Lehlin film leh a behbawm

    Tunlaia kan film en tam ber leh kan buaipui viau chu Korean film hi a ni awm e. Thenkhatten Korean film an nin zia an tlangaupui chiam laiin, thenkhatten tih tawp mai an hlauh thu leh, a ning zawnga lo tlangaute khak zawnga awka lo chhuah ve tawk an awm bawk. Enga pawh nise, kei chuan engti hawi zawng berin nge han ziak ka tum pawh ka hre chiah lem lova, a behbawm vela kualin, tute emaw angin, ‘Thlarau thawh dan a zir zelin’ rilru a rawn lut a piang han thai chawpchilh mai ka tum zawk a ni.
    Tunlaia Korean serial film kan buaipui chiam ang hian tunhma deuh han ti ila, hun rei vak pawh la ni loah khan, vai film ‘Kasautii Zindagi Ki’ kan buaipui chiam tawh a, khami hnu deuhah, “Karam Apna Apna’ tih emaw ni? A film hming ka hrefuh chiah engem aw? Kan buaipui leh chiam anih kha!
    ‘Kasautii’ thlipui Mizoramah a tleh lai kha chuan, a buaithlak thin teh anih kha! Cable Network lam ten a chhuah hun tur an han siam a, chumi dar zat hre reng chuan kan chang far a. Naupang mai chu sawi loh, nula leh tlangval, nu leh pate pawhin hmuhnawm an ti em em a, a lo sel ve tawk pawl chu an awm reng tho a ni.

