Hollywood actress zingah Sandra Bullock in sum a la lut hnem ber

    Forbes magazine in kum khat kalta a Hollywood actress zinga sum la lut hnemte hming a puanchhuak leh ta a, Sandra Bullock chu la lut hnem ber a ni tlat. Kum 2009 June atanga kumin June thla chhunga an sum lakluh atanga teh a ni a, Sandra Bullock hian dollar maktaduai 56 zet he hun chhungte mai hian a lo la lut a; film chan man atanga a hlawh, a film chan tlangzarh hnua hlawkna a tel, a hminga perfume an siam hralhna atanga a lakluh, a puala thawmhnaw an siam an hralhna atang te leh fakna chi hrang hrang atana an hman atanga a hlawh belhkhawm a ni a. Tih fuh deuh mai a neih chu, 'The Blind Side' film a chanah nidanga a hlawh pangngai aia tlem daih a hlawh a, mahse, he film an tlangzarh hnua sum a lakluh atangin a share a ti tam thung a, chu chuan a sum lakluh hi a ti tha hle a lo ni.

    Sandra hi Speed film atang khan lar taktein a lar chho a, film a chan thiam avangin Oscar award hial lo dawng tawh a ni bawk a, a film chan reng reng a flop thei lo tih mai tur a ni tawh.
    Reese Witherspoon chu pahnihna a ni a, film pahnih ‘How Do You Know’leh ‘Water for Elephants’ a chan atanga a lakluh bakah cosmetic company Avon tana a thawhna atanga a hlawh te nen dollar maktaduai 32 zet a la lut. Cameron Diaz pawhin dollar maktaduai 32 tho a la lut a, Jennmifer Aniston in dollar maktaduai 27, Sarah Jessica Parker in dollar maktaduai  25 la lutin an ni ho hi hmeichhe sum lalut tama Top 5 kai te an ni.