembly chuan nimin zing khan Lungleia India Independence Day lawmnaa a thusawi zingah, Lunglei Distict chhungah, NABARD sum hmangin, Hnahthial - Thingsai Road tan cheng nuai 424, Serte - Sertlangpui tan cheng nuai 370.31 sanction fel tawh a ni a, Central Road Funs hmangin Lunglei - Vanhne kawng siam that nan cheng nuai 367.34 sanction hmuh a ni tawh a, PMGSY sum hmangin Buarpui - Kawlhawk kawng siam nan cheng nuai 328.79 hmuh a ni a, Tawipui ‘N’ - Mualcheng ‘S’ kawng siam nan cheng nuai 450.2 te, Khawhri - Chawngtui Road atan cheng nuai 813.12 te, Leite - Mualthuam ‘S’ Road atan cheng nuai 540.85 te, Leite - Saibuchhuah Road atan cheng nuai 316 leh Mat - Lungmawi Road atan cheng nuai 365.35 hmuh a ni bawk a, Central Road Fund hmangin Lunglei District Road atan cheng nuai 500 leh Lunglei - Tlabung Road atan cheng nuai 200 ruahman a ni bawk thu a sawi.

Brenda fans ten Carlos Tevez an duhlo, Varak a ang, an ti.

    World Cup players zinga hmelchhe thlanchhuah zinga lang phak Argentine Striker Carlos Tevez (26) hian naupang te a nih lai atanga a lo hmangaih thin Vanessa Mansillo nupuiah a nei a, mahse, a then leh tawh. Tunah chuan Argentine nula kum 18 mi lek lemchan thiam, zaithiam bawk, hmeltha bawk Brenda Asnicar chu a kawp leh tawh. World Cup a Argentina an tlak khan Tevez leh a bialnu hian chawlh an hmang a, Tevez chuan an kalna a tan thlawhna a hire a, Sweden rama Bariloche vur ramah chawlh hmangin vurah te an tleng dun.
    Brenda hian fans tam tak a nei a, ngaisangtu a ngah a, a fans te chuan Carlos Tevez kher kher a kawp chu an ngaithei lova, hmelchhia an ti a, Varak a ang, an ti sup sup. Brenda erawh chuan, pa hmeltha tak a nih thuin a chhang ve tlat.

Paris Hilton in Party a tel manah $ 1m a dawng lo

    Malaysian billionaire Jho Low an France tuipui a chawlh a hmanna-ah Paris Hilton leh a laizawannu Nicky te sawmin a nawmchenna lawng Yacht-ah party an nei a, hemi chungchangah hian chanchinbu tam tak chuan dollar maktaduai khat Paris Hilton hian a hlawh, an ti a; Party a tel man tel tam ber pawla ngaih a ni hman a, mahse a mah Paris Hilton chuan chutiang ang hlawh a zawng chuan engmah a dawng lo tih a sawi. A thupuangtu chuan, Jho leh Paris te hi inthiamtha tak an ni a, a hire ang zawngin engmah a awm lova, holiday hmannaah hian tel turin a sawm a, a tel ve a ni mai, a ti.

MIN HRETHIAM TEH U

Internet chiang lo lutuk, a chang a tha, tha leh lo! Chutiang vel chu a ni a, chumai bakah hna lam avanga indaih loh nen duh angin ka Blog. pawh ka update tha thei lova, blog. tlawh thintute hriatthiamna ka ngen a ni. Theihtawp ka lo chhuah zel ang e.......... KKA

Zirna a in pe pumhlum vek thei lo, Lalropuii Pachuau

Zaithiam ve ve CR-i leh RP-i te hian
thla min lakpui an chak tlat a!

    Lalropuii Pachuau chuan, Doordarshan kum 50 tlin lawmna Aizawl concert-ah zai tura sawm a nih angin kar kalta khan a va zai a, heta a hla sak ‘Khuamawii’ chu ngaithla apiangin ngaihnawm an ti. He hla hi Sailothangi Sailo in Saikuti hla a lo lar pui em em thin te, F. Laldinmawii’n ‘Lung a leng em mai’ hla a lar pui phuahtu F. Lalthanliana phuah bawk a ni leh a; rimawi lama mi ril tak pakhat Aizawl a miin Lunglei Times a hrilh danin, Khuamawii chu hla lar tak a ni chho ngei dawnah a ngai a, Lalropuii hian a lar zualpui leh ngei turah a ngai.

