Daniel Craig an Bond role bakah role dang a chan belh dawn

James Bond a chang mek Daniel Craig chuan, role pawimawh tak chan tur a nei leh dawn a, Hollywood in 'The Girl With the Dragon Tattoo' a siam turah a changtupa berah an hmang dawn niin website thenkhatah tarlan a ni a, a chiang tawh angin an ziak nghe nghe. Hetih lai hian Brad Pitt chang tur anga ziak pawh a la awm tho a, chuvangin an la thlang fel chiah lo pawh a ni maithei bawk.   

Swedish ziaktu lar Stieg Larsson a lehkhabu ziak behchhana chan tur a ni dawn a, Sweden-ah chuan a film hi siam a lo tawh hlawm a, a hlawhtling a, chuvangin Bollywood lamin khawvel huapin an siam veleh dawn a ni.  

Journalist pakhatin hmeichhe naupang chin hriat loh a bo daih a zawn dan a ni ber a, hetah hian dragon tattoo an tih mai Lisbeth Salander an a zawnpui bawk a, chutiang ang vel chu a ni e. Thawnthu pathum 'The Girl With the Dragon Tattoo', 'The Girl Who Played With Fire', leh 'The Girl Who Kicked the Hornet's Nest' te chu Sweden-ah film a siam a ni tawh. He film director a tan hian director David Fincher thlan fel a ni tawh a, film thum hian a direct dawn a, Daniel Craig nen Los Angeles-ah an inhmu thuai dawn, an ti. Daniel Craig hi a lo chang ta a nih pawhin James Bond film a chan erawh a ti buai dawn chuang lo a ni.