Champions League Semi Final-ah Bayern Munich in Lyon 1 - 0 in hneh

Champions League Semi Final nizan hmasa khan 1st leg khelh zawh a ni ta a. English Champion Quarter Final atanga lo pet thla tawhtu, Bayern Munich chuan an mikhual Lyon chu 1 - 0 in an lo hneh a ni.

He inkhel hi game a tang tha et awtin an game play a hmuhnawm hle. An inhnehtawk em avangin inkhelh hun chanve chhung phei chuan a tu lam ve ve mah hian goal an thun thei lo ve ve nghe nghe a ni.

Hetianga inhnehtawk tak an nih naklai hian inkhel tan atanga hun chanve em pawh a la zawh hma, minute 36 naah Bayern Munich thiampuipa Ribery chu Red Card hmanga hnawhchhuah a ni zui nen. Lyon hian hnehna an chan theih mai a rinawm hle a. Mahse, hun chanve chhung hi chuan goal a lut ta chuang lo a ni.

"Kan police te hi an chhuanawm a, a chhawrtu leh enkawltuten an zir chuan tha taka hnathawk thei an ni" - R. Lalzirliana, Home Minister

Vawiin April ni 14 April chawhma dar 11:00 khan Lunglei rawn tlawhtu Pu R. Lalzirliana Home Minister chuan Congress Bhawan tlawhin a puala vantlang in

khawm buatsaih Pu C. Robuanga Vice President LDCC kaihhruai chu hmanpuiin thusawina a nei.

Home minister Pu Zira chuan thusawiin, kan ho tuten an lo sawi tawh angin Lunglei hi Mizoram kawtchhuah tur a ni a, inthlan dawna mipuite hnena au hlaa kan lo hman tawh a nih avangin tunah hian hetiang dinhmuna a din theihna turin hma lak mek a ni a ti a, Tlabung Border Trade tihpitlinna tur te, chhimtuipui khuap a, Lawngchawlhna hmun tur Akyap buatsaih mek a nih bakah kawng hrang hrangin hmasawnna tur hmachhawp tam tak a awm a, alo puitlin hunah chuan chhimlam hian hmasawnna nasa tak kan nei dawn a, sum tam tak kan Lunglei khawpuiah ngei hian a la chambang dawn a ni a ti.

Chief Minister Lungleiah a lo kal dawn

Kar leh thawhlehni April ni 20 hian Chief Minister Pu Lal Thanhawla chu Lunglei a lo kal dawn a, Chanmaria Horticulture Division Office sak thar hawngin khuallian a ni ang. He Office sak thar hawnnaah hian Horticulture Minister Pu H. Liansailova, chu khualzahawm tura beisei a ni bawk.

YMA General Conference Souvenir buatsaih chungchang rel dawn

Tunkar zirtawpni chawhnu hian YMA Sub-Hqrs Lungleiin kumin October thla a, Mizoram pum huap General Conference Thuam luaia Mual Lungleia an dawl tur chungchanga Souvenir Committee chuan YMA Office Venglaiah, an Chairman Dr. J. Zorema hovin Committee neih an tum a, kumin hi YMA Platinum Jubilee (Kum 75-na) kum a nih avangin Souvenir changkang tak an ni Committee hian buatsaih an tumin, Souvenir buatsaih dan tur chungchanga hmalak dan tur leh ruahmanna hrang hrang siamin, YMA General Conference Organising Committee hnenah an ruahmanna te hi an thehlut leh dawn a ni.

Sports Minister Pu. Zodintluanga'n a bial a fang

Sports Minister Pu Zodintluanga chuan tunlai hian a bial chhung a fang mek a, nimin khan Buarpui, Bungtlang 'w', Changpui leh Lungchem te tlawhin Thenhlumah a riak a, vawiin hian Tleu leh Bunghmun a tlawh leh a nga, naktukah Bolia, Tuisenchhuah leh Zawlpuite tlawhin Zawlpuiah hian zan a riak ang. Naktip hian Pangtlang, Putlungasih, Kauchhuah, Belthei, Phairuangkai leh Lungsen te tlawhin Lungsen ah zan a riak anga, zirtawpni hian Chhumkhum leh Rangte te tlawh lehin Lunglei panin a rawn kal leh ang.

