New Zealand hmarlama Karikari tuifinriat kamah Nghapui (Whales) 73 zette chu thi turin an pungkhawm chiam a, zan lam atanga lo awm tawh a tuk zinga hmuh chauh an nih avangin tam takte chu an lo thi hman tawh a; 15 la damte chu tuipui chhunga dah luh leh tuma Department of Conservation in Kaitaia mi leh sa ten an bei ngial chung pawhin ruahsur nasa lutuk avangin an duh angin hna an thawk tha hlei thei lo.
He tuipui kam atanga km khat a hlaah sawn a, chulai tuipuiah chuan dah luh leh an tum a, mahse khawchhe lutuk avanga hnathawk tha hlei thei lovin an awm a ni. Whales thi tawhte chu kg. 1500 vel zela rit an tling hlawm a, zawn sawn tur pawhin mi panga zel a ngai. New Zealand vaukamah hian kum 2007 khan Pilot Whales an tih mai 101 zet chu thih tumin an lo pungkhawm chiam tawh. Whales hoten a hu hova intih thih tuma tuipui kama an pungkhawm chiam thin hi mithiamten mak an ti a, an chhui nasa tawh a tun thlengin a chhan an la hre thei lo.
No comments:
Post a Comment