Lunglei Tualchhung News lawrkhawm

Tualthattu Distric Jail-ah dah:Nimina kan rawn tarlan tawh, Chawngte ‘L’ Halipad veng a mi Kapduailova kum 50 mi vawhlumtu Lalzarzova S/o Saitawnlovi Chawngte ‘L’ chu thawhlehni tlai khan amah hi Lunglei Police Station-ah a rawn in pe a, nimin khan Court-ah kalpui niin nimin vek khan District Jail-ah dahluh nghal a ni.

A vuakhlum tak Kapduailova hi MAP niin, thawhtan zan hian an inhlial buai avangin an insual a, Lalzarzova (26) hian thing 2x3 hmangin a tukkhumah a vaw ta niin kan thudawnna chuan a sawi. An insualna hmun hi Chawngte ‘L’ mual Pavilion-ah niin a tlai lam dar 5:00 vela insual niin a ruang hi a tuk zingah chauh an hmu niin kan thudawnna chuan a sawi a ni.

Pu. S. Dinga P/S lo kal dawn: Pu. S. Laldingliana Parliamentary Secretary pawh vawiin hian Aizawl atangin Lungleiah a rawn phei ang a, naktuka NLUP hawn tanna inkhawm Saikuti Hall-a neih turah khualzahawm niin he hun hi a hmanpui ang. Pu. Dinga hian Lungleia a cham chhung hian a bial chhung khaw hrang hrang tlawhin a zin chhuak ang a, karleh nilaini vek, ni 19 hian Lunglei chhuahsanin Aizawl lamah a kir ve leh bawk ang.

Pu Mathana khuallian dawn: Pu. PC. Lalthanliana LAD & Social Welfare Minister chuan vawiin hian Aizawl atangin Lunglei a rawn phei dawn a, naktuka NLUP hawn tanna inkhawm Saikuti Hall-a neih turah khuallian a ni ang. Lungleia a cham chhung hian hmun pawimawh hrang hrang Football Ground atana rawt hmun te, LAD Park atana rawt Pukpui hmuna awmte a tlawh bakah, karleh thawhlehnia Thirteenth Finance Commission Training A&C auditorium-a neih turah khuallian a ni ang a, a tuk nilaini ni 19 hian Lunglei chhuahsanin Aizawl-ah a kir leh ang.

Intermediate Meet nei dawn : Tunkar Inrinni lo awm turah hian Mizoram Baptist Kohhran Lunglei South ABC huamchhunga Kohhran hrang hrang Sunday School Intermediate Deptt. te chuan BCM Salem Biak Inah Meet an nei dawn a, hun hlimawm tak hmangin Quiz hmang tein an intihsiak dawn bakah thil pawimawh tak tak zirhona hun an hmang dawn a ni. BCM Kohhran hrang hranga Intermediate zirtute leh Zirtirtute kim taka kal theuh turin an inngen a ni.