Lunglei Tualchhung News lawrkhawm

Indian Republic Day lawm dawn:

Indian Republic Day 2011, April ni 26-a lo thleng tur chu Lungleiah pawh lawm tura inbuatsaih mek a ni a, Thuamluaia Mualah zing dar 10:00-ah khuallianin hnam puanzar pawtparhin Parade chibai a chhanglet ang. Hei bakah hian chhun dar 12:00Pm ah VIP at Home DC lawn ah neih ni bawk ang. Republic Day pual hian Lungleia Home hrang hrang leh Dist. Jail te thil pek tum a ni bawk.

MJA Lunglei General Meeting nei dawn:

Vawiin chhun dar 12: 30 - 2:00 PM inkar hian MJA Lunglei General Meeting Lunglei Press Club-ah an nei dawn a, thu pawimawh tak tak an rel ang. Member-te kal vek turin Gen. Secy. Tv. K. Lalrochana chuan a hriattir a ni.

Chawngte ‘L’ ah an in vawhlum:

Chawngte atanga kan thudawn danin, nizan hmasa khan Chawngte ‘L’ Halipad veng a mi Kapduailova kum 45 mi vel chu Lalzarzova S/o Saitawnlovi Chawngte ‘L’ vek chuan a vawhlum a, hemite hi inthenawm lawk niin hetianga an invuakhlum chhan leh thil awmdan chiang zawka hriat tumin Chawngte lam hi biakpawh leh tum a ni a, inbiakpawhna lamah harsatna a awm avangin thuchiang kimchang kan rawn tarlang thei lo a ni.

Sumo accident-ah mi 3 an hliam:

Niminpiah thawhtanni tlai khan Tiparagath - Tuipuibari pana sumo tlan MZ-02 7587 Jona Chakma Tuichawnga mi ta, Udipan Chakma (21) S/o Satia Dal Chakma, Mamit District-a Silsuri khua a mi khalh chu Zotlang khawchhungah accident-in a chuang mi 9 zinga mi 3 in hliam an tuar a, hliar tuar mi 2 te hi an ban ruh tliakin damdawi inah dahluh an ni a, pakhat erawh chu hliam na lutuk a tuar loh avangin admit a ngai lo a ni. He chetsualna tawkte hi Tuipuibari-a Young Chakma Association Conference hmang tura kal niin hetiang hian chetsualna an tawk ta a ni.

Mizoram Calendar lei theih:

Mizoram Calendar 2011 chu Lungleiah pawh lei theih turin a lo thleng ta a, vawiin chawhnu atang hian PRO Office Bazar vengah hralh chhuah a ni ang. Pakhat man hi Rs 30/- zel a ni.

Accident-a hliam tuarte YMA Sub. Hqrs.in a tanpui hlawm:

Niminpiah zing Belthei thlen hmaa Bus accident-a hliam tuar damdawiina awmte tan Farmveng Branch YMA chuan thisen an pe a, hei bakah hian YMA Sub. Hqrs. Lunglei hruaitute chuan accident-na hmunah thenkhat kalin thenkhatten Lungleiah an lo hmuak a, Serkawn Hospitala hliam tuar awm mi 12 te leh Civil Hospitala awm hliam tuar awm mi 25 te chu tlawh chhuak vekin tanpui an ngaihna zawnah an tanpui hlawm a. Hliam tuar damdawi Ina awm ngai lo hawnna nei lote pawh Rs 500/600 te pein an tanpui hlawm a ni. Hei bakah hian hmunpui lama enkawl ngai refer pakhat awm chu Rs 1000/- in an tanpui bawk. Hemi chungchangah hian Lunglei Times chuan Pu. P. Lalhmangaihzuala President YMA Sub. Hqrs. Lunglei chu biain, Pu. Hmaa chuan accident-a hliam tuar Civil Hospital-a awmte X-ray tihna man mi 35 tan an peksak thu leh accident thlen zana emergency mamawh damdawi man ba leh a tul thenkhatte pawh YMA Sub. Hqrs. Lunglei chuan an peksak thu a sawi a ni. Hei bakah hian accident thlenna bul hnai khua Belthei Branch YMA te tanpui nan Rs 1500/- an pek thu sawiin, Pu Joseph Lalhimpuia, MLA, Vice Chairman HPC pawhin Belthei Br. YMA te tanpui nan hian Rs 1500/- a pe bawk a ni.

NLUP hman tanna Inkhawm Zirtawpniah nei dawn:

Mirethei leh eizawnna nghelnghet nei lo, kuthnathawktute khaichhuahna tur atana Mizoram sawrkarin a duan NLUP hman tanna inkhawm chu a rualin Mizoram pumah ni 14.1.2011 naktip zirtawpni hian District tinah neih tur a ni a, Lunglei District chuan Saikuti Hall ah chawhma dar 11:00 ah inkhawm hi hman ani ang. Khuallian ah Pu.P.C Lalthanliana Minister, LAD etc. niin khual zahawm ah Pu.S.Laldingliana Parliamentary Secretary. Pu.Joseph Lalhimpuia MLA/Vice Chairman HPC Lunglei leh Pu.John Siamkunga MLA South Tuipui te an ni ang a, Special Guest ah Dr.R.Lalthangliana MLA hman a ni dawn bawk a ni.

Missionary Day urhsun taka hman a ni:

Nimin January 11, 2011(Nilaini) kha Mizorama Chanchin Tha lo luh Ni champha a ni a. He ni hi Mizoram pumah urhsun taka hman a ni.

 Sap Upa leh Pu Buanga’n Arthington Aborigine Mission tirh a January 11, 1894 a Sairang an rawn luh ni chu Missionary Day atan hian kum tin hman thin a ni a, kum 1994 atang khan BCM leh PCI-te ngenna ngai pawimawhin Mizoram State Sorkar chuan hemi ni hi chhuti ni (public holiday) ah a lo puang ta a ni. Mizoram Baptist Kohhran chuan nimin khan chhun leh zan lamah Pathian Biak Inkhawm neiin Lunglei khawpui chhung veng thenkhatah phei chuan Missionary Day lawmin ruai an theh nghe nghe a ni. BCM chuan Missionary Day Thupui atan “Eng lo awm rawh se” (Genesis 1:3) tih hmangin Pathian thuchah an puang chhuak a ni.