‘Rancho Das-a school chuan ‘All in not well’ an ti mek

    Ruahsur nasa avanga tuilian leh leimin in a chhiatna a thlen avangin Ladakh-ah chuan Prime Minister Manmohan Singh, AICC General Secretary Rahul Gandhi, Jammu & Kashmir CM Omar Abdullah leh mi pawimawh tak tak an kal a, heng zingah hian ngaihven hlawh ber chu bollywood star Aamir Khan a ni daih. '3 Idiots' film lar vanglai a ni bawk a; a ni hi a lar ber. Ruahsur nasa avanga Tuilian leh leimin avanga tuarna thleng mek chu pawi a tiin chhiat tawkte tanpui turin ram pum kan tanrual a ngai,. a ti.

    Leh - Manali kawngpui kama The Druk White Lotus School a tlawh a, he school in chhiatna a tawrhte enin tanpuina a theih ang anga khawnkhawm sak a tum. He School hi 3 Idiots a Rancho School anga an hman kha a ni a, kha film a 'All is Well' tawngkam lar tak kha, he School tan hi chuan All is not Well tih a ngai ta rih a ni.
    Aamir Khan hian chhiatna tuarte tanpuina a tan hian PM relief fund-ah sum a thawh ve dawn tih a sawi a, a zat erawh a sawi lang lo. Aamir Khan chuan henglaia chhiatna thleng avanga mi 200 in an thih phah thu leh chenna in 10,000 zet a chhiat avangin a filmstar puite hnenah pawh tanpuina pe turin a ngen kual dawn tih a sawi a, 3 Idiots director pawhin tanpuina a pek tur thu a sawi.
    He hmuna kal tur hian 3 Idiots director Raju Hirani pawh a sawm a, a ni hi a thei lova, he film a Rancho naupan lai lema changtu Shoib Ahmed nen an kal a, lawm an hlawh dun khwp mai. Shoib Ahmed  hi Delhi Public School a Class V zirlai a ni a. A puitlin hunah Aamir Khan anga actor nih a tum em? tih an zawt a, Scientist nih a tum thuin a chhang a ni.