Lehlin film leh a behbawm

    Tunlaia kan film en tam ber leh kan buaipui viau chu Korean film hi a ni awm e. Thenkhatten Korean film an nin zia an tlangaupui chiam laiin, thenkhatten tih tawp mai an hlauh thu leh, a ning zawnga lo tlangaute khak zawnga awka lo chhuah ve tawk an awm bawk. Enga pawh nise, kei chuan engti hawi zawng berin nge han ziak ka tum pawh ka hre chiah lem lova, a behbawm vela kualin, tute emaw angin, ‘Thlarau thawh dan a zir zelin’ rilru a rawn lut a piang han thai chawpchilh mai ka tum zawk a ni.
    Tunlaia Korean serial film kan buaipui chiam ang hian tunhma deuh han ti ila, hun rei vak pawh la ni loah khan, vai film ‘Kasautii Zindagi Ki’ kan buaipui chiam tawh a, khami hnu deuhah, “Karam Apna Apna’ tih emaw ni? A film hming ka hrefuh chiah engem aw? Kan buaipui leh chiam anih kha!
    ‘Kasautii’ thlipui Mizoramah a tleh lai kha chuan, a buaithlak thin teh anih kha! Cable Network lam ten a chhuah hun tur an han siam a, chumi dar zat hre reng chuan kan chang far a. Naupang mai chu sawi loh, nula leh tlangval, nu leh pate pawhin hmuhnawm an ti em em a, a lo sel ve tawk pawl chu an awm reng tho a ni.

Hmeichhe mawngtam a zai ching an zawng mek

    Hmeichhe mawngtam blade a zai ching Johnny D. Guillen Pimentel chu Police in man tumin ngawrh takin an zawng mek. USA- a Virginia state-ah hepa hian kumin 2011 February atang khan hmeichhe 9 zet an mawngtam-ah blade in a zai sak tawh. Amah hi kum 40 mi a ni a, Fairfax County-ah kawtthler a hmeichhe kal laite chu an mawngah zai sakin a tlanbo leh daih thin. Amah hi Peru mi a ni a, Peruvian press in an tarlan dan chuan paraphilia vei a ni a, mipat hmeichhiat kawnga mi danglam tak a ni, an ti.

Internet star zinga hlauhawm ber supermodel Heidi Klum

    Supermodel Heidi Klum chu internet a star zinga hlauhawm berah chhal a ni a, mipa-ah chuan Talk Show host Piers Morgan chu a hlauhawm ber tiin security company MCAfee Inc., in a puang. Hmeichhe lamah hian nikuma hlauhawm bera thlan Cameron Diaz chu kuminah pahnihna a ni.
    Anmahni ni lovin internet hmanga heng celebrity zawngtute hian an zawnna lamah virus an personal computer leh laptop-ah te a kai nasat thin vang a ni a, fimkhur turin thu rawn an pe nghe nghe a ni.
    Heidi Klum hi ngaihven hlawh tak mai a nih avangin internet lamah a thlalak leh chanchin zawngtu an tam mai a, chuta tanga virus avanga an PC leh laptop chhe ta an tam hle a nih chu.

Beijing khawpuiah duty atan Ui an hmang tangkai

    China ram khawpui Beijing-ah chuan khawpui chhunga patrolling a tan Ui an hmang a, a tangkaiin a sawt hleah an ngai. Nikum July-August chhunga he khawpuia pawikhawih leh ruk ruk thleng chu kumin he hun angah khan za a 12.6 zetin a tlahniam a, patrolling a tana Ui an hman tam tak vangah an ngai. Ui 100 chuang leh anmahni train tu mi 65 te chu patrolling-in he hunah hian an fehchhuak a ni. Police in Ui an vulh fin 500 zet an nei mek a, misual pawikhawih te sulhnu chhui tur te, ruihhlo a sumdawng te hnuchhui tur tein an hmang nasa hle a; khawlaia patrolling a tana an tangkai leh zel avang hian nakumah chuan Ui fing 1000 zet neih hman tumin hma an la mek.

Phir lu-a inzawm ten kum 50 an tling dawn

    Phir an lu a inzawm tlat George leh Lori Schappell te chuan kum 50 an tling dawn ta. Pathianni lo awm turah kum 50 an pumhlum ang.
    Hetia inzawm si hi an nunphung leh duh dan erawh a inang lo khawp mai a, Lori hi bowler niin ten-pin bowler champion a ni a, George erawh zai ngaina tak niin Country & Western singer a ni thung. Lori hi 5ft 1in a sang a nih laiin George chu 4ft 4in a ni thung. Pennsylvania khawchhuak he phir inzawm te hi an luah inzawmin za a 30-ah an inzawm a, an thisen zam leh tihrawl inzawm a tam em avangin zai then theih a ni lo, an ti.

Miss Universe 3rd runner-up hi born again christian a ni.

    Miss Universe thlan zawh fel taka third runner-up Shamcey Supsup (25) (Miss Phillipines) kha Miss Universe a nih ringtu an tam hle a, mahse a ni zo ta lova, ngaihven erawh a hlawh zui em em tho. He nula hi Christian a ni a, chuta pawh Born again (piangthar) an tih zinga mi a ni. An kawmnaah bialpa a neih thu a pha lova, mahse tunge a nih a sawi duh lova, an rin hriat tho. A bialpa nia an sawi chu tunhnaiah a piangthar nge nge niin an sawi. A nu Marcelina Supsup chu strict tak mai niin a sawi a, bialpa a neih pawhin Pathian hre mi a ni tur a ni a, a laiah Pathian dah turin a ti thin niin a sawi

HMANLAI KHA A TUNLAI A, TUNLAI HI A LA HMANLAI ANG

 Tunlai ni turin hmanlai awm a tul a, hmanlai ni tur pawhin tunlai awm a tul tho tih hi thudik kan hriatsa tho a ni awm e. Mahse,  hmanlai leh tunlai chu  engtin emaw i han bihchiang kipkawi vel dawn teh ang. Khawvel hi a muma a vir miau avangin, zan thim chu chhun khawengin a rawn thlak thin.  Chutiang zelin, mihring te’n kan siam chawp kum bi chhiarna hmangin, nikum kha khawvel chuan herliam puiin kumin a lo herchhuak a. Chutiang zel chu anih avangin, kumin atanga hun tam tak liam tawh hnute chu “Modern Age” a cheng tawhte chuan kan thlir B.C ta ruihin, “Hmanlai an chang zo ta” kan ti fo anih hi.
    Khawnge hmanlai leh tunlai chu i han thlir tawn thuak thuak dawn teh ang! Hmanlai chuan han ti ve ngial ila, sap hovin thla (month) hming chhiarna (January - December) ang hi, zofate thla hming chhiarna a ni ve lo va, a lam pawh an thiam mang meuh lovin, zo rim nam vang vang, “Pawlkut thla - Pawltlak thla” tia a hming mawi tak vuahin an lam thin a ni.