Sholay-in kum 35 a tling dawn. En a la hlawh reng

    Independence Day a lo thleng leh dawn ta a, he ni pawimawh takah hian India rama cinema hall hrang hrangah  naupangte tan a thlawnin cinema an chhuah thin a, chuta an film chhuah zin pawl tak chu Sholay hi a ni. Kumin Aug 15 hian Sholay chuan kum 35 a tling dawn a, heti taka upa ni tawh si hlut a la hlawh thei hi, a changtu Amitabh Bachchan chuan mak a ti a, Sholay film an chan dan vel chu nimin maia thil thleng angin a rilruah a la thar reng niin a sawi. He film-a a chanpui a nupui Jaya hi Sholay an chan lai vel khan fa a pai tawh nghe nghe niin a sawi.

MJA Lunglei-in SADS Rs 2000/- in a tanpui. SADS ten Ruihhlo Rs. 9,92,950/- man hu zet an man tawh

Vawiin khan MJA te chuan YMA Sub-hqrs. hnuaia din SADS tanpuina Rs. 2000/- hlanna hun an hmang. He hun hi Pu K. Lalrinpuia MJA President-in kaihruaiin, Pu Lalrinchhana Fin. Secy. MJA chuan he pawisa hlanna hun hi a hmang.
    Pu Lalrintluanga Khiangte MJA V/P chuan  thusawiin, hetiang anga SADS ten ruihhlo dona lama hma an la hi lawmawm a tih thu leh mipui support-na a pawimawh zia sawiin, hmasawn tur chuan mipui support-na hi a pawimawh hle a ni a ti a. Duh angin tanpuina sum a lut chak lo hle niin a sawi a, heng kawngah pawh hian tun aia kan inphal zau a pawimawh thu a sawi a, ruahmanna leh kalphung fel tak neia kal a tul thu a sawi bawk.

‘Lungkham’ C. Lalhruaitluanga ziak Rs 50/- tlangzarh a ni ta

Nimin zirtawpni chawhnu dar 1:00 khan C. Lalhruaitluanga, Chanmari Lunglei lehkhabu ziak, “Lungkham” chu Lunglei Press Club-ah Pu. K. Lalrinpuia, President MJA Lungleiin a tlangzarh.
Lehkhabu Tlangzarh Inkhawm hi Lalrintluanga Khiangte Vice President MJA Lungleiin a kaihruai a, V. Rokhawlkima, Jt. Editor Lunglei Times chuan “Lungkham” lehkhabu Preview hun hmangin, Lungkham lehkhabu, C. Lalhruaitluanga ziak chu phek 128-a chhah, Rs 50 man a ni a, thuziak hrang hrang 23 awmin, heng thuziak hrang hrangte hi, thuziak hlawm then (Category) 4-ah a dah a nih thu sawiin, lehkhabu tha leh ngaihnawm tak a nih thu a sawi a, chhiar manhla tak a ni a, “Lungkham” lehkhabu chu leia chhiar theuh turin kalkhawmte a duhsakthu a sawi a ni.

Maruti Suzuki in Alto car thar K10 an hralhchhuak tan dawn

Maruti Suzuki chuan Alto car chi thar an siamchhuah chu hralhchhuak tan a ni dawn a, Alto K10 a ni a, 1000-cc engine hmang a ni a, tuna Alto an siamchhuah tawh ho ai hian 125mm in a sei zawk a, a len pawh a lian hlek zawk. Rs. 280,000 - 340,000 inkar man a ni dawn. Maruti Suzuki chuan an car chi thar hi kumkhatah 150,000 vel hralhchhuah theih an in beisei.

Sir Cliff Rechard kum 70 tlin lawmna Concert buatsaih a ni dawn

Veteran singer Sir Cliff Richard chuan kumin October 14 khian kum 70 a tling dawn a, a lawmna a tan London's Royal Albert Hall - ah concert a siam dawn. Zan khat chauh pawh a la ni lo lehnghal a, 11 Oct atanga tanin zan ruk tawp a ni dawn. A album thar jazz and swing inpawlh chu tlangzarh mei theih a ni tawh a, Wine siamna a neih atanga brand thar an siamchhuah pawh tlangzarh a tum bawk.