Inter Deptt. football tournament April ni 27 atangin nei dawn

Inter Department Football Tournament chu April ni 27 atang hian Thuamluaia Mualah khelh tan a ni dawn a, he Tournamentah hian Lungleia Department hrang hrangte inkawpin Team 24 vel lai chhuak tura ngaih a ni. Naktip zirtawpni chawhnu dar 1:00 hian he Tournamnet a tel tur Department hrang hrangte hian Circuite House Conference Hall ah Tie Draw an nei dawn a ni.

Health Minister Pu. Lalrinliana Sailo Kawrpuichhuah ICP tlawh turin lo kal

Health Minister Pu Lalrinliana Sailo chu vawiin hian Aizawl atangin Lunglei panin a rawn phei dawn a, Tlabung lam pana chhukin Kawrpuichhuah Integrated Check Post (ICP) bakah Trade Fascilitation Centre Tlabung, Tlabung Hospital leh Leprosy Hospital Tlabungte tlawhin naktip hian Aizawl panin a kir leh ang.

DCSO Lunglei hnuaiah Buhfai thla tin 17, 872.46 qts mamawh

Lunglei DCSO Lunglei hnuaia thlatin a Buhfai mamawh zat chu hetiang hi a ni Quintal bi zelin, Lunglei APL- 4,711.12, BPL-585.80, AAY- 280.00, Annapurna- 7qtls, A vaiin 5,581.92, Tawpui ‘S’- APL-195.32, BPL-77.70, AAY-42.00, Annapurna- 1.70, Haulawng- APL-162.64, BPL-72.45, AAY-71.40, Annapurna- 2.50. A vaiin 308.99, Mualthuam - APL-94.48, BPL-52.50, AAY-56.60, Annapurna- 2.00 a vaiin 204.98, Lungsen- APL-352.40, BPL-157.50, AAY- 87.50, Annapurna-3.00, a vaiin- 600.40, Putlungasih- APL-534.16, BPL-99.75, AAY-70.00, Annapurna- 2.50, a vaiin- 706.41, Tuichawng- APL-721.16, BPL-140.00, AAY-73.15, Annapurna-2.00, A vaiin- 936.31, Tlabung- APL- 1,017.80, BPL-245.00, AAY-133.00, Annapurna- 4.00, a vaiin- 1,399.80, Borapan sury- APL-601.04, BPL-68.25, AAY-91.00, Anna purna- 2.00, a vaiin- 762.29, Chawngte- APL-2,155.20, BPL-280.00, AAY-168.00, Annapurna-4.00, a vaiin- 2,607.20. Hnahthial- APL-1,608.64, BPL-309.05, AAY-138.60, Annapurna-4.50, A vaiin 2,060.79, Tarpho- APL-87.76, BPL- 21.00, AAY-35.00, Annapurna- 1.50, a vaiin 145.26, S.Vanlaiphai- APL-422.40, BPL-70.00, AAY-70.00, Annapurna-2.00, a vaiin-564.40, Sangau- APL-1,124.00, BPL-133.35, AAY-80.50, Annapurna-2.00, A vaiin- 1,339.85, Lungtian- APL-265.36, BPL-28.00, AAY-42.00, Annapurna-1.80, a vaiin- 337.16, Lunglei DCSO hnuaia thlatina Buhfai mamawh zat chu APL- 14,053.16, BPL-2,338.35, AAY-1,438.15, Annapurna- 11.80, A za vaiin 17,872.46 qtls mamawh thin a ni.

LDSC buatsaih Decathlon Competition Thuamluaia Mualah nei dawn

LDSC buatsaih Decathlon Competition chu April ni 15 leh 15 hian Thuamluaia mualah neih a ni dawn ta a, hetah hian Athlete Item 23 hmangin intihsiak neih a ni dawn a ni. A hawnna hun hi zing dar 10:30-ah neih a ni ang a, Pu. K. Zothankhuma, Vice Chairman LDSC in kaihruaiin, Pu. J. Ropianga Chinzah Secretary LDSC in thusawina hun a hmang ang.

Commonwealth Games meichher Lungleia tlanpui tur chungchang rel dawn

Commonwealth Games vawi 19-na chu kumin October ni 3 – 14 hian New Delhi-ah a vawikhatna atan neih tura meichher chu Mizoramah Manipur atangin July ni 28, 2010 zing dar 10:00-ah helicopter-a phurh thlen a ni ang a, Lungleiah a kal hmasa phawt ang. Lungleiah he meichher hi mi thlanbikten Lunglei Helipad atangin Thuamluaia Field thleng an tlanpui dawn a ni. DC Lunglei hova cultural programme-te an neih zawh hnuin Aizawl-ah lokir lehin Zemabawk Helipad-ah Queen’s Baton Relay Committee-ten an lo dawngsawng dawn a ni. Hemi chungchang hi Queen’s Baton Relay Committee Lunglei chuan naktuk hian an Chairman Lunglei Bawrhsap hovin a Office chamber-ah an rel dawn.

