Chhungpui nu Angelina Jolie bual inah chiah hun thawl a nei

    Hollywood actress lar Angelina Jolie (35) chuan an chhungkua buai zia sawiin inbualna pindan bakah chuan a mala awm lai a nei ngai lo niin a sawi. Jolie leh a pasal Brad Pitt te hian hnam hrang hrang fa a an lakte nen tunah hian fa paruk an nei  a, chhungkaw lian leh chhanchhe tak an ni mek. An buai zia sawiin, 'Zingah ka han tho a, naupang pali buaipui nghal a ngai a, Brad an pahnih a enkawl a, phone lokal a chhang bawk a, thawh veleh atangin kan buai nghal a, Brad hian min pui nasa em a, a zia zawk a ni' a ti.

Hlauhawm film zinga hlawhtling ber SAW

    Hlauhawm film siam tawh zinga hlawhtling berah SAW an thlang. Guinness World Records chuan film hlawhtling berah thlangin he film producer Mark Burg  hnenah Zirtawpni kalta khan award an hlan. Saw film hi paruk siam a ni tawh a, heng ho film sum lakluh belhkhawm hi $ 733 million a tling. Kum 2004 atang khan Saw film hi siam tan a ni a, a khat tawkin film dang tihchhuah zel a ni a, kumin tawp lam hian a film 7na leh a tawpna tur chu tihchhuah a ni dawn. Saw film baka hlauhawm film hlawhtling leh sum lalut hnemte chu  Halloween (10 films, 1978-2009) - $367m, A Nightmare On Elm Street (nine films, 1984-2009) - $447m, Friday the 13th (12 films, 1980-2009) - $465m, Scream (three films, 1996-2000) - $507m.

Kim Kardashian in a mah anga insiam tum ti lo turin a ngen

    Kim Kardashian fans pakhat chuan, a pasalin a then dawn nia sawiin Kim Kardashian ang turin plastic surgery tih a tum a, hemi thu hi hriain Kim chuan a fans hnenah ti lo turin thu rawn a pe. He nu hian a taksa pumin plastic surgery chu tih a tum a lo ni a, Kim chuan, ti lo hram tura ngenin, 'I pasal chuan i nih ang ang khan a hmangaih ang che. I nalh tawk alawm, midang an tum zawng a tha love' tiin, Midang an tum tur a ni lova, mahni nih ang ang hian hlim a lungawi tur a ni, hei hi midangten min ngaihsan a min zahna chhan pawh a ni zawk e, a ti.Ngen hlawhtling tak ang maw?? A pasal hnenah a ngen a ngai veleh maithei a ni.

Carles Puyol-'n International Football chawlhsan ta

    Spain defender tangkai, kumina final an luh theihna chhan Carles Puyol chuan international football a chawlhsan dawn ta a, Spain tana a khel kan hmuh hnuhnung ber chu kumin World Cup final kha a ni ta reng mai. Kum 32 a upa a ni tawh a, Barcelona club-ah in hman pumhlum a duh tawh a, Captain a nih avangin a mawhphurh na tha taka hlen a tum a ni. Ram tan vawi 90 a khel tawh a, kum 2000 November thla a Netherlands nen friendly match khel tumah Spain tana khel tanin a hun tawpah pawh Netherlands khel bawk a hmang leh ta a ni.

British olympic designer-ah Stella McCartney a tang dawn

    Sir Paul McCartney a fanu hi designer lar tak a ni a, a pa zaithiam lar a nih vanga lar ve mai mai erawh a ni hauh lo. A pui zia lanna chu : Kum 2012 a Olympic Games lo awm turah Adidas chuan creative director a tan an hmang dawn a, British Olympic team leh Paralympic teams te chuan inthuamna tur pawh a design ngat an hmang dawn a ni.
Tun hmain official kit design tur hian hetiang hian hman a la awm ngai lova, Stella McCartney an hman tlat danah hian designer-ah chuan a tha ber zinga mi a nih zia a tarlang chiang viau a ni.