Brindavan Garden kan thlawh

A ni tak ka theihnghilh tlat mai, Ramtuk thla tawp, tlai lam dar 3:00 vel a ni a, India History-a hmun pawimawh tak mai luah pha, Historical City an tih, Mysore atangin, khawvel huap pawha huan mawi tia hming thang, India inchhuanna pakhat ni bawk, awmze nei taka siam Brindavan Garden panin kan kal a. Brindavan Garden kan thlen dawn chuan ral khat atangin a mawi zia kan hmu nghalin keini ho chu luh thuai thuai chakin kan sahawk tawh a ni ber.

Thlala turin kan inposh a, a lunglen thlak ve ta hle mai!

    Brindavan Garden chhunga lut tura thil kan tih fel hnuah, a chhunga thlalak ve ngei kan duh dawn avangin Camera hman phalna coupon la tur chuan kan intlar dul a. Camera pakhat keng luta hmang theih nan hian Rs 50/- zel chawi angai a. Mahse, chutiang ang huan ropui leh mawi chhunga kal ve lema thlalak loh ngawt chu a nih si loh avangin, Rs 50/- chawi kha kan hreh lova, thla kan la thei lovang tih kha kan hlau ber zawkin Rs 50/- chawi hmasa nih loh kan hlau zawk a ni ber.
    Brindavan Garden hi, Karnataka, Mandya District-a awm a niin, Mysore City atang hian 24 Km a hla a ni a. Bengalore atang erawh chuan  143 km laia hla a ni. Brindavan Garden chhehvelah chuan tuikhuah lianpui mai a awm a, chu chu tunhma han ti ve ngial ila, school kan kal laia kan zir thin River Cauvery kan tih kha a ni. River Cauvery tuikhuah lian tak mai chu Brindavan Garden chhungah hian la lutin a luang dam dam a, chu tui chu khawih ve hrim hrim kan chakna avang chuan kei pawh chuan duhtawk chuan ka han khawih ve a. A hlimawm dangdai ve hrim hrim khawp mai.

Zanah hlei hlei hian a lo lang mawi zawk a nih hi tih tur a ni

    Brindavan Garden hi a lianin, han fan chhuah dap pawh thil hahthlak angreng tak a ni. Kum 1927 atang khan he huan mawi tak siam hna hi Horticulture Department hmalaknain bul tan a ni a, tih changtlun chhoh zel a niin, tunah hian 60 acres laia zau a ni nghe nghe. Tin, Brindavan Garden hi Terrace anga siam a ni a, Krishnarajendra Terrace Garden an ti bawk thin a ni.
    Tarlan tawh ang hian River Cauvery lui tui chu khuah a niin, Brindavan Garden kal zela a tawpah hian an tuikhuah bang lianpui mai chu a awm phei un a, han lawn chhina River Cauvery an khuah tak chu hmuh a chakawm hle a, mahse, chu chu phal a ni lovin sipai ten an veng vek si! Kan tih theih tawk chu chulai vela a tam thei ang ber thlalak a, hmeh det zawr zawr chu a ni mai!
    Chulai huan mawi chhunga kan awm lai chuan khawvel hmun hrang hrang atanga khualzin ringawt pawh mi engzat nge awm ang tih ngaihtuah tham tak a ni a, chutiang bawkin, India ram hmun hrang hrang atanga helai hmun tlawha lo kal pawh kan thahnem hle. A bik takin keini Mizo hi kan hmel put hmang a lo danglam deuhin, kan Indian pui vai kan tih tam takte phei chuan Indian kan ni ve lovah an ngai hial a, Indian kan nih ve tho thu kan han sawi pawh chuan an awih chiah thin lo deuh.
    Kerela State atanga lo kal zirlai rualte zinga mi thenkhatte phei chuan min rawn biain, “Are you a Japanist” a rawn ti a, kei chuan Japanist kan nih loh thu sawiin, Indian kan nih thu ka han hrilh hnu pawh chuan, “Where do you come from?” a han ti zui leh kher a, kei chuan, “We came from Mizoram” tiin ka han chhang leh  a, thlalakpuiah min sawm a, thlate kan lakpui ve nghe nghe a nih kha!

