Dangdai - 2

Myanmar mi zawk a upa ber em ni?:     Myanmar mi Daw Mya Kyi chu khawvela hmeichhe damlai zinga upa ber niin Xinhua chuan a puang a, kum 118 mi a ni tawh, a ti. Khawvela damrei bera an lo chhal thin French hmeichhia Eugenie Blanchard aiin kum li in Mya Kyi hi a upa zawk a ti. Mya Kyi hi kum 1892 a piang a ni a, Blanchard hi 1896 a piang a ni, tiin social welfare deptt. chuan a puang.
    Daw Mya Kyi hi Mandalay Division a Puak Chan Kone thingtlang khuaa cheng a ni a, a hriselna a la tha hle niin an sawi. Myanmar-ah hian mihring maktaduai 58.3 an awm mek a, heng zinga maktaduai 5.13 te chu kum 60 chin chunglam an ni a, he rama cheng mihring 100 zela 11 te chu kum 60 aia upa an ni.

Mipat hmeichhiatna hman vangin lung in an denghlum:     Afghanistan a Taliban rorelna hnuaia la awm Dasht-e-Archi district-ah Pathianni kalta khan mi pahnih mipa leh hmeichhia, an hming an puanzar lohte chu innei si lova, mipat hmeichhiatna an hmanga hriat a nih avangin Mullah Quli  a bazar lun lai takah lung a denhlum an ni. Taliban firfiak hote chuan hemite chanchin hi chhiar chhuakin lungin an denghlum zui a, an ruang te chu an chhungte hnenah an pe. Muslim firfiak Taliban ho hian innei si lova mipat hmeichhiatna hmang reng reng chu tihhlum tur an ti a, thla hmasa khan hmeithai pakhat raipuar pawh silai in an kaphlum a ni.

Sacrament ei turin 310,000 Mexico-ah an pungkhawm:     Pathianni kalta khan Mexico rama Guadalajara khawpui a La Luz del Mundo (The Light of the World)  Biak Inah sacrament sem a ni a, khawvel ram hrang hrang 43 atangin 310,000 zet an tel. Biak Inah hian mihring 15,000 an leng a, heng mite hnenah hian Puithiam  100 zette chuan chhang leh Grape Juice semin sacrament hi an buatsaih a ni.