    Khatih hunlai kha chuan tun ang em em hian hnamdang film Mizotawnga lehlin a la awm vak lova, an film lehlin, Pu Buairenga (Bajaj-a) te chhungkua leh Mr. Anurag te vang ringawt pawh ni lo, pa ho thenkhat leh tlangval tan chuan, Sneha leh Kasak-i te leh annu, Prerna (A hming sipel pawh hi dik tak hlawm maw?) te hmuh chak reng rengin kan nghakhlel a. Nu ho lahin Mr. Anurag-a an ti ve chhen zel anih kha.
    Khatih lai khan ‘Kasautii’ avangin kohhran inkhawm an tlem phah a, kohhran hnuaia Committee peng hrang hrang leh NGO Committee neih tum pawhin kal an tlem phah a, khawhar in thlengin ‘Kasautii’ en loh hlauh avang khan kal an tlem phah thin a. Chumai a ni lo, zirlaite pawhin, ‘Kasautii’ chhuah hunlai na na na kha chuan an zirna kalsanin an ‘Kasautii’ zel chu a ni ber.
    Thianpa Duhpuia (Zunzam) pawh hian khatih lai kha chuan, ‘Kasautii’ en loh hlau ber zingah a tel ve ngei ka ring. Kasautii en loh ai chuan Committee naa kal loh mai pawh kha a hreh l...? Nula rim dawn pawhin ‘Kasautii’ en hmasak zet loh chuan chhuahpui theih a ni der lo. Mahse, midang pawh amah ang hi an awm ve thova, dem vak chi pawh a ni lo, a hunlai a ni ve miau tlat a ni.
    Tlemin hun a lo kal leh deuhva, tunah chuan, Mizo zingah, “Korean film” kan buaipui leh ta hle a nih hi. Episode te tein a chhuak a, hmuhnawm leh en chakawm deuhin a tawp  a, a thar chhuah leh hun a nghahhlelh awm duh hle.
    ‘Korean film’ duh pawl leh duh lo pawl indona hi a ngaihnawm ve hranpa hrim hrim. Korean film ti tawp tura duh em em ten, an fate lehkha zir tirin pindan lamah luhtir mahse, Korean film a chhuah hunlai chuan an rilruah engmah a luh chuan loh thu an tlangaupui a, chutih laiin Matric exam zawh hma chu chhuah tawh lo turin awka te an lo chhuah tawh thin a nih kha! Thenkhatten, inkhel awmlai chuan chhuah lo turin an duh a, TV pakhat chauh neih avangin chhungkua intihtauh khum pawh awm ve thei tak tur a ni reng a ni.....
    Korean film en duh pawl ho lahin, an en duh lo anih chuan channel dang a tam a, en mai se, an lo ti vei bawk nen. Chutih laiin, ‘Pa berin inkhel en a duh tlat chuan a en mai tur a lawm. A nupui fanaute te pawh a control mai tur a ni. Korean film hi letling zel ula, lo chhuah zel rawh u’ an lo ti ve mek bawk.
    A behbawm vela kual mai mai kan ni bawk a, tun tumah chuan dan hre mi nih loh chuan a dan ang zawnga khapna lam pang chu sawi vak tum hrih lo phawt ila, a remchan chuan nidangah kan la ziak leh turah ka inngai.
    Engapawh chu nise, Mizote zingah hnamdang film lehlin a larin, kan en tam ber pawh a ni ti ila,  kan tisual tampui hauhin ka ring lo. Tin, tunlaiah, tunhma deuha, ‘Kasautii’ thlipui Mizote zingah a tleh ang em em kha chuan, ‘Korean film’ lehlin ho hi en tam mah ila, a thawk na em em lo deuh! han ti ila, Korean film lehlin duh lo pawl chuan an kalh nghal pang ang tih chu ka ring reng. Entawn tur tha lo tak tak a tam lutuk an ti ngei ang tih ka ring.
    Kei ngei pawhin en ziah hman lem lo mah ila, chhungte berin en loh an hlauh em avang leh, TV pakhat chiah neih chhuna an lo chhuah lai leh an entui laitak, han hmehsawn sak chu inthlahrun awm ve duh tak anih avangin, ka en ve leh fo thin. Mahse, en a sualna em em ka hre hran lova, a hmuhnawm ka ti dawn nge, a ngaihnawm ka ti zawk dawn pawh ka hre thiam chiah lo.
    Mahse, a bik takin, Korean film lehlin kan en ho reng reng hi a tlangpuiin, hmangaihna (Love story) lam a ni tlangpui a. Ka lo hmuh ve dan mai mai chuan, Korean film lehlin ho reng rengah  hian hmeichhe pakhat ngaihzawn rawn leh tlangval pahnih leh a aia tam emaw ten an inchuh rawn a ni duh khawp mai.
    Insual bur bur(action) nasa em em han sawi tur a awm lem lo. Mahse, engvangin nge hetiang nisi, film rumra em em pawh ni lem lo, kan en a, kan ngaihnat tlat kan tih chuan, film hmuhnawm leh hmuhnawm lo innghahna hi action ringawtah a innghat lova, a thu lam hi a pawimawh hle a ni tih a chiang hle.
    Korean film lehlin ho hian zirtir tha lo tak tak a nei em tih lam sawi ka tum vak lem lova, hetiang khawpa Mizo thalaiten an ngainat leh an en tam anih rau rau chuan, engnge zir tur kan neih ve tih lam hi  film kan en atang hian kan zir a ngai zawk niin ka hria.
    An inhmangaih dan kawngah, awihawm lo khawpa mi pakhat tlawm em em angai leh mi thenkhatten an tuar hrep dan kan en a. Engemaw kawng zawng chuan hmangaihna kawngah hetiangte chu a awihawm lo lutuk tih pawhin a ngaihtuah theih awm e.
    Chutih lai chuan, an inhmangaih dan thianghlim tak, naupangte pawhin an en a, nu leh pa mit ti kham tur em em a awm hran vak lem lova, naupang, mi tihdan copy zung zung chingten, an copy tur, midang kutthlak leh insual bur bur leh thisen inchhuah neih nuaih hmuhtur a awm vak lo bawk.
    An khawpui a thianghlim em em a, chu mai a ni lo, an in leh a chhehvel a thianghlim a, bawlhhlawh hmuh tur avang hle. An nu leh pa leh aia upate an zah thiam hle bawk.
    In te takte, chep takah an chan pawhin a fel reuh thlap a, chhuatah eirawng an bawl a, an eirawngbawlna hmunah chaw an ei a, an chaweina hmunah an mu leh mai. Hengte hi an nundan tak tak a ni angem tih chu kan hre phak hauh lo. Mahse, an thianghlimna chi hrang hrang bakah, an mahni an invawngfel leh an thianghlim tel em em maite hi kan entawn atan a tha hle.
    Ho te te sawi mai mai tur chu a la tam hle mai. Mahse, thenkhatten hetiang thu ho lutuk han ziak te chu a, an tih ka ring. A behbawm a ni miau a, tunlaia Mizote en tam leh rilru luahtu pakhat anih miau av^ngin ka duh dan danin ka han ziak rang kual, kikawi ve mai mai a ni. A that lohna lam pang pawh ziak tur tam tak a awm thei ang, A remchan chuan kan la ziak leh zel dawn nia.

- V. Rokhawlkima