Lunglei Civil Hospital RKS Governing Body meeting D.C Office Chamber-ah neih a ni.

Vawiin khan Lunglei Civil Hospital RKS Governing Body meeting D.C Office Chamber-ah neih a ni. Meeting hi Governing Body Chairman Pi M.Zohmingthangi'n  kaihruaiin, Parliamentary secretary Pu S.Laldingliana leh HPC Vice Chairman Pu Joseph.Lalhimpuia te pawh an tel a ni. Vawiin meetingah hian, Lunglei Civil Hospital dinhmun leh mamawh chi hrang hrang an neih dan te chipchiar takin sawiho a ni a, heng zingah hian Ashma enna khawl, Xerox Machine, I.T Facilities leh hmanraw dang engemawzat chu RKS Fund atanga lei nise an ti a, heng hmanraw leina tur hi sum neihsa atangin a rang lama lei thuai nise an ti a ni.  Vawiin a meetingah hian Lunglei Civil Hospital a RKS Governing Body member  te bakah tlawmngai pawl hrang hrang aiawh leh S.P Lunglei te an tel a, he huna kalkhawm member te chuan Lunglei Civil Hospital in mamawh chi hrang hrang a neih dan te leh ngaihtuah tul an tih thu sawi langin, a bik takin thawktu hniam ber atanga Doctor thlenga indaihlohna nasa lutuk  a ziaawm theih nan chak zawka hmalak leh nise tiin, thawktu indaihlohna hi a changtu Minister hnenah thlen nise, a copy pawh Health deptt changtu Parliamentary Secretary leh HPC Vice Chairman te pek bawk nise an ti a ni. He huna telve Pu S.Laldingliana leh HPC Vice Chairman Pu Joseph.Lalhimpuia te pawhin Lunglei Civil Hospital hmasawnna tur atan theihtawp an chhuah ve thin thu leh hmasawnna pawh engemawzat a awm tawh thu sawiin, duhthusan erawh a la  niloh thu an sawi a, thawktu indaihlohna chungchangah pawh theihtawp chhuah a hmalak leh an tum thu vawiin meetingah hian an sawilang bawk a ni.

Shah Rukh te chhungkua Shakira fans damchhungin an ni dawn tlat mai

    Coumbian singer Shakira hian khawvel hmun hrang hrangah a maktaduai tel fans a nei tawh a, kumin World Cup a Waka Waka avang pawhin a neih belh nasa a, Bollywood superstar Shah Rukh Khan pawh a fans zinga mi niin a mah chauh ni lovin a nupui fanau te nen damchhunga Shakira fans an nih tur thu an sawi mawle. South Africa World Cup lai khan Shah Rukh te hi an chhungkuain an kal a, hetah hian Shakira chu an hmu a, a ni hian tha deuh maiin a fate chu a lo lawm a, an ngaihsan tawh nak a laiin a lo dawngsawng tha bawk si a, an lawm hle a, chuvangin Shah Rukh chuan an damchhunga a fans an nih tur thu a hrilh hial a ni.

Casillas a bialnu Sara Carbonero a lar zual sauh

    World Cup a Spain keeper Iker Casillas ( WC a goalkeeper tha bera an thlan) hi upa fu tawh mahsela, pawmlai nei a la ni lova, Spanish network pakhat Telecinco a reporter
Sara Carbonero nen erawh an in zui ngun hle thung a, he nula hian Spain keeper hi World Cup-ah a chet that tir theih loh phah te pawh an lo hlau rum rum thin a ni. Mahse, Casillas best keeper a thlan a nih danah hian a football khelah a ti buai lo mai ni lovin a puitu tha tak ni zawka ngaite pawh an awm leh tawh a ni.

