Lunglei Tualchhung News thenkhat

 ** Workshop cum Mini Exhibition A&C Auditorium-ah nei dawn:  Vawiin chawhma dar 10: 30 atang hian A&C Auditorium-ah Worshop cum Mini Exhibition, Horticulture Deptt. bultumin neih a ni dawn a, khuallianah Pu. T. Lalduhawma Addl. DC hman a ni ang a, khual zahawmah Pu. R. Zotawna Jt. Director of Horticulture, Aizawl a ni ang. He hun hi Session hnihah then a ni a, 1 session hi Pu H. Manthianga CHO, Lungleiin a kaihruai ang a, II Session hi Pu. Vanlalruata Chenkual Dy. Director of Horticulture (Flf) Aizawl-in a kaihruai ang. He hunah hian Power Point hmangin Presentation hrang hrang neih a ni ang a, sawihona hun hman a ni dawn bawk a ni.
** Indopui pahnihna lawmman lak theih:     Dy. Director Zilla Sainik Welfare & Resettlement Lunglei hnen atanga kan thudawn danin, Indopui pahnihna lawmman la thinte tan thla thum lawmman a lo thleng leh ta a, nimin December ni 14 atang khan Office hunchhungin lak theih a ni.
** Sunday School hla tlangzarh tawh:     Mizoram Baptist Kohhran, Christian Education Department bultumin Sunday School Promotional Music Video buatsaih chu December 5, 2010 khan Pastor Confenrence-ah tlangzarh a ni ta. He Music Video-ah hian Sunday School kai tura in sawmna leh Pathian thu zir hlut zia pho lan a ni ber a. A lyric hi Rev.H.Killuaia siam a ni a, a thluk (Tune) hi F. Laltuaia siam a ni thung. Bethsy Lalrinsangi'n thiam takin a sa a. Video mawi tak leh changkang taka siamtu chu, tunlaia lunglei lama Music Video tam tak siamtu leh lar chho mek, M Spacce siam a ni. DVD format duh tan BCM Christian Education Department-ah ngaihven theih a ni. Tin, Mizoram Local Cable-ah te Demand Channel-ah pek chhuah an ni bawk.
** Pu Mathana lungleiah lo kal dawn:     LAD etc Minister Pu PC Lalthanliana chuan vawiin hian Aizawl atanga lo pheiin Thenzawlah tukthuan a ei ang a, Zote-ah VC leh Party hruaitu te nen meeting in Chhipphirah zan a riak ang. Naktuk chawhma lamah Bualpui V-ah VC te leh Party hruaitu te nen inkawmin zan dar 8 velah Lunglei a rawn lut ang. Ruahman dan chuan Zirtawpni a MFA Cup final Thuamluaia muala neih tur kharna hunah khuallian a ni ang, Inrinniah Birla Heart Reserch Centre, Kolkota leh Christian Hospital Serkawn ten Free Clinic an neih a hmanpui ang., Inrinniah Aizawl a pan leh ang.
** Naktuk atangin Camping nei dawn:     Lunglawn Baptist kohhran chuan M&E hmalaknain Nghalimlui Chakma kohhranah Salvation Camping naktuk atang hian an buatsaih dawn. Speaker atan Upa N.Taithanga hmangin, Longpuighat Chakma Evan.Team, Nghalimlui leh Vathuampuia BCM Missionary-ten an tawiawm ang.
** School-ah hnamlam an zir:     Govt Leitlangpui HSS chuan thawhtanni atang khan an School-ah Special Camping for Cultural dance neiin hei hian tunkar Zirtawpni thleng hi a awh dawn a ni. Hetah hian an School naupang mi 150 bawr vel ten Mizo hnam lam hrang hrang an zir a, a hlawkthlak hle niin an Zirtirtu te chuan an sawi. He Programme hi NSS Unit leh Art & Culture Deptt. tangkawp a buatsaih a ni.

Prince William leh Kate te Nakum April 29-ah an innei dawn

Prince William leh Kate Middleton te chu nakum April 29 a innei tura tih a ni ta a. He mi ni chiah kum 66 kalta 1944-ah khan Hitler leh Eva Brawn te an lo innei tawh a; England hmelma Hitler a nupui neih ni chiahah England lal la ni turin nupui a nei dawn a nih chu. April 29 hi ni chhinchhiah tlak tak a ni hrim hrim a, kum 1930 khan Britain leh Australia inkara phone link ni a ni.
An inneihnaah hian sawm zau an tum a, mipui pawh a maktaduai tel an tel tura ngaih a ni. Street party te a awm ang a, Britain a pop star hovin concert an siam dawn bawk a, a pui thei ang berin inneih ni hi hman a nih dawn avangin sum pawh a ral hnem viau ang.

Khawvel puma hmeichhe inchei thiam berah Alexa Chung an thlang

Teen Vogue magazine in kumina khawvel puma hmeichhe inchei thiam thlanna a buatsaihah chuan Agyness Deyn, Katy Perry leh Kristen Stewart lehpal vekin Alexa Chung chu inchei thiam berah thlan a ni. A mah hi TV presenter leh model a ni a, DKNY Jeans leh Pepe Jeans ten an thawmhnaw siam fak lartu a tana an hman mek a ni a, tunhnaiah magazines lar tak tak Vogue leh Harper's Bazaar ten cover girl a tana an hman a ni.

Manchester United lakah Gunners laipui mu atlawlh leh ta

He inkhel hrim hrimah hian United lam hian game an thunun zawk hle a. A pumpui thuah United hian 51% ball an chan laiin Arsenal hian 49% an chang ve thung a. Goal zawnah tum 10 zet United-in shoot an nei a, Arsenal hian tum 6 neiin, United hian Corner tum 5 an hmuh laiin Arsenal hian tum 4 an hmu ve thung a ni.
Manchester United tan hian Park Ji Sung chuan minute 41 naah mawi zetin a head goal a, hei bakah hian goal thun theihna chance tha tak tak an hloh mai piah lamah tun season-a goal thun thei lo tak Rooney chuan Penalty an hlawhchhuah pawh goal-ah chantir zo lovin a pet over luah a ni. Hun chanve hnu lamah hian Arsenal hian an si phurh sut tumin an nawr na angreng hle a. Mahse, goal an thun theih tak loh avangin United hian 1 - 0 in hnehna hi an chang ta a ni.