Hindi film lar, 3 Idiots a en avangin Jaipur-a zirlai pakhatin Bike a siam chhuak. Aamir Khan-a channa, ‘3 Idiots’ hian zirlai tam tak chona thar a pe nia sawi a ni a, a bikin Engineer zirlai-te chu thil thar siam tumin he film an en atang hian an rilru an seng nasa zual nia hriat a ni. He film a en atanga chona thar hmachhawntu, Jaipur-a Gyan Vihar University-a Mechanical engineering zirlai, Pramod Jain chuan, tuna an bike siam chhuah hi a zirlaipui mi dang 5 nena an duan chhuah a ni tih sawiin, thla 6 kal ta chhung khan ni tin darkar 10 dawn lai, he bike siam tur hian rilru leh tha an seng tih a sawi a, an bike siam chhuah hi thli chakna hmanga kaltir theih a ni tih sawiin, 3 Idiots film an en atangin he thil hi siam chhuak thei tura inngaihna lian tak an nei tih a sawi.
Tuialhthei man sang chho zelah man tlawm zawk leh sum sen tam ngai lo tura Bike siam chhuah chu an thupui ber a ni tih sawiin, he bike hi mi tin tan tangkai taka hman a nih theih nan a hmingah pawh ‘All is Well’ tih an phuah niin a sawi.
He an bike siam chhuah hi darkar khata Km 30 vela chak bakin a tlan thei dawn lo niin an sawi a, Gyan Vihar University, Mechanical Engineering Dept hotu, Rameshwar Jaswal chuan, he bike hi tlan chak lo mah se, sum a heh loh avang leh boruak chhia engmah a tihchhuah loh avangin thil tangkai tak a ni dawn tih a sawi.
No comments:
Post a Comment