Lunglei Dist. Sports Committee hruaitu 2010 - 2012 thlan a ni. MSSC dan thar angin Elected OB 4 an awm ta

Lunglei 3rd, July:  Nimin chawhnu dar 1:00 khan Circuit House Conference Hall-ah kum 2010 - 2012 chhung atan Lunglei District Sports Committee (LDSC) hruaitu tur thlan a ni a, he hun hi Pi M. Zohmingthangi IAS Chairman LDSC leh Lunglei Bawrhsap ni bawk chuan a kaihruai
    Pi. M. Zohmingthangi chuan, Mizoram State Sports Council-in dan thar a siam angin LDSC hruaitu thar thlan a nih tur thu a sawi a, inthlan a awm chuan chuhtu an awm a ngai a, tan nat pawh tha a tih thu sawiin, Lunglei Dist. Sports lama hma kan sawnna tura duhtute vek kan nih vang a ni a ti. Hruaitu thar kan thlan turte chuan an mahni Association, Discipline bik hmasawnna tur ringawt ngaihtuah lova, LDSC hnuaia Assn. zawng zawng leh Discipline zawng zawnga hma kan sawnna tur an ngaihtuah tul a tih thu sawiin, chutiang mi chu kan vawrh chhuah a, kan thlan chhuah ngei ka beisei a ti.

    Pu J. Ropianga Chinzah Secretary LDSC leh DS&YO ni bawk chuan thusawiin, tun hma chuan District Sports & Youth Officer (DS&YO) chu thlan ngai lovin,  LDSC Secretary a ni nghal thin a, mahse, Mizoram State Sports Council-in dan thar a siamah Secretary pawh thlan tur a tih a ni ta a, a ni chuan Secretary Post chu chuh a tum loh thu a sawi.
    Hei bakah hian LDSC hnuaiah Sports Assn. hrang hrang 25 a awm thu sawiin, State leh National Level-ah Lunglei District atangin mi engemawzat kan thawn chhuak tawh a, hmingthatna leh lawmman hrang hrangte pawh kan lo la tawh thinin, hengte hi Association hrang hrang hruaitute inpekna leh thawhrimna vang a nih thu a sawi. Hei bakah hian hun lo la kal leh zel turah pawh thawhhona tha neih a tul thu sawiin, Sports Association hrang hrangte leh LDSC te chu in lungrual taka thawk ho zel tura a duh thu a sawi a ni.
    He mi hnu hian MJA Lunglei kaihhruaina hnuaiah inthlan tluang taka neih zui nghal a ni a, Returning Officer atan Pu H. Lalthansanga Editor Lunglei Times chu hman a ni.
    Nimina LDSC hruaitu thlanah hian Sports Association 25 atangin aiawh mi 2 theuh an tel kim thei a, an ni bakah hian LDSC Office Bearer leh Executive Committee Member mi 10 atang mi 9 an tel thei bawkin, avaia Vote nei thei mi 60 atangin mi 59 an tel a ni.
    Secret Ballot hmangin Nomination tur mi 10 thlanchhuah a ni a, heng mite atang hian hengte hi hruaitu atana thlan tlin an ni.
    Vice chairman : CMS. Dawngliana, Bazar Veng, Secretary Lalmuanzuala, Salem Veng, Asst. Secretary K. Lalrinpuia Ramthar Veng, Treasurer R. Lalnunthara Lunglawn te an ni. An ni bakah hian Deputy Commisioner  Lunglei chu thlan ngai lova Chairman nisa a ni.