“Kan hrawn lai Congress Party hi hmaithinghawng vuah an ang ka ti" - Lawmawma Tochhawng, President, MNF Sub. Hqrs. Lunglei

Vawiin chawhnu khan Pu. Lawmawma Tochhawng, President, MNF Sub. Hqrs. Lunglei chuan a Office-ah Press mite kawmin thingpui a inpui a, he hunah hian MNF sub. Hqrs. Lunglei hruaitu thenkhatte bakah, Pu. C. Lalrinsanga, Dy. Speaker hlui pawhin a telpui bawk.


Pu. Lawmawma Tochhawng chuan, “Kan sawrkar hrawn mek hi fakna tur a awm a, selna tur pawh a tam hman hle a, kum 1 leh thla thum chhung hian, Lunglei Dist. Rulling MLA te phei chu ram pum huap pawha che tha tak tak leh mit la tak tak an ni hlawm a, a lawmawm ka ti. Kan Dist. ngaihtuah tak maia, Saitluk Airport tih puitlin theih nana Private Resolution an put luh, an pass ta te kha a ngaihnawm a, a tak ram a nghahhlelhawm a ni. Copter, thla 3 hnua service tir turte pawh kha a finthlak a, kan tangkaipui phian mai thei, thu chauh anih loh hram ka beisei a ni” a ti.

Hei bakah hian, Lunglei Dist. Plan Budget atanga Fund min rawn pe zui zelte hi anih tur angla ni famkim la mahse, thil lawmawm tak a ni a, Mahse, plan Budget 1% ni anga an sawi thin chu a tling lo deuh 1/2% pawh a ni phak lo. 2010 - 2011 Plan Budget Rs 1500 Crore atanga teh phei chuan a beitham ta hle. Tin, a hmanna tur hi General Economic Service atan eizawnna mumal leh nghet neihna tur a ni a, Bial khata vawm tlurh a, infrastructure leh ral leh mai mai tur thil a hman vak vak chi a ni lo. Hmansual chuan thil pawi tak, a lo kal zelna tur pawh bahlah thei a ni ang tih a hlauhawm. Kan Dist. chanpual a khur kan lo khuabh der der tawh kha an sah leh palh thei a ni. HPC-a Rs 92 Lakh an dah ngawt pawh saw, a hman zelna enpuia, hriatpui chi a ni mai thei” a ti bawk.

“Political Party te hi In sa lai ang kan niin ka hria, Zohnahthlak zawng zawngte chenna turin In kan sa mek a, a changin inchungah keini kan lawn a, a changin Party dang, thawmmawla lo do pawl, a ban lo sawhnghet pawl an awm bawk. A hnuaia awmten a chunga awmte hnenah, a kawi laite, a fel lo laite kawhhmuh a, lo hrilh a, lo kawhhmuh kan mawhphurhna a ni” a ti.

Hei bakah hian, “Kan hrawn lai Congress Party hi hmaithinghawng vuah an ang ka ti. Mizopa hmai ang an vuah a, a phenah erawh, Vai, Central, Indianisation thluak a awm si. Hei hi hotupa ber Chief Minister leh a thuihhruai thenkhatte tawngchhuah danah a lang ta zauh zauh a ni” a ti.

Pu. Joseph-a Vice President chuan, sawrkarin VC pahnih thiat a, VC 7 an pek thar chu kan lawmpui a, hetih rual hian an mahni hamthatna tur ringawta ruahmanna an siam erawh chu tha kan ti lo a ni a ti a. Lunglei District huamchhunga VC thlan tharna tur Rotlang ‘W’-ah Laldinpuia, Phairuangkai VC member ni lai bakah, Dulal Chandra leh Surjiyo Lal te Puankhai VC member nilai Malsury VC member atan thlan ngai lova an dah chu democrasy palzutna a ni a ti a.

A bik takin, Laldinpuia phei chu Rotlang ‘W’ E/Roll Final Publication-ah pawh a hming a awm lo va, Phairuangkai Electoral Draft Rool-ah a hming a awm a, hetianga Roll-ah pawh a awm lohna khuaah VC member atana sawrkarin a dah hi Democrasy palzutna diktak a ni an ti.