World Cup players zinga sum lalut tam mi 10 te

Kumin World cup-ah ram 31 atangin players 713 an tel a, heng zingah hian a tua te hi nge Football avanga sum la lut hnem. Top 10 chin tarlang ila. David Beckham (England) inhliam avangin England sqaud-ah a tel lova, a ni hi chu tel sela chuan pakhatna chiang takin a ni.

Lionel Messi : Argentina playmaker tawi te, sa tha tak, chak tak hi kumin World Cup khel zingah chuan a hlawh hnem ber. Chawlhkar khatah ringawt hian pound 200,000 a hlawh a, hemi piah lamah hian Adidas in an boot faktu a tana hmangin sum thahnem tak a la lut a, video games (Pro Evo) atangin thahnem tak a la lut bawk. Kumkhat chhungin Pound maktaduai 29.6 vel football atangin a hlawhchhuak tawh.

Cristiano Ronaldo : Chawlhkar khat chhungin pound 200,000 dawn a hlawh. Fakna atangin sum a lalut a pung chak khawp mai. Kekawrte fakna, hair gel fakna atang te pawhin a la lut a, Nike in an infiamna thawmhnaw an siam faktu a tan an hmang bawk. Football atangin kumkhatah pound maktaduai 27 a lalut.

Kaka : A chanchin an ziakna apiangah sakhaw mi tak a nih thu te, Isua neitu a nih thute hi a tel zel. Kumin World Cup-ah vanduai thlak takin red card hmanga hnawhchhuah zingah a tel. Football atang hian pound maktaduai 16.9 sum a la lut tawh a, kumin World cup khel zing atangin sum lalut tam lamah chuan pathumna a ni.

Thierry Henry : FC Barcelona atanga a hlawhchhuah bakah hian Renault Clio advertisement atanga sum a lak luh a thahnem khawp mai. Football atanga sum a lakluh hi pound maktaduai 16.1 zet a tling tawh.

Carlos Tevez : England Club hausa thar Manchester City duh lai a ni a, sap tawng a thiam that theih loh avanga Premier League chhuahsan duh ut ut reng a ni. Tawng lamah nal lo mahsela, Football a thiam tlat chuvangin a sum lakluh pawh a tlem thei lo. Kumkhatah Pound maktaduai 3.8 a lalut tawh a ni.

Frank Lampard : Club atanga a sum hlawhchhuah bakah Pepsi leh Adidas ten an thil siam faktu a tana an hmang avangin a sum lakluh a sang hle a, kum 32 mi a ni tawh chungin footballer zingah sum lalut tha zingah a la tel. Pound maktaduai 12. 8 kum khatah a lalut.

Samuel Eto'o : African mihang zingah chuan football avanga sum lalut hnem berte zinga mi a tling phak a, pound maktaduai 12.4 zet a lalut. FC Barcelona in Inter Milan lamah players an duhzawng lakluhna a tana an thleng tel kha a ni a, nuihzat erawh a hlawh miah lo. A club thar hi a chet that pui tlat.

John Terry : Chelsea club in an duh em em a, chhuahsan te pawh han tum ut ut mahsela, sum hmanga an pawh beh leh thin a ni a, chuvangin chawlhkar khat chhungin football pet manah pound 180,000 zet a hlawh tawh. Kumkhatah pound maktaduai 10 zet ala lut.

Steven Gerrard : Mi rintlak leh rinawm tak a nih avangin Liverpool Club bak changdang a kan thei meuh lova, a rinawmna leh hmelthatna avang hian a sum hlawhchhuah pawh a tam phah an ti thin. Serason tharah hian Real Madrid lamah a khel maithei tih thawm te pawh a awm a, eng tak ni maw? a ni hian pound maktaduai 9 a lalut.

Xavi : Spanish midfielder tha, high-class midfielder an tih zinga mi a ni a, kumkhat chhungin pound mnaktaduai 8.5 zet a hlawhchhuak. Barcelona tana mi pawimawh berte zinga mi a ni mek.