Kate Winslet leh Aishwarya Rai ten shooting an nei dun dawn

    Bollywood actress, Miss World nihna pawh lo hauh tawh, Aishwarya Rai leh Titanic star Kate Winslet te chuan shooting an nei dun dawn a, Aishwarya  a phur khawp mai. Kate Winslet hi actress zinga a ngaihsan a ni a, a channa film pawh a hmaih ngai lova, hetianga shooting an han nei dun tur hi vannei a inti khawp mai.
    Shooting an neih tur hi film a ni dawn lova, fakna pakhat atan a ni zawk dawn a ni.

Drew Barrymore in kum 35 hnuah kawppui nei lova awm nuam a ti

    Hollywood star lar Drew Barrymore chuan kum 35 a tling tawh a, pasal a la nei lova, tunhnai mai khan a boyfriend Justin Long nen an inthen lehnghal. Daily Express in an kawmnaah Drew chuan, Kum 35 mi i ni tawh a, kawppui nei lovin i la awm a, i duhthlanna a ni ang. Chu chu duhthlanna fel fai leh dik tak a ni, a ti. A upa tawh bawka a duh tui hle tawh a ni ngei ang, mi diklo tak nena runhmun len hi ka hlau tlat, a ti. Kawppui nei lova zalen taka nun chu nuam a tih thu a mah kawmtu te hnenah chuan a lo hrilh.

Kum 22 hnuah Kylie in UK No.1 nihna a hauh leh ta

    Zaithiam Kylie Minogue chuan UK Album chart-ah No.1 dinhmun a luah leh ta a, No. 1 a neih hmasak ber atangin kum 22 a ni der tawh a, a album ‘Aphrodite’ hi a studio album 11na a ni a, heta dance track ‘All The Lovers’ chu singles chart-ah chuan No.9na a ni.
    Madonna lo thawhpui tawh thin Stuart Pearce  chu he album executive producer a ni a, hlaphuahtu zingah pawh a tel. Scissor Sisters star Jake Shears, Calvin Harris, Nerina Pallot leh Tim Rice-Oxley te pawh hlaphuahtu zingah an tel.
    Kylie chuan hetia a album a hlawhtling chho ta em em mai hi a rin phak bak a nih thu a sawi a, he album a hlate chuan mi tam tak a lam tirin a chet tir tura a ngaih thu a sawi a ni.

Ronaldo fa neih in a bialnu a barakhaih nasa

    Portugal Football star Cristiano Ronaldo an fa a neih thu puanchhuah a ni thut chuan, mi tam tak a barakhaih a, mak ti bertu chu a bialnu model Irina Shayk a ni a, a phawk hle. A hmain engmah hriat lawk a nei si lova, a han hria kha a tap pur mai, an ti. Naute nu hi tunge a nih hriat mai theih a la ni lo na a, Portugal chanchinbu pakhat Diario de Noticias chuan nikuma Ronaldo chawlh hmanna San Diego-a nu pakhat laka mi a ni, a ti.
    Hetia Ronaldo fa neih thu a tlangthan hnu hian Ronaldo leh Irina te chuan inthen zai an rel chuang lova, an in kungkaihna tihngheh sauh sauh an tum a, World Cup atanga Portugal an tlak hnuah an pahnih hian zan lamah khawi khawi emawa an inzui hmuh tur a awm reng a ni.

Lunglei Police ten Parvon Spas mum thahnem tak an man

    Nimin khan Lunglei police te chuan Vanlalremi D/o Lalrinthanga Venglai hnen atangin Parvon spas mum 115 an man sak.
    Nimin vek khan Lunglei Police te hian Hrangchalkawn-ah Sumo atangin Parvon spas mum 7237 Lalchhanhima S/o Zohmingliana Chaltlang lily veng hnen atangin an man sak bawk.
    Lunglei police te hian ti hian kar hmasa ningani atanga nimin thleng khan Parvon spas mum 17607 man tawhin, heng hi Lunglei local rate-ah chuan Rs. 3,52,140 man hu vel a ni.

