Lunglei Tualchhung News Lawrkhawm

TOA in boulder Trip 10 nen hnatlang in Tlabung kawng an siam dawn:

Lunglei District Truck Owners Association chuan, Lunglei leh Tlabung inkar kawng chhe lutuk siamthain naktukah an hnatlang dawn.
    Lunglei Times in thu a dawn danin, TOA te hian boulder Truck trip 10 an lei a, hengte hi kawng chhuat khuar thuk leh chhe lai hnawhkhahna a tan an hmang dawn. Truck neitute an motor thawh turin an ngen a, Diesel an thun sak ang.
    Lunglei leh Tlabung inkar kawngpui ah kawng a chhiat nasat avangin buhfai phurh pawh a buaithlak sawt hle a, chetsual hlauhawm tak tak hmun a awm tawh an ti a, PWD lamah siamtha turin an ngen thin a, an tih theih mai si loh avangin boulder leiin hnatlangin siamthat hna an thawk dawn ta a ni.

    TOA te hian Luangmual leh Sazaikawn inkar kawng tlang thei lo chuan harsatna tam tak a siam sak tih an sawi a, chhunah lirthei lian ho khawpui chhunga tlan luh phal loh lai phei chuan load lak vek hnuah pawh zanah chauh khawpui a paltlang theih avangin nilenga an din chang te pawh a awm. Tunhnaiah SP an ngenna avanga tlan luh theih hun tih danglam a nih tak avangin an buaina chu a chhawk zang khai ta khawp niin an sawi a ni.
    Hnatlang thawk tur hian Truck neitute leh driver te thawkchhuak theuh turin an in ngen a, Lunglei atanga Chhumkhum thleng inzar pharhin kawng chhe laite siamthat hna hi thawh an tum a ni.

    MZP Hqrs. Lunglei buatsaih Inter Post Matric Football tournament: Thuamluaia Muala neih chu vawiin hian khelh chhunzawm leh a ni dawn a. Vawiina inkhel turte: 11:00 am-ah Govt. J.B College vs DM Higher Academy, 12: 45 pm-ah DIET vs Zobawk HSS, 2: 30 pm-ah KT. HSS vs Govt. College Lunglei te an ni.

HSLC Exam Centre thar tur: Nimin khan Pu. Joseph Lalhimpuia Vice Chairman HPC in Zobawk tlawhin HSLC Exam centre an neih thar avangin lawmpui hun a hmanpui. Higher Secondary School sak tum a nih thu a sawi. A thiannu PI Zochhawnkimi’n upa deuh te hnenah Torchlight a sem.

 Marathon Race Lunglei aiawh turte ko khawm: Naktuk zirtawpni tlai dar 3:00 hian hmannia YMA Sub Hqrs. Lunglei leh A.R buatsaih Marathon Race Competition Lunglei atanga Aizawl kal tur zawnna buatsaiha Lunglei aiawh tura thlan mi 15 te YMA Office-ah Marathon Race Aizawla neih tur chungchang leh thil pawimawh dang sawi ho tura koh leh hriattir an ni a, Lunglei aiawha aizawla kal tur zawng zawngte chu kim taka kal theuh turin an hriattir a ni.