Kan zinna leh a chhehvel part - 1

Government of India, Directorate of Field Publicity, Ministry of Information and Broadcasting bultumin, Conducted Tour of Opinion Leaders From MMT Region to Karnataka Region tlawhin kan thawk chhuak a.

MMT tih hi Meghalaya, Mizoram leh Tripura tih a niin, Dt. 15
 .2.2010 zan khan Night Bus-in Lunglei atangin kei leh Nl. C. Lalnunpuii (Nununi) Ramthar Veng te chu Aizawl panin kan phei a, a tuk, ni 16 zanah Aizawl atangin Night Bus vekin Shillong panin kan chhuk thla leh a, Shillong thleng hian Lungleia Field Publicity Officer Pu. Singha’n min hruai a. Aizawl atanga midang pahnih kal ve tura tih fel vek tawh, engemaw harsatna avanga an kal leh tak loh avangin keini pahnih chiah hi Mizoram atanga kal kan awm ta nghe nghe a ni.

He tour kan kal theihna tur hian hun rei tawh ang reng tak 2008 atang daih tawh khan Bio-data leh thil tul dangte Regional Office, Shillong lamah kan thawn thla a, hun engemawtichen a rial vang vang hnuah 2010 February thlaah kan kal thei ta chuah a ni. Tin, sawi hmaih theih hauh loh chu, he tour kan kal theihna tura kawng engkima min buaipuitu, Pu. PC. Lalnuntluanga (Pa Nuna), FPO Office Lungleia thawktu chungah lawmthu Nununi nen hian tawngkain sawi thiam lo mah ila, he thuziak hmang hian ka han sawi ve leh hrim hrim a ni.

MZP-in lawmthu an sawi

MZP chuan Mizoram Board of School Education(MBSE)-in HSLC 2010 Result rang taka a tichhuak thei chu lawmawm a tiin, thawktute thawhrimnaah lawmthu a sawi tak meuh meuh a ni. Ramleilungfa ngeiin thuneihna changa Pakhatna kan hauh hi kan chhuang takzet a, Top ten-a Mizo Pariat lai an lang hi MZP chuan a chhuangin a lawmpui takzet a ni. Nikum lamah Pass percentage 60.46 a ni a,kuminah hian 66.60% ni a, kumin hi kum li kal ta chhunga result that ber kum a nih avangin MZP chuan lawmawm a ti lehzual a. Zirlai Pass nei lo school pawh nasa taka tlahniamin School 8 (pariat) chauh an awm ta pawh hi hmasawnna ropui takah a ngai a ni.
Hlawhtlinna hmu zawng zawngte MZP chuan thinlung takin a lawmpui a, an hmalam hunah duhsakna a hlan nghal bawk a ni. Tin, hlawhtlinna hmel hmu hrih lo, vanduai ta te erawh a tawrhpui takzet a, hnual mai lova theihtawpa bei chhunzawm zel turin a chah nghal bawk a ni.

MNYF in ‘Dikna luipui anga luan tir’ turin sawrkar an phut

MNYF chuan nimin khan thuchhuah siamin, hetiang hian an thuchhuahah an tarlang. “Dt. 20. March 2010 a MNYF Sub-Hqrs Lunglei Office Bearer meeting chuan, Mizoram Sorkar Pu Lal Thanhawla kaihhruai congress Ministry-in mahni a rorelna hrang nei ve tura Village Council a pek thart khuate zawng zawng kan lawmpuii takzet a, amaherawhchu Village Council pek thar zinga khaw pathum Rotlang ‘W’, Malsuri leh Kolasib Project veng-ah VC indan hma a VC member nilaite VC tharah thlan ngai lo tlingsa-ah a puang a, hei hi Democracy palzutna leh Village Council Act Sec 4(d) kalh tlat a ni a, Village council member ni tur chuan a khawchhung mipuiten dan ang taka an thlan chhuahte an ni ngei tur a ni.

YMA Sub.Hqrs. Lunglei Office hawng dawn

YMA Sub. Hqrs. Lunglei Office chu April ni 6 hian hawn a ni dawn a. He hun hi Session hnihah then a ni dawn a, I session Pu. R. Chhuanvawra, Vice President YMA Sub. Hqrs. in a kaihruai ang a, II Session hi Pu. P. Lalhmangaihzuala, President, YMA Sub. Hqrs. in a kaihruai ang. YMA Office thar hi Pu. C. Zoramliana, Vice President, CYMA in a hawng dawn a ni. Tlaiah ruai an theh nghal ang.