BSF ten tanpuina Computer set pe

    Nimin chhun dar 12:00 khan Civic  Action Prog. hnuaia BSF 142Bn. Melte a mi ten Mahila Chakma Samiti (Chakma Hmeichhe Pawl) Nunsury leh Govt. Middle School Khojoysury te hnenah BSF. DIG ML.Batham  Aizawl chuan  Computer set khat ve ve a hlan.
    Thusawiin ML. Batham chuan hetiang Prog. hi hmun hrang hrangah pawh an hman thin thu leh Self  Employment leh naupangte zirna atana hman tangkai tur a nih thusawiin, mamawh nei chuan an hnena thlen thin tura ngenin, hetiang lam atan hian BSF hian sum thahnem tak kum tin a nei thin a ni tiin, Nunsury Chakma hmeichhe pawl te hnenah hian puanthui khawl pawh thahnem tak an lo pek tawh thu a sawi bawk.

Lunglei Dist. atanga Bru raltlan chhungkaw 209 lo kir leh dawn

    Nimin khan Lunglei District atanga Tripura-a Bru raltlante lo kir leh dan tur chungchang Addl. DC Pu T. Lalduhawma hovin ngaihtuah a ni a, Bru raltlante hi chhungkaw 209 niin member 2000 vel bawr ni tura ngaih a ni a, hetih rual hian lo indang tawhte an awm takah tiin, chhungkaw 250 vel lo let leh tur anga ruahmanna kalpui nise an ti a ni. Bru raltlante hi Lunglei District chhunga khaw 7, Zehtet, Buknuam, Putlungasih, Sihphir Tlang, Dinthar, Chawilung leh Zohmunahte dah nise an ti a, heng khaw hrang hranga, chhungkaw dah zat tur chungchang hi DLAO in lo enfiah hmasa se an ti a, DLAO in enfiah a neih zawh hnuah Meeting neih leh tur a niin, Line Department lamin Bru raltlante an lo kir leh huna tui, ei leh in, chenna In leh thiltul dang hrang hrangte chungchangah Detail Project Report (DPR) an siam leh dawn a ni.

Dist. dang lirthei Lungleia awmte Register thar vek tur a ni

    Pu CC. Lalchhuangkima DTO hnen atanga thu kan dawn angin, Lunglei District chhunga District dang lirthei chu July thla chhung ngei hian an Motor,  DTO Lungleiah register tha vek turin a hriattir nawn leh a ni. “The Motor Vehicle Act 1998 Sec- 42, 43, leh 60 in a sawi angin Motor neitute reng rengin an lirtheite an awmna District chhungah an register ngei ngei tur a ni a, Motor Vehicle Act 1998 Sec 53 in a sawi angin heng in register lo te hi Registering Authority in a hrem thei a ni a ti bawk. Sec-53(sub-no.4) chuan heng ang Motor an hrem te reng reng hi an Registration Certificate, Registering Authority-ah an thehlut ngei ngei tur a ni a, thla ruk aia rei hrem a nih phei chuan an Motor Registration Certificate an cancell sak ngei ngei tur a ni bawk.
    District danga Motor Register-te hian an lo Register hmasakna hmunah Road tax an pe tawh a nih chuan an pek nawn leh kher a ngai tawh lova, DTO atangin Temporary Certificate an pek chhuak mai dawn thu leh, a hun a tawp hnuah Registration hi tih thar leh mai tur a nih thu a sawi bawk.

Lunglei Dist. Plan 2009 - 2010 zaa 90 release fel tawh a ni

    Ni 9 July 2010 zirtawpni chawhm dar 10:30 khan Vice Chairman HPC Office Chamber-ah Head of Office hrang hrang 17 te nen District plan 2009 - 2010 sum hmanga an hnathawh dan review meeting neih a ni. Department hrang hrangte hnathawh dan pawh a tlangpuiin a tha tawk hle a ngaih a ni. District plan 2009- 2010 pawh 90% vel lai chu release fel tawh a ni bawk. he mi bakah hian kum 2010 - 2011 chhunga HPC Lunglei hnuaia District plan sum hmanga hnathawhdan tur ruahmanna pawh neih thuai tum a ni.