Lunglei - Thenzawl - Aizawl kawng siam tha lo ZDU in a ngaimawh

Vawiin tlai khan Zoram Driver’s Union (ZDU) sub. Hqrs. Lunglei hruaitute chuan an Office-ah tualchhung chanchinthar lakhawmtute kawmna hun hmangin, he hun hi, Pu. C. Lalhnehzauva, President, ZDU Sub. Hqrs. Lungleiin a kaihruai a ni.

He hunah hian ZDU hruaitute hian Lunglei - Thenzawl - Aizawl kawng siam mek chungchanga an hnathawh dan tha leh kawng siam nana an hmanrawn hman tha tawk lo nia an hriat chungchang Press mite hi an hrilh a ni.

He kawnga Culvert an siam thenkhatah te chuan Balu tha hmang lovin, Balu leh lei an chawlhpawh thu an sawi a, hei bakah hian Zotui kawng phei siam meka leivung an dahte chu ngaihmawhawm an tih thu an sawi. Hei bakah hian tunlai hian Zotlangah pawh Balu tha lo an chhek mek niin an sawi bawk.

Pu. S. Laldingliana Parliamentary Secretary in Thuamluaia mual a tlawh dawn

S.Laldingliana Parliamentary Secretary chuan naktuk hian Tennis Court leh Thuamluaia Mual a tlawh anga, atuk Thawhlehni hian Lungrang pana chhukin Lungrang Community Hall hawnna-ah te, Chawngte Group YMA Conf-ah te khuallianah a tang ang. Nilaini zingah Lungrang atangin Chawngte a pan anga, Chawngte L- Gulsil Road leh Chawngte L Community Hall a hawng anga, hemi ni vek hian Zehtet panin Rualalung Play Ground te Zehteta Health Clinic Centre te a tlawh ang a, tun thla ni 15-ah Lunglei panin a rawn chho ang.

Bangladesh High Commissioner Lungleiah a lo kal dawn

April ni 18 hian Bangladesh High Commissioner Tarig A. Karim chu Lungleiah a rawn kal dawn a, Lungleiah zankhat a riah hnuin, Tlabungah a chhuak a, Mizoram leh Bangladesh insumdawn tawnna tura ruahman Kawrpuichhuah a tlawh ang. Hemi hnu hian Tlabung atang hian Aizawl panin a kir leh nghal dawn a ni.

Jeevan Raksha Padak Award Joseph Vanlalhruaia Farmveng hlan dawn

Naupang huaisen chawimawina Jeevan Raksha Padak dawng tura thlan, Joseph Vanlalhruaia s/o K. Pazawna Farmveng Aawrd chu DC Lunglei hnenah a rawn thleng tawh a, he chawimawina hian Award bakah tangkafai Rs 30,000/- a keng tel a ni.

Joseph Van lalhruaia hian, kum 2008, September ni 20 khan Nghasih luiah Vanlalruati, D/o C. Lalrem siami tui tla chu a nunna thapin a chhanchhuak a. Amah Joseph-a hian tuihleuh pawh thiam lovin Vanlalruati tui tla a hmuh hian tuiah chuan zuang thlain, Vanlalruati hi a chhanchhuak a, mah zawk chu midangten an chhan chhuak ve leh zawk a ni. Hetianga mahni nunna thapa naupang a chhan chhuah avang hian he chawimawina hi hlan a ni dawn a, Republic Day-ah he chawimawina hi hlan tur anih laiin, a dawn tur Award hi a rawn thlen hman tak loh avangin hun remchangah he Award hi hlan a ni dawn a ni.

Lungleiah March thla chhungin motor 92 register a ni

Nimin thleng khan DTO Office Lungleiah motor number 9265 thleng register tawh a ni a, ZRM /ZRG hunlai atang tawha chhut chuan motor hi 13363 Lunglei District-ah a awm tawh a ni. March thla chhung bika motor Register dan dinhmun chu hetiang hi a ni. Motor Cycle - 39, Scooty - 8, LMV (Car) - 17, Motor (Cab) - 4, Maxi Cab - 1, Gypsy - 1, Auto Rickshaw - 3, Light Commercial Vehicles - 7, Heavy motor vehicle - 7, LMV (J) - 5 niin a vaia March thla chhunga motor register zat hi 92 a ni.

