Govt. J.B College atangin mi 987 in B.A an pass tawh ‘Zirlaite, nu leh pate phurrit satliah mai kan ni tur a ni lo’ - PC. Zoram Sangliana, A&C Minister

Lunglei 25th, August : Vawiin khan Govt. J. Buana College Lunglei chuan Fresher Social Programme Saikuti Hall Lungleiah an hmang a, he hun hi H. Muansangpuia, Vice President Students Union GJBC in a kaihruai a, khuallian Pu. PC. Zoram Sangliana, Art & Culture, Transport Minister chuan a hmanpui a ni.
    College Principal Dr. J. Zorema chuan thusawiin, kuminah an College-ah zirlai lu thar 229 an awm a, a pumpuia zirlai awm zawng zawng chu 367 an nih thu a sawi a, an college building a chhia a, a hmun hma a nuam em em lova chuvang chuan an College-a zirlaite chu tih tak takna nen an zirlai zir turin a fuih a, tih tak takna tel lova kal ve mai maite tan an College-ah hmun a awm loh thu a sawi.

    J.Buana College chu kum 1983 kumah din tan a nih thu sawiin, harsatna nasa tak tawkin, sum lamah pawh harsatna lian tak an tawh avangin Pu. J. Buana’n Rs 2,00,000/- a pek atanga kal chhunzawm zel thei a nih avangin College hmingah pawh Pu. J. Buana hming chawi tir a ni a ti a, a din tirh atanga kumin thleng khan he College atang hian mi 987 in B.A an zirchhuak tawh a ni a ti.    Hetih rual hian tun dinhmunah an College-ah zirtirtu an indaih loh hle thu a sawi a, Aizawl lamah Deptt. khatah lecturer 8/9 te an awm laiin an College-ah chuan pathum (3) chauh zel an awm thu a sawi a, an lecturer te chu an thawhrim thu leh an inpekna avangin result tha tak tak neih thin thu sawiin, sawrkarin zirtirtu pek belh thei se a duhthu a sawi a ni.
    Hei bakah hian an College building chu 1980 vel laia Mizoram Polytechnic tura ruahman a nih avangin a building a hluiin a chhe tawh hle a, sawrkarin a building sa tha tura
    Tunah hian UGC atanga fund lo kal hmangin an College Campus-ah women College building tur sak tan mek a nih thu a sawi bawk.
    Khuallian Pu. PC. Zoram Sangliana chuan, Zirlaite chu nu leh pate phurrit satliah mai ni lo turin a fuih a, tunlai thalai tam tak, zan mut nachang hre lo, thawh nachang hre lo ei duh em em ringawt anga awm ve mai lo turin zirlaite hi a chah a ni.
    Hei bakah hian zirlaite chu an colleg ti hming thatu ni theuh thei turin zirna lamah tan la turin a chah a, engti tura lehkha zir nge kan nih tih chu zirlai ten kan hre reng tur a ni. Kan thil hriat loh chu zawh kan hreh tur a ni lova, thil hre hauh si lo, hria anga awm hi a zahthlak zawk mai bakah mi mawl ber thawmhnaw a ni a ti. Hei bakah hian zirtirtute pawh an zirlai text bu ringawt pawh ni lo, tunlai khawvel hmasawnna kal zelah zir tur tam tak a awm a, chungte chu an zirlaite zirtir ve thin turin a chah bawk.
    Minister chuan zirlaite chu mahni hnamzia lak atanga an bo a hlauh thu sawiin, mahni hnamzia ngaisang a, ngai pawimawh zel turin a chah a, kan hnamzia kan hloh a nih chuan chimral ngai lovin chimral sa kan ni tihna a ni dawn a, chuvang chuan mahni hnamzia ngaisang a, ‘Cultural Revolution’ hi kan ramah kan thlen tir angai a ni a ti.
    Hei bakah hian Minister chuan zirlaite chu an mahni siamtu Pathian hrereng turin a chah a, Fapa Isua Krista avanga Van khua leh tui kan ni hi kan engkim dang zawng ai pawhin i chhuang ber zel ang u a ti. Minister hian Govt. J. Buana College tan hian P.A Set leh Guitar a pe bawk.