Lunglei Tualchhung News Lawrkhawm

**  Mobile Cheking neihah mi 57 hnen atangin Rs 10150/-  hmuchhuak tawh:   Lunglei Traffic Police te chuan July ni 9 atang khan Mobile Checking neiin, nimin chawhma lam thleng khan dan bawhchhia mi 57 man tawhin heng mite hnen atanga an pawisafai hmuhchhuah tawh zawng zawng hi Rs 10150/- lai a tling. Mobile Checking hi tunkar chhung hian ngawrh takin an la nei chho zel dawn a ni. Hetiang Lunglei Traffic Police ten Mobile checking an neih avang hian tunlaiin, DTO Office lam chu an tul phah hle a, motor document fel lo leh, Road Tax pe lote pawhin, nasa takin Tax an pek bakah tihfel ngai tam tak an tihfel phah bawk niin kan thudawnna chuan a sawi.

Malaria avangin Girls Aloud singer Cheryl Cole a bawksawp

    Girls Aloud star zaithiam Cheryl Cole chu Tanzania ramah chawlh hmangin a kal a, a bialpa Derek Hough nen an ni awm e, vanduai thlak takin he ramah hian thosi seh atangin malaria a kai.
    Cole hi a dinhmun a that vak loh avangin Hospital for Tropical Diseases at University College London-ah admit in enkawl a ni a, a thatchhuah leh mai an beisei a, mahse a lo nasat deuh tawh avangin hun erawh a duh deuh ang, an ti.
    X Factor show a tana shooting an neih laiin Cheryl Cole hi nikhaw hre lovin a tlu a, heta tang hian malaria a vei tih hriain an enkawl nghal a, shooting pawh a neih chhunzawm thei dawn rih lo. A pasal Ashley Cole ( England Footballer) nen an inthen atang khan rim takin hna a thawk a, chawlh a han hmang a, malaria veiin a tlusawp leh ta a ni.

World Cup players zinga sum lalut tam mi 10 te

Kumin World cup-ah ram 31 atangin players 713 an tel a, heng zingah hian a tua te hi nge Football avanga sum la lut hnem. Top 10 chin tarlang ila. David Beckham (England) inhliam avangin England sqaud-ah a tel lova, a ni hi chu tel sela chuan pakhatna chiang takin a ni.

Lionel Messi : Argentina playmaker tawi te, sa tha tak, chak tak hi kumin World Cup khel zingah chuan a hlawh hnem ber. Chawlhkar khatah ringawt hian pound 200,000 a hlawh a, hemi piah lamah hian Adidas in an boot faktu a tana hmangin sum thahnem tak a la lut a, video games (Pro Evo) atangin thahnem tak a la lut bawk. Kumkhat chhungin Pound maktaduai 29.6 vel football atangin a hlawhchhuak tawh.

Bollywood film hlawhtling 3 Idiots

Aamir Khan - Rancho 
Kareena Kapoor - Pia 
Sharman Joshi - Raju Rastogi 
Boman Irani - Viru Sahastrabudhhe 
Madhavan - Farhan Qureshi 

Director: Rajkumar Hirani 
Producer: Vidhu Vinod Chopra 
Written by: Vidhu Vinod Chopra , Rajkumar Hirani ,
             Abhijit Joshi 
    Bollywood atang hian film hi englai pawhin an siam a, kumkhatah ringawt pawh an tihchhuah hi thahnem tak a ni. Bollywood atanga film an siamchhuah tawh zawng zawng zingah 3 Idiots film hi sum lalut hnem ber a la ni a, cheng vaibelchhe 410 zet a lalut tawh. An tlangzarh atanga ni 10 chhung khan cheng vaibelchhe khat a lalut hman a, October - December (last quarter of the year) chhunga sum lalut hnem ber record Ghajini film in a lo siam tawh pawh a khum a ni.

