Lunglei Govt. College-ah zirlai an tam Lecturer an indaih lo

    Nimin khan Pu. Joseph Lalhimpuia Vice Chairman HPC chuan Lunglei Government College a thlawh a, Pu C. Hrangdula Principal Lunglei Govt. College chuan an College-in harsatna an tawh hrang hrang Pu Mahima hnenah hian a lo thlen a, an college dinhmun a tarlanah chuan zirlai 583 an awm mek a, fail re-admission la leh an awmte a nih phei chuan zirlai 600 chuang vel an ni thei dawnin a lang a, College a din tirh atanga zirlai tam ber kum a ni a, hetih lai hian an building-in a dawl zo chiah tawh lova, exam hunah phei chuan corridor-ah thutthleng remin an exam thin thu a sawi a, chuvang chuan exam hall neih an mamawh thu a sawi.

    Hei bakah hian Aizawl lama College ten Lecturer an indaih em em laiin an college-ah chuan an indaih loh hle thu a sawi a. Department pali, Mizo, Political Science, Philosophy leh Geography-ah te phei chuan Regular Lecturer 1 theuh chauh an neih thu a sawi a, English Deptt.ah pawh Regular Lecturer 2 chiah neiin an lecturer pakhat phei chu P.hd beiin hmun dangah a awm thu a sawi a, Economics Deptt.ah regular lecturer hi 2 chiah an neih thu a sawi a. Hetiang a ni chung hian Contract Basis-a thawk leh Guest Lecturer pawh an mamawh tawk an neih loh thu a sawi a ni. Mizoram College upa ber dawttu dinhmun chu hetiang hi a nih avangin sawrkar pawhin lecturer hi pek belh thei se a duhthu Pu. Mahima hnenah hian a thlen a ni.
    Hei bakah hian Pu. Dula hian kum 2005 atang khan an College chuan kumtin top- 10 a lang an neih ziah thu sawiin, kumin khan Match Deptt.ah phei chuan an zirlai pahnih ten paper II leh IV ah te full mark an hmuh thu a sawi a. Heng zawng zawng hi an lecturer te inpekna leh thawhrimna a ni a, an chungah lawmthu a sawi bawk.
    Pu. Mahima pawh hian thusawiin, Lunglei Govt. College chu a lo thawh ve tawhna a nih thu leh hetianga result tha tak tak an nei chho thei chu lawmawm a tih thu sawiin, an hotute pawhin an thawhrimna chu a hriatreng thu a sawi a, an mamawhna kawng hrang hranga a theihna kawng apiangah puih a inhuam thu a sawi a, chutih rual chuan an thil phut leh mamawh an thlente ziaka thehluh ringawt ni lovin a bawhzuina kawngah pawh theihtawp chhuah turin Principal leh Lecturer te chu a chah nghal a ni.