Internet star zinga hlauhawm ber supermodel Heidi Klum

    Supermodel Heidi Klum chu internet a star zinga hlauhawm berah chhal a ni a, mipa-ah chuan Talk Show host Piers Morgan chu a hlauhawm ber tiin security company MCAfee Inc., in a puang. Hmeichhe lamah hian nikuma hlauhawm bera thlan Cameron Diaz chu kuminah pahnihna a ni.
    Anmahni ni lovin internet hmanga heng celebrity zawngtute hian an zawnna lamah virus an personal computer leh laptop-ah te a kai nasat thin vang a ni a, fimkhur turin thu rawn an pe nghe nghe a ni.
    Heidi Klum hi ngaihven hlawh tak mai a nih avangin internet lamah a thlalak leh chanchin zawngtu an tam mai a, chuta tanga virus avanga an PC leh laptop chhe ta an tam hle a nih chu.

    German chhul chhuak June 1, 1973 a piang kha a ni a, kum 1992 a National modelling contest 'Model 92' -ah a thianten tel ve tura an tih anga telin contestant 25,000 zet zingah pakhatna a thlan a ni a, Metropolitan Models New York-in contract $300,000 an pe nghal. Heta tang hian hnung tawlh zawngin a kal miah lo tih tur a ni a, kawng hrang hrangin hma a sawn a, modelling-ah chauh ni lovin lemchan lam thlengin a in hmang chho.
    Fashion magazine lar tak tak Vogue, Elle, Marie Clare ten an cover girl a tan an hmang tawh a, Victoria Secret in Angel a an puan zinga mi ngat a ni bawk a, kum 13 Angel a nih hnuah a bansan a, European cosmetic brand Astor model a ni zui leh. Tunah tak hi chuan model aiin sumdawnna lam a khawih lian tawh zawk a, TV series lamah te producer niin eng host host-ah emaw te a tang a, thawmhnaw siamna lamah pawh a in hmang. Forbes in kum 2010-2011 chhunga model sum lalut hnem list atihchhuahah chuan dollar maktaduai 20 vel lalutin pahnihna a ni a, Gisele Bundchen a tluk lo.