Independence Day a lo thleng leh dawn ta a, he ni pawimawh takah hian India rama cinema hall hrang hrangah naupangte tan a thlawnin cinema an chhuah thin a, chuta an film chhuah zin pawl tak chu Sholay hi a ni. Kumin Aug 15 hian Sholay chuan kum 35 a tling dawn a, heti taka upa ni tawh si hlut a la hlawh thei hi, a changtu Amitabh Bachchan chuan mak a ti a, Sholay film an chan dan vel chu nimin maia thil thleng angin a rilruah a la thar reng niin a sawi. He film-a a chanpui a nupui Jaya hi Sholay an chan lai vel khan fa a pai tawh nghe nghe niin a sawi.
Sholay-ah hian Amitabh chu thi angin a chang a, shooting an zawh vek tawh hnu, an tlangzarh hma si khan a tawp lam hi an ti danglam leh tep niin Amitabh chuan a sawi a, he film-a thi anga a chang hi mi tam takin an duh lo ang a, a film hian a flop phah ang tih an hlau hle a, Director hovin an in ko khawm leh rap rap niin a sawi.(Note: Sholay film an channa khua Ram Nagar kan zuk tlawh laite kha a ngaihawm ve ta hle mai! An film channa lung lian pui pui te kha a ngaiin a la awm reng a, chuan Tanky lianpui pawh kha a la awm reng si! Mahse, khatih laia tanky kha a la ni reng em tih ka hre lo! Chutih lai chuan Basanti tia a changtupa au vawng vawng te kha mitthlain ka hmu uai uai a, kham lo taka kan thlir vawng vawng hnuah, Ram Nagar kher kher hian tukthuan eiin kan chawl a, Mysore lam panin kan liamsan leh ta a nih kha............ KKA)
No comments:
Post a Comment