Inter Village Football Tournament Pre Quarter Final khel dawn ta

Vawiina Inter Village Football tournament khelah result hetiang hi a ni. Ramtharveng 2 - 1 Rahsiveng, Hauruang 2 - 1 Bazar ‘B’, Pukpui 3 - 6 Bazar ‘A’, Zohnuai 0 - 4 Zotlang. Naktuk, Zirtawpnia Pre quarter Final inkhel leh turet chu hengte hi a ni. 1st match 9:00-ah Hnahthial Vs Bualte, 2nd match Farmveng Vs Rahsiveng, 3rd match Tlabung Vs Sethlun, 4th match Collegeveng Vs Bazar ‘A’ te a ni.

Naktuk hian LDFA in a buatsaih Under 16 football tournament Final Venghlun leh Bazarveng ten an khel dawn a, Closing function hi tlai dar 3:00 atanga tan a ni ang a, kick off 3:30-ah neih a ni ang. Khuallianah Pu. J. Ropianga, DS&YO hman a ni ang.

YMA General Conference Lungleia neih tur nghahna tur mual chungchang rel dawn

Zirtawpni chawhma dar 11:00 hian Lunglei District Sports Committee (LDSC) leh YMA Sub Hqrs. Lunglei O.B te chuan D.C Office Chamber-ah Joint Meeting an nei dawn a, hetah hian kumina YMA General Conference, YMA Sub Hqrs. Lungleiin an dawl tur nghahna hmun atana Thuamluaia Mual hmang tura an dilna chungchang an sawi ho ang.

MJA Lunglei General Meeting nei dawn

Tunkar Inrinni tlai dar 2:00 hian MJA Lunglei General Meeting, DC Lawn-ah neih a ni dawn a, tlaiah zanriah an kilho nghal dawn a ni.

Messi goal 4 thun hmangin Barca-in Arsenal Champions League atangin an petchhuak ta

Nizan khan Champions League Quarter Final match 2 khelh a ni a, Champion lai Barcelona chuan English Club Arsenal chu 4 - 1 a hnehin Semi Final an inhlangkai leh ta a. 1st leg an lo khelh tawhah an ni club hnih hi 2- 2 in an lo indraw tawh a. Hetianga Arsenal 4 - 1 tehmeuha Barca lakah an tlawm leh takah chuan goal aggregate 6 - 3 laiin Barca lakah hian an tlawm a ni.

He inkhelah hian Barca hian naupang hmuiah chithlum tahsak teh ang ti niawm takin, minute 19 naah Bendtner chuan Arsenal tan hian goal a rawn khung a. Mahse, Barca hian si phurh rei an tum lo hle mai pawh ni lovin hnehna chan chu an thil tum a ni tlat si.

“Kan hrawn lai Congress Party hi hmaithinghawng vuah an ang ka ti" - Lawmawma Tochhawng, President, MNF Sub. Hqrs. Lunglei

Vawiin chawhnu khan Pu. Lawmawma Tochhawng, President, MNF Sub. Hqrs. Lunglei chuan a Office-ah Press mite kawmin thingpui a inpui a, he hunah hian MNF sub. Hqrs. Lunglei hruaitu thenkhatte bakah, Pu. C. Lalrinsanga, Dy. Speaker hlui pawhin a telpui bawk.


Pu. Lawmawma Tochhawng chuan, “Kan sawrkar hrawn mek hi fakna tur a awm a, selna tur pawh a tam hman hle a, kum 1 leh thla thum chhung hian, Lunglei Dist. Rulling MLA te phei chu ram pum huap pawha che tha tak tak leh mit la tak tak an ni hlawm a, a lawmawm ka ti. Kan Dist. ngaihtuah tak maia, Saitluk Airport tih puitlin theih nana Private Resolution an put luh, an pass ta te kha a ngaihnawm a, a tak ram a nghahhlelhawm a ni. Copter, thla 3 hnua service tir turte pawh kha a finthlak a, kan tangkaipui phian mai thei, thu chauh anih loh hram ka beisei a ni” a ti.

