Dangdai - 4

 Isua ni lovin Juda zawk an khengbet tiin, film an siam:   Iran film director Nader Talebzadeh chuan, Iran hardline president Mahmoud Ahmadinejad nen an ngaihtuahna atangin Isua film siam thain an hria a, 'The Messiah' tih film an siam ta a; Lebanon-ah he film hi tihchhuah a ni a, Christian ten nasa takin an do dal a, chuvangin chhuah chhunzawm tawh lo tura tih a ni.
    al Manar and NBN television stations te chuan Security General's office-in chhuah chhunzawm tawh lo tura a tih avangin an tichhuak dawn tawh lo tih an puang a, Security General Office chuan ramchhungah ngaihdan inan loh avanga harsatna a thlen an hlauh vanga tih tawp tura ti an nih thu pawh heng TV Stations te hian an puang bawk a ni.

    He film hi Bible behchhana siam a ni lova, Muslims ho lehkhabu thianghlim Koran behchhan a siam a ni a, Isua chu pa hmeltha tak, sam sei tak leh khabe hmul nei anga lantir a ni a, Pathian-in Kraws a khenbeh tur lak atanga chhanchhuakin vanah a hruai nghal daih anga lantir a ni bawk. Kraws a khenbeh chu Isua zirtir 12 zinga phatsantu Juda zawka chu niin an lantir a ni. Koran lehkhabuah pawh Kraws a khenbeh chu Isua ni lovin Juda zawk niin a in ziak a ni awm e.
    Muslims ho hian Zawlnei a  an ngaih ho chu No-a, Mosia, Abrahama leh Isua te an ni a, heng ho hian zawlnei pangana Mohammed a khawvela a lokal tur thu an lo hrilh lawk a, Mohammed a chuan Islam sakhua thehdarh turin a lokal dawn tiin a kawng an lo sial sak a ni, an ti.
    Christian te thurin leh Bible a inziak dan lo ang deuha Isua chanchin film a tarlan a ni chu Lebanon a Roman Catholic te chuan an ngaithiam lo hle a; ti chhuak chhunzawm lo turin an ti a, sorkar pawhin an ngaihdan chu tawmpuiin an ti tawp ta a ni. Lebanon-ah hian sakhaw hrang hrang 18 vel betu an awm a, heng zingah hian Muslim an tam ber a, Christian in an dawt.