'Paul the Octopus’ in World Cup Final-ah Spain chak zawk turin a hrilh lawk leh ta

Kumin World Cup chhunga rannung lar ber chu ‘Paul the Octopus’ (Paul Oktopus an tih bawk), Germany-a Oberhausen khuaa awm hi a ni awm e. He Octopus, Paul tia koh hi kumin Germany dinhmun tur hrilhlawkna atan an hmang a, kumin World Cup-a Germany-in match 6 an khelh tawhah khan Germany dinhmun tur hi a la hrilhlawk dik vek a, Semi-Final-a Spain an hneh loh tur pawh kha a hrilhlawk dik leh chiah!!
    A hrilhlawk thin dan:
    Darthlalang bawm inang chiah pahnih, a chhunga eitur awm an dah a, heng darthlalang bawmah hian Germany leh an tumpui turte flag an tar ve ve a, a bâwm hawn zawk zawk-a flag intar ram chu a chak zawk a ni ni ta thin a ni.

World Cup Finalists : The Netherlands

    The Netherlands in World Cup champion hmasa ber Diego Forlan leh a hote hneh a World Cup final an lut ta chuan, ngaihven an hlawh thar a, Final hruai thleng theitu an coach Bert van Marwijk (57) chu tunge a nih? tiin an ngaihven nasa zual. Hepa hi Dutch mi a ni a, football khel thiam Netherlands teamah pawh lo khel tawh thin a ni. Kum 1988 khan players atanga chawlin coaching lamah a kal a, kum 2002 khan Feyenoord chu UEFA Cup a lak pui.

Kylie Minogue Hollywood film Jack and Diane - ah chang dawn

        Australian Pop singer Kylie Minogue chuan Hollywood film a chang dawn a, a film chan tur hi Jack and Diane tih a ni a, lesbian film lampang a ni awm e.  A mah hi New York-ah lemchang tur hian a awm tawh a, a chanpui tur zingah hian English actress Juno Temple, Elvis Presley tunu Riley Keough leh Jena Malone te an tel.
    Kylie hi a tir takah chuan film lam atanga hriat hlawh hmasa a ni a, zai lamah a hlawhtlin chhoh tak em avangin film hi a kalsan zawk mai chauh a ni a, chuvangin lemchan lamah chuan ngaihtuah awm lo tak a ni. Kum 42 a upa zaithiam Kylie hian a film chan turah hian rock star tattoo ngah tak lemah a chan dawn avangin a nghawng leh banah te chuan tattoo niawm tak tak lamtir deuh buai a ngai dawn. A mah tak hi chuan tattoo hi a ngaina teh chiam lo thung.

Khawpui nun ning Cameron Diaz in Farm a chen a chak

    Hollywood actress lar Cameron Diaz chuan, khawpui nun ri huai huai mai chu a ning hle a lo ni a, khwpui nun bengchheng luih luih mai chu tlan san a, thingtlang lamah Farm reh reih rawih a, kum khat vel tak chen a chak thu a sawichhuak. Mahni kut ngeia thlai chin a, ran vulh a enkawl a chak. Kan lo chawr chhuahna chu Lei a ni a, chuvangin leilung, tui leh ni tel lo chuan kan dam khawchhuak thei lova, leilung nen inzawma hna han thawh ve bawrh bawrh hi ka chak ngawt mai, a ti. Mahni tharchhuah ngeite hi ei ve ila, a ti.