Tui phuh seng seng hi a mawi reuh lutuk a, thla lak pui loh chuan ka kalsan thei lo

    Brindavan Garden huan chhungah hian kan teikual nasain, thla kan la nasa hle bawk a, kan hah deuh tawh nen, theitui in chuan a sira chawlhna nuam taka thuin kan chawl a, an tape play zai remin kan officer pakhat phei chu an lo lam vel a, kan hlimpui takzetin kan nui nasa hle a nih kha!
    Khua a thim tan dawn emaw chauh kan tih chuan zan dar 7:00 a lo ri dawn reng a, zan dar 7:00 atangin Musical Fountain en tur a awm dawn a, hmanhmawh takin, Brindavan chhunga lei sei tak mai chu zawhin, Musical Fountain ennna tur hmun lam pan chuan kan kal sawk sawk a. Chutih lai chuan ruah chu sur chiah si lovin a si seng seng a, mahse, ruah sur tih vel lampang chu kan pawisa hauh lo nia!
    Mipui a tama tam em em mai chu an lo pungkhawm tawhin, Musical Fountain chu kan han en tan ta a. Music hot lampang an play a, hot zetin vainu zai a rawn ri chhuai chhuai a, kan zauthau tawh a ni ber! Chu music rem chuan mawi tak maiin, chulai hmuna tui chu rawng chi hrang hrang chuan a han inphuh chhuak a, mawi tak mai chuan a changin a inphuh sang a, a changin a inphuh hniam a, a lam a ni ber. Chu chu Musical Fountain an tiin, entu mipui an thahnem thei hle a, chu chuan khualzinte pawh nasa takin a hip thin a lo ni. Hmuhnawm taka Musical Fountain kan en chu kham lo zetin kan kalsan leh ta a nih kha!

Hei hi Musical Fountain kan en chu a ni

    Brindavan Garden kan tlawh chanchin ziak tur chu tam hle mahse, a tawi zawngin a tlangpui chauh ka han ziak thuak thuak rih phawt a ni. Brindavan Garden kan hawn san dawna kan motor awmna lam kan pan lai hian kawngpui sira thil zuar lo intlar dulah chuan va kalin, Sangha hneh zeta an lo fry chu Rs 20/- in kan lei hlawm a, tuiti zetin kan ei hlawm a nih kha. Kan thian thenkhatte phei chuan zanriah kan ei huna chawhmeh atante dahthain an hmeh leh bawk.
    Chutih lai chuan engtikah nge Brindavan Garden hi kan tlawh leh ang aw tih chu ngaihtuahnaah a thui duh khawp mai! Bus tukverh darthlalang atang chuan hnung lam hawiin kan thlir let vang vang a, Brindavan Garden chu kan vai liam ta a ni.

    Note: February - March thla khan Opinion Leaders Tour neiin, Karnataka state hi Field Publicity Department bultumin MMT Region (Mizoram, Meghalaya leh Tripura) atanga thlan. aiawhten kan zuk tlawh kual a, training hrang hrang kan nei a ni. Kan vaiin, mi 14 kan ni a, Mizoram atangin mi pahnih kan kal ve thei a, Meghalaya atangin mi 8 kalin, Tripura atangin mi 4 an kal ve bawk. - V. Rokhawlkima (KKA)

Elizabeth Hurley reality show kumin tawp lam atangin

    Hollywood actress Elizabeth Hurley chuan, reality show kumin tawp lam atangin a buatsaih dawn a, kum nga kaltaa Gloucestershire, South West England-a ram a leiah a pasal Arun Nayar nen khawsain an hnathawh dan leh nunphungte he show-ah hian tih lan vek a ni dawn a, khawvelin Elizabeth Hurley an hriat dan leh a taka a nun phung chu a in an loh zia a tarlang dawn a ni.

U2 in Rimawi atanga sum hailut hnem ber nihna an hauh

    Rimawi a sum lalut tam Forbes in a tihchhuahah chuan,kum khat kalta chhunga sum hailut hnem ber chu Irish band chuai thei lo U2 an ni a, an vocalist Bona hnungzang na avanga Glastonbury Festival-ah an perform thei lo chung pawhin pakhatna an ni tho. Thla 12 kalta chhung khan dollar maktaduai 130 zet sum an hai lut hman. An sum lakluhna lian ber chu an album thar No Line on the Horizon support na a tana an tour chu a ni. Tour a ticket hralhna atanga an sum ringawt hi $ 10m zet a tling a, an record hralhna leh sumdawnna an neih chi hrang hrang te atangin sum hi an lalut a ni.