Nimin khan Pu. Zodintluanga Sports Minister chuan, Vaibelchhe 34 senna tur State Sport Academy Zobawk a mi chu tlawhin, kumin chhung ngei hian hna tan tum a ni ang a ti. Nimina State Sport Academy Zobawk Minister-in a tlawhnaah hian, sawrkar Officer thenkhat bakah Media lam leh Party hruaitute'n Minister hi an tawiawm a ni. Helai hmuna hnathawh dan tur hrang hrang te Minister hian chipchiar tak a enin, Engineer ten thil nih dan tur an hrilhfiah bawka, Minister chuan, helai hmuna Sport Academy siamna tur hian sawrkarlaipui chuan Cheng Vaibelchhe 34 min phalsak tawh mai bakah tunah hian hna tanna turin Cheng Vaibelchhe 6 min pechhuak tawh a, he sum hmang hian kumin chhung ngeiin, hna hi thawh tan a ni ang a ti.
Zobawk a State Sport Academy turah hian,Football Ground leh Hockey Ground bakah Tennis, leh Volley Ball Court bakah, Running Track Metres 400, 8 Lanes siam a ni bawk ang a, Long Jump, High Jump leh Pole Volt tihna tur te Runway awmin siam a ni dawn bawk a ni. Hei mai bakah hian Indoor games chi hrang hrang khelhna turin Indoor Stadium Chhawng thum sak a ni bawk ang a, hengah te hian Indoor Games chi hrang hrang bakah Shooting Range Archery Range te pawh a awm tel dawn bawk a ni. Infiamna hmun tur chi hrang hrang siam a nih bakah hian Hostel mipa leh Hmeichhe awmna turte, thawktu Quarter engemawzat leh Guest House changkang tak sak a ni bawk ang a, helai hmun hi Tui lamah leh Power Supply lamah harsatna tawklo turin buatsaih tum a ni dawn thu Sport Minister hian a sawi a ni.
No comments:
Post a Comment