Champion tur inrin siak. A ring dik lo ten dinner an chawi dawn

    Lunglei DC, pa ho leh zaithiam hovin World Cup champion tur an in rinsiak a, a ring dik lo zawk zawkin dinner an chawi dawn a ni. Hetiang hi an rin dan a ni.
    Netherlands ringtute:
    K. Lalrinpuia (Vulmawi), K. Lalrochana (Lunglei Tribune), Dr. F. Lianhlira CMO, R. Lalhmangaiha (Red Ribbon Youth Icon), CC. Lalchhuangkima DTO & ASO - I, CMS Dawngliana LDSC, Lalawmpuia SSA, Thanghmingliana Zunzam, Lalropuii Pachuau (Singer), Lalchhuanawma (Sunday Digest), Lalbiaksiama (ZS Cable), Paudel (Akriti), P. Lalhmangaihzuala (YMA), Vanlalpeka Ngente (LDFA), Hminga Zongte (Virthli), F. Lalngaihzuala (JB), FC. Dinpuia (Eldo), Lalremruata Zadeng (Zo-En), Dr. J. Zorema (JB College)

Megan Fox in pasal a neih hnuah a pa a hrilh ve chauh

    Hollywood actress lar Megan Fox chuan, Brian Austin Green 'Tiam tlat e' a tih pui tawh a, tunlai hian honeymoon an hmang mek. Megan Fox hi a nu leh pa an inthen tawh a, a nu hnenah awmin pahrawn nei a ni a, an ni enkawlna hnuaia lo puitling chho a ni a, a pa tak Franklin Fox pawh a thlahthlam chuang lova, a khat tawka tlawhin a hmu thin. A pasal neih chungchangah erawh a pa chu rawn chu sawi loh, inneih hmain a pa hian a hre lova, an inneih hnuah Megan Fox hian a hrilh chauh a, an inneih thlalak chu a iPhone hmangin a thawn nghe nghe. Hetianga a tihna chhan hi a pa a pawisak loh hrim hrim vang ni lova, mak ti zeta siam a chak ve hrim hrim vang a ni awm e.
    A pa chuan a fanu pasal chu a hmaa a lo hmuh tawh thin thu leh pa tha tak nia a hriat thu a sawi a, nupa hlim tak an ni ngei dawna ngaiin a lawmpui hle a ni.

PETA in Sa ei lo zinga ber kaiah Olivia Wilde an thlang

    People for the Ethical Treatment of Animals (PETA) pawl hian kawng hrang hrangin hma an la nasa hle a, Ramsa hmul leh vun atanga thawmhnaw siam in bel te hi tha ti lovin campaign an bei nasa thin a, chungah chuan hmeichhe nalh leh lar tak takte thla thawmhnaw ha mumal mang lova laksakin an thehdarh a, Ramsa vun leh hmul a inthuam ai chuan ruaka awm ka thlang zawk, tihte an thlalakah chuan ziakin an campaign thin. Tunhnaiah PETA hian Sa ei lo hmeichhe zinga duhawm leh sexy ber an thlang leh a, chutah chuan actress Olivia Wilde an thlang a, zaithiam Leona Lewis chu pahnihna a ni.

Hlimthla

Hei pawh leeeeee!!!!!!!!!!

Lunglei Dist. Sports Committee hruaitu 2010 - 2012 thlan a ni. MSSC dan thar angin Elected OB 4 an awm ta

Lunglei 3rd, July:  Nimin chawhnu dar 1:00 khan Circuit House Conference Hall-ah kum 2010 - 2012 chhung atan Lunglei District Sports Committee (LDSC) hruaitu tur thlan a ni a, he hun hi Pi M. Zohmingthangi IAS Chairman LDSC leh Lunglei Bawrhsap ni bawk chuan a kaihruai
    Pi. M. Zohmingthangi chuan, Mizoram State Sports Council-in dan thar a siam angin LDSC hruaitu thar thlan a nih tur thu a sawi a, inthlan a awm chuan chuhtu an awm a ngai a, tan nat pawh tha a tih thu sawiin, Lunglei Dist. Sports lama hma kan sawnna tura duhtute vek kan nih vang a ni a ti. Hruaitu thar kan thlan turte chuan an mahni Association, Discipline bik hmasawnna tur ringawt ngaihtuah lova, LDSC hnuaia Assn. zawng zawng leh Discipline zawng zawnga hma kan sawnna tur an ngaihtuah tul a tih thu sawiin, chutiang mi chu kan vawrh chhuah a, kan thlan chhuah ngei ka beisei a ti.

