Lunglei Tualchhung News Lawrkhawm

**  Mobile Cheking neihah mi 57 hnen atangin Rs 10150/-  hmuchhuak tawh:   Lunglei Traffic Police te chuan July ni 9 atang khan Mobile Checking neiin, nimin chawhma lam thleng khan dan bawhchhia mi 57 man tawhin heng mite hnen atanga an pawisafai hmuhchhuah tawh zawng zawng hi Rs 10150/- lai a tling. Mobile Checking hi tunkar chhung hian ngawrh takin an la nei chho zel dawn a ni. Hetiang Lunglei Traffic Police ten Mobile checking an neih avang hian tunlaiin, DTO Office lam chu an tul phah hle a, motor document fel lo leh, Road Tax pe lote pawhin, nasa takin Tax an pek bakah tihfel ngai tam tak an tihfel phah bawk niin kan thudawnna chuan a sawi.

  **  Sapzu um 180 Police ten man: Nizan hmasa khan Lunglei Police Haulawnga Duty te chuan Taxi MZ-01 3209, Tlangthanga Durtlang ta, Lalsangliana (26) Zemabawk Aizawl a mi khalh atangin Rum um 160 leh Whiskey (Mc Dowells) um 20 an man a. Driver Lalsangliana hi Case siamsakin nimin khan Court-ah kalpui a ni a, Jail-ah thawn thlak nghal a ni ang.

**  Parvon Spas mum 135 an man: Nizan hmasa vek khan Lunglei Police te chuan Lalhmangaiha (22) Chanmari Lunglei hnen atangin Parvon Spas mum 135 an man sak a, case siamsakin nimin vek khan Court-ah hruai a ni.

** Thingzai rutu mi pahnih man:     Lalhlimpuia (30) Rahsi veng Lunglei leh Lalhming thanga (23) Zobawk a mite chuan, Pu. FJ. Liantluanga Addl. DC Lunglei in saklai, Chanmari a mi thingzai 4x3 ruksakin, an pahnih hian Lunglei Police te chuan man tawhin case an siamsak nghal a ni.

**  2011 chhung ngeiin Lungleiah Municipal Board din nise ti:   Mizoram Reformation ForumHqrs. Lunglei huai hawta Lunglei khawpui chhung NGO hrang hrang aiawhte leh mithiam I&PRO Conference Hall Lungleia kalkhawmte chuan nguntaka an ngaihtuah leh an rel ho hnu in hetiang hian resolution an pass. “India ram danpui siam that vawi 74 na, 1992 leh Municipal Act, 2007 & 2009 in Lunglei tana min phalsak ang ngei leh Congress party 2008 election Manifesto no. 2 (i) leh Policy planning and Programme bung 8 naa, thuneihna semzai dan tur tihin a tarlan angin ‘Aizawl leh Lunglei khawpui tan Municipal Council/Board din nise’ a tih ang ngeiin, kan sorkar chak tak hian kum 2011 chhung ngeiin Lungleiah hian Municipal Board min din sak rawh se”.