VC thlan thar tura ruahmanna an duh loh thu DC hnenah an thlen

Lunglei District huamchhunga VC thlan tharna tur Rotlang ‘W’-leh Malsury-ah te VC member atan thlan ngai lova sawrkarin mi thenkhat a dah chungchangah MNF Sub Hqrs. Lunglei chuan an duh loh thu lehkha siamin Lunglei District D.C hnenah an thehlut a. He an lehkhaah hian thil dik lo lian tak bakah, democracy palzutna tha lo tak a awm nia an hriatthu an ziak lang bawk.

Hetih rual hian Lunglei District mai bakah, Kolasib District-ah pawh Kolasib VC-II Venglai member ni lai Rolianpuia, Project veng, Kolasib VC member atana sawrkarin thlan ngai lova an dah chungchang hi MNF Gen. Hqrs. chuan High Court-ah a thlen tawh a, vawiin hian High Court-ah hemi chung changah hian Hearing an nei dawn nia thudawn a ni bawk.

YMA Sub. Hqrs. Lunglei Office hawng dawn

YMA Sub. Hqrs. Lunglei Office chu April ni 6 naktuk hian hawn a ni dawn a. He hun hi Session hnihah then a ni dawn a, I session Pu. R. Chhuanvawra, Vice President YMA Sub. Hqrs. in a kaihruai ang a, II Session hi Pu. P. Lalhmangaihzuala, President, YMA Sub. Hqrs. in a kaihruai ang. YMA Office thar hi Pu. C. Zoramliana, Vice President, CYMA hawng tura tih anih laiin tunhnai khan ani hi a boral avangin Pu. Lalbiakzuala General Secretary in a hawng ta zawk dawn a ni. Tlaiah ruai an theh nghal ang.

Lunglei District-ah NREGS ni 100 inhlawh thei dawn

Pu V.LalsanglianaProject Director DRDA Lunglei hnen atanga kan thu dawnna in a sawi danin, Lunglei Bawrhsap leh DRDA lama hotute'n thahnem ngai taka an nawrna leh an hmalakna avangin, Lunglei Dist chuan NREGS hmanga ni 100 inhlawhna tur sum a dawngkim ta a, hun reilote chhungin, mipuite hnenah inhlawhfakna tur pekchhuah leh thuai an tum a ni.

LDYCC in hruaitu thar thlang

March ni 31 khan Lunglei Dist Youth Congress Comtt. chuan IIDC Pukpui ah Special Convention neiin, hruaitu thar an thlang nghal. He hun hi Pu Laltlankima Pautu LDYCC president chuan kaihruaiin, Aizawl lam atangin, Pu Albert. Lalthla muana MPYCC president in a rawn hmanpui. heng mite hi hruaitu atan an thlang. President ah Lalrinmuana, vice President- Darnghilh lova, leh Tresurer atan P.C Liankima te an thlang a ni.

Power Supply mumal loh avangin nunphung a khaihlak

Tunhnaia Lunglei khawpui leh a chhehvel ruah leh thli nasatakin a nuai avangin, Lunglei khawpui ah Power Supply nihnih chhung deuh thawh a tawp a hemi avang hian nunphung a khaihlak nasa hle. Kan thu dawnna in a sawi dan chuan tunhnaia thli leh ruah nasa tak lo thleng avang k

han Lunglei khawpui chhung leh Mizoram hmun hrang hrangah Power line chhia a nasa hle a, Khawiva Power Sub Station chu a chhe bawk a, nimi lam thleng khan Deptt thawktu te chuan Power supply a awm theihna tur hian theihtawp an chhuah zel a ni.

Pawisa note lem engtin nge i hriat theih ang?

Mizoramah pawh Pawisa lem man chhuah sawi tur a awm ta zeuh zeuh a. Pawisa lem thenkhat phei chu a tak ang tak takte a ni hlawmin, mi thenkhat tan phei chuan a lem nge a tak tih pawh hriat mai harsa angreng tak a ni. Pawisa lem chungchangah mipuite kan fimkhur theihna tur leh pawisa lem leh a tak kan hriat theihna tura thil pawimawh thenkhat ka hriat ang angte ka han ziak lang ve hrim hrim duh a ni

Entirnan Rs 500/- note bikah, a lai taka Rs 500/- tih inziak chu a hring a ni thin a, han lek kualin a note takah chuan Rs 500/- tih inziak chu a rawng dangin a lang thin a, a lemah chuan pawisa note han lek kual pawhin a rawng a danglam ve thei lo a ni a ti.