Kan zinna leh a chhehvel part - 1

Government of India, Directorate of Field Publicity, Ministry of Information and Broadcasting bultumin, Conducted Tour of Opinion Leaders From MMT Region to Karnataka Region tlawhin kan thawk chhuak a.

MMT tih hi Meghalaya, Mizoram leh Tripura tih a niin, Dt. 15
 .2.2010 zan khan Night Bus-in Lunglei atangin kei leh Nl. C. Lalnunpuii (Nununi) Ramthar Veng te chu Aizawl panin kan phei a, a tuk, ni 16 zanah Aizawl atangin Night Bus vekin Shillong panin kan chhuk thla leh a, Shillong thleng hian Lungleia Field Publicity Officer Pu. Singha’n min hruai a. Aizawl atanga midang pahnih kal ve tura tih fel vek tawh, engemaw harsatna avanga an kal leh tak loh avangin keini pahnih chiah hi Mizoram atanga kal kan awm ta nghe nghe a ni.

He tour kan kal theihna tur hian hun rei tawh ang reng tak 2008 atang daih tawh khan Bio-data leh thil tul dangte Regional Office, Shillong lamah kan thawn thla a, hun engemawtichen a rial vang vang hnuah 2010 February thlaah kan kal thei ta chuah a ni. Tin, sawi hmaih theih hauh loh chu, he tour kan kal theihna tura kawng engkima min buaipuitu, Pu. PC. Lalnuntluanga (Pa Nuna), FPO Office Lungleia thawktu chungah lawmthu Nununi nen hian tawngkain sawi thiam lo mah ila, he thuziak hmang hian ka han sawi ve leh hrim hrim a ni.

Dorothy leh Arunda Gogoi te tual lenna Shillong:

Tour nei tura kal kan ni e, ti lo chuan, Sonapur lui kam zawn vel kan tlan lai chuan mi tam takte hriatpui ve lem loh, thianpa Hutea’n, “A tawp nan vawikhat chauh” tih a ziak a; ngai tak chunga a then hnu, Arunda Gogoi-i nen an han intawn lehna hmun kha a ni tih ka ngaihtuah chhuak mai mai a. Chawl lova tlan chhunzawm zelin, Shillong khawpui kan han luh dawn chuan khua a eng tawhin, zing kar a ni ta a. Pu. C. Thuamluaia tual lo lenna hnu, a thinlaia thi thei lo, a hmangaih “Dorothy’ kha ka rinruah a lo cham lian nghal hle a. Hetih lai hian, “Sialton Official” kha han chhiar nawn leh ka chak zia kha!

A takin, Pu. Thuamluaia, Dorothy kha hmuhpui ve thei lo mah ila, ka hmuh chakna avang nge hmuh thut inring angreng taka beiseina ka nei tlat te kha a mak angreng hle mai. E! A mak hran love, Pu. Thuamluaia khan a thuziak min chhawp chhuahah khan chen ngai lohna ramah min chen tir a, min hruai ve tlat a, Dorothy pawnfen thliin a chhem lenna hmunah khan kan kal ve miau si a ni. Ani pawhin, “D, if you could see my heart, it is bleeding now” a ti ve tawk tawk tho tho kha mawle...............

Tour-a kal turte kan inhmukhawm ta:

Director Office lam atanga min phut angin february ni 17 zing dar 10:00 velah Shillong khawpui chu kan thleng ta a. Tukthuan pawh ei lovin Office lamah kan tlang nghal a. A hnuah tukthuan chu kan ei ve leh thovin, nilengin Office-ah hun kan hmang a, North East State hrang hrang pathum atanga he tour-a kal turte chu Office-ah hian inhmukhawmin, Director Office Chamber-ah tour kan neih tur chungchang inhrilhfiahna leh thil tul hrang hrang sawi hona kan neih hnuah kan thlenna tura Hotel min lo buatsaih sak hmun lam panin kan inthendarh sang sang hlawm a.