40th Assam Rifles ten Free Medical Camp an nei

40 Assam Rifles te chuan HQ 23 Sect Assam Rifles bultumin medical Camp March ni 12 khan a thlawnin Hrangchalkawnah an nei a. He hunah hian in entir mi 150 zette hnenah damdawi pawh a thlawnin engkim an pe nghal a ni. Damlote hi Capt. Sambit Sundaray, RMO leh Dr. L. Pachuau GDMO te leh an thawhpui, para medical staff ten enin an buaipui a ni.
Hei bakah hian March ni 15 khan Free medical Camp hi Bualpuiah pawh buatsaih lehin, damlo in entir mi 254 te hnenah damdawi a thlawnin an pe vek bawk a ni. Hetianga Free Medical Camp an buatsaih sak avang hian Hrangchalkawn leh Bualpui mipuite hi an lawm hle a ni.

LAD Minister ruahmanna tha ti

Lunglei District Congress Committee chuan thuchhuah siamin LAD hnuaia Housing Loan Board membertur ruat thinah kum 10 kal ta a sawrkar khan rulling party te chauh a lo ruat tawh thin a, an kalphung kha tun sawrkarah chuan kalpui tawh lovin party dang hruaitute telin Housing Loan Board memberte ruat an ni hi, LDCC chuan lawmawm a ti hle a, Pu C. Robuanga Vice President, LDCC chuan hetianga Party duhsak bik awm lova, mipui sawrkar a nihna lantir a, LAD Minister ruahmanna siam chu tha an tiin lawmawm an tih thu a sawi.

Best Athlete ah Vanlalpeka GHSS Lunglei

Mizoram Secondary School Games tum 28na chu March ni 19 Zirtawpni khan a tiak ta a, a pumpuiah Aizawl District chuan Gold 20, Silver 12, Bronze 8 lain Medal 40 an lak chu an champion. He XXVIII Mizoram Secondary School Games 2010 ah hian Athletics ah Mamit District in Gold 3, Silver 2 leh Bronze 2 lain an champion an ni a, Best Athlete ah Vanlalpeka Class X zirlai Govt. H/Secondary School Lunglei chu thlan a ni a, a ni hian Gold 3 a la a, Hmeichhe lam ah Lalremruati P.G. H/S Class X, Aizawl chuan Gold medal 4 lain Best Athlete a ni bawk, Aizawl District chu Team Champion niin Gold 4, Silver 1 leh Bronze 2 an la a, Lunglei District chuan Gold 3, leh Bronze 2 lain pahnihna an ni.

India chhiarpui tur chungchang training April ni 9 atangin Lungleiah nei dawn

India ram chhiarpui nakuma neih tur inbuatsaihna kal mekah hna tan chhoh mek zel a ni a. Hemi chungchanga inbuatsaihnan, Houselisting Operation leh National Population Register chu May 15 atanga June 30 thleng hian Mizoram ah neih a ni dawn a. Hemi tan hian District level training vawihnih neih a ni dawn a, Aizawl,Champhai, Mamit, Kolasib leh Serchhip district ten March 23-25, 2010 chhung hian Aizawl ah neih a ni dawn a, Lunglei, Saiha leh Lawngtlai District ten April 7-9 chhung hian Lunglei ah neih a ni ve leh bawk ang.

MJA Lunglei te Gen. Conference hmang turin an kal

MJA Lunglei member pakua Press Tour neia kalte chu nimin khan Kolkatta atangin Aizawlah an rawn kir leh ta a. March 23-a MJA Generel Conference vawi 37-na neih tur hmang turin Aizawlah hian an cham tlang nghal ang. Hetih rual hian, MJA Lunglei member dang 10 vel tukking zing hian MJA Generel Conference hmang turin Aizawl-ah hian an phei ve leh dawn a ni.
MJA General Conference-ah hian I&PR Minister Zodintluanga chu khuallian tur a ni a, opposition leader, Dr R Lalthangliana chu khualzahawm a ni ang. Conference hi chawhma dar 11-a tan tur a ni a, chawhma dar 10:30 atangin MJA member-te tan Annual Fee Rs. 100 leh Welfare Fund Rs. 100 pek nghal tur a ni. MJA Conference-ah hian tlaiah chawhlui kilho nghal tur a ni a, district danga MJA member zawng zawngte leh, MJA member ni kher lo, media-a thawk zawng zawngte pawh tel tura sawm a ni.

NIT Campus Lungleia dah MNF Sub. Hqrs. Lungleiin an phut

Nimin khan MNF sub Hqrs. Lunglei chuan Hnam Runah excutive committee meeting neiin, resolution pathum an pass a, heng an resolution pass zingah hian India sawrkar laipuiin, hmarchhak bial leh State bilin kan dil pawh ni miah lovin, khawvel ke pen ruala kan pen ve theihna turin, thiamna sang zawk zirna inpui, National Institute of Technology (NIT) paruk zet India hmarchhak mipuite tana min rawn pe hi lawmawm kan ti a. Central sawrkar lakah pawh lawmthu kan sawi a ni. Chutih laiin, Central sawrkar chuan he NIT hmun Campus thlan chungchangah State-ah thuneihna hlanin tunah hian Chaltlang Aizawl-ah mi in luahin Class tan tum mek a ni a, a hmun pawh zawn mek ni a hriat a ni.