Nizan khan Champions League Quarter Final match 2 khelh a ni a, Champion lai Barcelona chuan English Club Arsenal chu 4 - 1 a hnehin Semi Final an inhlangkai leh ta a. 1st leg an lo khelh tawhah an ni club hnih hi 2- 2 in an lo indraw tawh a. Hetianga Arsenal 4 - 1 tehmeuha Barca lakah an tlawm leh takah chuan goal aggregate 6 - 3 laiin Barca lakah hian an tlawm a ni.
He inkhelah hian Barca hian naupang hmuiah chithlum tahsak teh ang ti niawm takin, minute 19 naah Bendtner chuan Arsenal tan hian goal a rawn khung a. Mahse, Barca hian si phurh rei an tum lo hle mai pawh ni lovin hnehna chan chu an thil tum a ni tlat si.
Arsenal tan hian Barca chhuantawlawl Messi ral lian chu dan zawh rual a ni lova, he inkhela Barca goal 4 hi a vaiin Messi thun vek a ni nghe nghe a ni. Bendtner-a’n Arsenal tana goal a thun atanga minute 2 chiah a liam hman tihin Barca tan hian Messi chuan an si phurh a rawn sut nghal a. Hei bakah hian hun chanve chhung hian goal dang tum 2, minute 37 na leh minute 42 naah a thun leh a. Hun chanve chhung hian Barca hian 3 - 1 in Arsenal hi an lehthal leh hman a ni.
Hun chanve hnulamah erawh a tu ve ve lam mah hian goal an thun thei lawk lo ve ve a. Mahse, hun pangngai tawp nan minute 2 chiah a awm tawh tihin Messi bawk chuan a goal thun thiam a la theihnghilh loh zia lantir nan Barca tana goal 4-na leh he match bika a goal 4 thunna ni bawk tur chu thun lehin, Barca hian 4 - 1 in hnehna an chang a, goal aggregate 6 - 3 zetin hnehna an chang ta a, Semi Final an inhlangkai leh ta a. Champion an nihna an humhim chhunzawm leh thei angem tih chiah fans te thlir a ni ta rih a ni.
Nizan vek hian CSKA Moscow chuan 0 - 1 a an hneh tawh loh Inter Milan chu an lo mikhual ve bawk a. An mikhual lakah hian 1 - 0 bawka tlawm lehin, goal aggregare 2 - 0 a hnehna changin Inter Milan hian CHampions League Semi Final an inhlangkai ta a ni.
He inkhela goal awm chhun hi minute 6-na lekah Sneijder chuan Inter Milan tan hian a thun a, he an si phurh hi sut tumin CSKA lam hian theihtawp chhuahin han nawr tawn ngial mahse, an sut theih tak loh avangin Inter Milan hian 1 - 0 a hnehna chang lehin, Semi Final an inhlangkai ve leh ta a ni.
Zanin hian Champions League quarter Final match 2 khelh leh a ni dawn a, Manchester United chuan Bayern Munich 1st legah 2 - 1 a an hneh tawh loh an mikhual ang a, Bordeaux pawhin 1 - 3 an hneh tawh loh Lyon chu an hmachhawn leh dawn a ni. Zanina inkhel turah Manchester United chuan an mikhual Bayern Munich hi an hneh zo lo anih chuan tun seasons Champions-ah chuan English Club hmuh chhunzawm tur an awm tawh dawn lo a ni.
No comments:
Post a Comment