3 Idiots Film avangin zirlai pakhatin Bike a siamchhuak

Hindi film lar, 3 Idiots a en avangin Jaipur-a zirlai pakhatin Bike a siam chhuak. Aamir Khan-a channa, ‘3 Idiots’ hian zirlai tam tak chona thar a pe nia sawi a ni a, a bikin Engineer zirlai-te chu thil thar siam tumin he film an en atang hian an rilru an seng nasa zual nia hriat a ni. He film a en atanga chona thar hmachhawntu, Jaipur-a Gyan Vihar University-a Mechanical engineering zirlai, Pramod Jain chuan, tuna an bike siam chhuah hi a zirlaipui mi dang 5 nena an duan chhuah a ni tih sawiin, thla 6 kal ta chhung khan ni tin darkar 10 dawn lai, he bike siam tur hian rilru leh tha an seng tih a sawi a, an bike siam chhuah hi thli chakna hmanga kaltir theih a ni tih sawiin, 3 Idiots film an en atangin he thil hi siam chhuak thei tura inngaihna lian tak an nei tih a sawi. 

CNN Show ‘ Larry King Live’ tih tawp a ni dawn ta

    CNN Show lar tak, Larry King Live chu kumin favang hian tihtawp a ni tawh dawn niin, he show huaihawttu Larry King-a’n a sawi. Kum 25 chuang chhuah tawh, he TV Show hi mi tam takin an ngaihlu hle a, interview 40,000 chuang neih a ni tawh a, tun hnai khan, Guinness Book of World Records pawhin mi pakhatin Interview a neih rei ber record-ah pawmin chawimawina an lo pe tawh a ni. 

Inneih lam an la ngaihtuah lo!!

**Inneih lam an la ngaihtuah lo :     Pirates of the caribbean film a changtu Johnny Depp chu a bialnu Vanessa Paradis nen innei mai tawh awm an nih laiin Paradis chuan inneih lam a la ngaihtuah lo mai niu lovin inneih chu a hlauh zawng tak a nih thu a sawi chhuak heu mai. An ni pahnih hi 'My American Lover' film-ah an chang dun a, Paradis chuan Johnny Depp nena film chan dun chu a nervous nasa hle tih a sawi a; a duh ang pawhin a chang tha hlei thei lo niawm tak a ni. Paradis hian kum 6 kalta khan Heartbreaker film a chang a, a hlawhtling zek a, box office hit a kai a ni.
    

Klaus Meine vangin Scorpions tour a kal tluang thei lo

    German rock band ropui Scorpions chuan tour an neih mek an zawh fel hnuah an band tih tawp an tum avangin tuna tour an neih mek hian ngaihven a hlawhin hlut pawh a hlawh a, June ni 30 'Remna Ni' khan Columbus, Ohio-ah perform tur an nih laiin an vocalist Klaus Meine chu hritlang awmna avangin a zai hlei thei lova, chuvangin he hmuna an zai tur hi an cancell tawp. Tour an neih mekah hian Cindrella band chu support act a tana an hman a ni a, Scorpions an zai theih loh avangin fans te beidawng lutuk tur venna a tan a thlawnin Cindrella chu an zai ta ngawt.
   Ohio fans te hnenah Scorpions chuan ngaihdam dilin Klaus Meine chu tour chhunzawm leh mai thei tur a ni a, chawlh hlek a mamawh thu Doctor in a sawi avanga Ohio a concert chu thulh an nih thu an sawi a ni.

Hriatthiamna kan dil e

Tulna avangin hmun dangah Blog enkawltu a zin avangin Blog pawh update hleihtheih loh a ni a, tun atang chuan rawn update leh chhoh theih beisei a ni e. Blog chhiar thin tute hriatthiamna kan ngen a, lo chhiar chhunzawm zel turin kan in ngen bawk e