Thil dangah kan pakai leh hmain, he tour-ah hian Opinion Leaders kal turte hi kan zavaiin 14 kan ni a, chung mite chu, Meghalaya State atangin, Andreas Carey, Rosemarry Syimlieh, Niroparoi Patwet, Shaiba Lamare, Sujindra R. Sangma, Leninggrade Sangma, Elison Sangma Jewilline Sangma te an ni a, Mizoram atangin, V. Rokhawlkima leh C. Lalnunpuii te, Tripura atangin, Madhabi Singha, Mrinal Kanti Singha, Nirmalendu Paul leh Niranjan Kuri te an ni. Keimahni ho bakah hian tour-a min hruaitu hian, O.L Marbaniang, DFP, Shillong chu Conducting Officer tura ruat a niin, Asst. Conducting Officer-ah hian B.R. Khongwar FPO, Nongstoin chu ruat a ni bawk a, an ni nen hian kan zavaiin, mi 16 kan ni.

Shillong leh a chhehvel:

Tlaiah Director Office awmna Lower Lachumiere atanga kan thlenna Hotel theuh chu kan pan a, kei leh Nununi bakah Tripura atanga rawn kal pahnih, nu pakhat hmeltha vengvawng tak leh mahni lu zo ve tak, Madhabi Singha leh a opposite chiah, biak loh chuan tawng mang lo, Niranjan Kuri (Babu-a) kan tih maite nen chuan shillong khawpui lun lai, Police Bazar (PB) bul lawka Hotel pakhat City Hub-ah chuan kan thleng tlangin, kan hahchawl vang vang a. Zan khat chu Shillong khawpuiah zan mu kan chhing ta a ni.

A tuk, ni 18 chhunah chuan Shillong khawpui leh a chhehvelah local tour nei turin zing dar 10:30 velah Director Office atangin kan tlanchhuak a. Cherapunjee, hun rei tak chhung khawvela ruahtui tlak tam berna hmun ni thinah kan kal a. Conferous Resort-ah tukthuan tuihnai tak kan kil hnuin, Mot Trob (Khoh Ramhah Park) Cherapunjee kan tlawh a. Helai hmun hi a nuamin, heng lai vela ruahsur thin zawng zawng hi helai hmun atanga rawn insiam thin a ni an ti a. Hetih hunlai pawh hian ruah mi ang hi a rawn theh deuh sang sang thin a ni.

Chumai bakah chuan helai hmun atang hian Bangladesh pawh chiang takin a hmuh theih nghe nghe a, kan hlim hlein, helai hmuna lung lian tak mai pakhat rawn ding luah mai chu Nununi phei chuan “Khawvela lung lian ber” a ti mauh mai! Ni tak maw?

Hemi hnu hian Thangkharang Park, hmun zau leh thengthaw nuam tak hmunah kan kal leh a. kan kal hnuhnunna apiang a nuam kan ti zel dawn anih hmel. Hemi hnu hian Mawsmai Cave an tih Puk chhungah kan lut leh a. He puk hi Khasi ho, Bangladesh-a ankal dawn tuma an kalkawng leh an tawmna pakhat niin an sawi a. Puk chhung lung hi a danglam hlein, a tle sut a. Tui inhlawmkhal tawh far mai tur niawm tak a ni. A chhunga kan awmlaia Current an thim thut mai chu, “Ai mit thlawn” an tih ai pawh hian a thim zawkin ka ring hial mai! Mobile phone kan han hmet eng ve a. A screen eng chuan engmah hi a chhun en ve theih hauh loh nia!

Hemi hnu hian, Ram Krishna Mission Technical School kan tlawh leh a. He School-ah hian (Tailoring, Weaving, Knitting) zirna a awmin, an puantah lai kan en a. Han tah ve chhin a chakawm duh hle. Hemi hnu hian khawvela tuikhawhthla sang ber palina, Nohkalikai Falls kan tlawh leh a. Hetih lai hian thal lai anih avangin, tui khawh a tam lova, mahse, a hmuhnawm ve hranpa hrim hrim tho. Ziak chipchiar chakawm hle mahse, hmun a awm si lo................

 

V. Rokhawlkima

Joint Editor

Lunglei Times