ZIAKFUNG 3rd March, 2024

 Ziakfung Weekly News chhiar duh tan rawn chhawpchhuah a ni e.

ZIAKFUNG Horoscope:

 Aries (March 21 – April 20)
Kum kal taa i thil tihsual lian deuh kha theihnghilh hmak tum la, insiamtha zawk rawh. Thian sual vangin chhas inkarin chhiat lam a pan a, thian tha avanga siamthat theih a ni. Zirlai, sumdawng leh infiammite tan ngawrh lehzuala beihna hun tha a inhawng dawn.

Taurus (April 21 – May 21)
Chhungkuain hun hlimawm tak hman tur in nei dawn e. Chhas lam a tha thawkhat a, puipunna lama chhuah dun tam loh erawh a tha. Kohhran thilah zin chhuahna rem chang a awm dawn a, hlah suh ang che. Thil chhinchhiahtlak tak i tawnna tur niin a lang.

Gemini (May 22 – June 21)
Ruihtheihthil leh zuk leh hmuam lamah i insum deuh a ngai e. I hun kal tawhte avanga inchhirna lian tak i nei dawn a, rilru fim taka ke i pen zel a pawimawh ang. Chhas dinhmun a tha a, thil tha deuh present tur che a nei niin a lang. Zin mi tan hun tha a ni lutuk lo. Tawm tam a pawimawh ang.

Cancer (June 22 – July 22)
Hriselna lamah harsatna tenau i tawk dawn a, damdawiin i pan pawh a ngai hial maithei. I taksa i enkawl uluk loh chuan i tuar zel dawn. Chhas dinhmun a nghing deuh va, a thlakna tur melh ruk a fuh ang. Infiammi tan ram pawna chhuah theihna chance a inhawng dawn a, i bawhzui thiam chuan i kumkhaw sawi tur thil i tawng dawn.

Leo  (July 23 – August 21)
Chhungkuaa buaina ruk tak thûk tak ni si in tawh kha a reh thut dawn. In chhungkuaah i pawimawh a, theihtawpa tan i lak chuan ngai in awh leh vat ang. Chhas lampang a tha vak lo va, in inthen a nih pawhin beidawng suh. A dang a rawn lang leh nghal dawn a, khabe hman thiam hun tak a ni dawn.

Virgo (August 22 – September 23)
Thian tha tak i chhar dawn a, i hman thiam chuan in chhungkaw khawsakna thlengin a tangkai dawn. Chhas lampangah chuan kum eng emaw zat kal taa i then tawh kha a lo lang leh dawn a, lo inhawn viau a fuh ang. Sumdawngmi tan hun tha a ni a, hriselna pawh a tha tluang rih viau ang.

Libra (September 24 – October 23)
Hun pawimawh tak i hmang mek a, vanneihna lo thleng tur pawh a inmung mek e. Kar hnihna velah thil lawmawm lo thleng tur a awm a, dawhthei takin nghak rawh. Chhas lamah chuan tlema tan lak deuh a ngai. A rinna che a hloh palh vaih chuan a ring leh thei tawh dawn lo che. Care lehzual a ngai.

Scorpio (October 24–November 22)
Sumdawng tan hun tha a ni lo va, nangmah ertute avangin i tuar thei a, i hnuaia thawkte vil uluk lehzual ang che. Chhas nei tan rilru natna tur a tam a, i paltlang chuan vanneihnain hmawr a bawk ang. Tlanghri leng a tam avangin pawn i chhuah tam chuan i hriselnain a tuar thei.

Sagittarius (Nov  23–December 22)
  I hma lawkah hamthatna lo thleng mai thei tur a awm niin a lang a, hma i sual luat erawh chuan i hma lawka hamthatna leh vanneihna lo thleng tur i chân duai thei. Chhas lampang a pangngai rih viau a, tan la sauh sauh ula, nupui pasal inneih thleng pawhin a zui thei.

Capricorn (December 23–January 20)

Chhas lamah tan i lak a ngai. I hmangaih deuh khan nangmah kawp duhna rilru a nei tan. I care tawk lo va, nangmaha a beisei i tihlawhtling lo va, a pawi thui thei. Kohhran lamah lansarh deuh pawi loh lai tak a ni. Thiante inneihnaah thian hlui i tawng dawn a, hun hlimawm tak in hmang dawn.

Aquarius (January 21–February 19)
Tunlai chu hmangaihna lamah i tluang deuh purh ang. I bawhzuia i chhunzawm that chuan nupui pasala inneih a fuh ang. Nu leh pate tan fanau enkawl kawnga tan lak a tul lai tak a ni a, in fate’n thlemna an tawk dawn a, an chin i hriat a fuh ang.

Pieces (February 20 – March 20)
Fimkhur taka nun i hman loh chuan i hmangaih i chân thei. Hun tha lo a lo lang a, i chhas-in rinhlelhna che a nei tan a, chu chu i tihbosak a ngai. Chhungkaw lamah harsatna lo thleng thei hnaivai a awm a, pumpelh thei erawh a ni. Eizawnna lamah harsatna tenau a awm dawn a, thil pawi thui tur a ni lo thung.

LUNGLEI MISS CHAPCHAR KUT 2024 ATAN ZORAMPARI, RAHSIVENG NULA THLAN A NI:

1st March, 2024 : Vawiin khan C. Thuamluaia Mual, Lungleiah Chapchar Kut lawmna hun hman a ni a, MJA Lunglei te bultumin, Miss Chapchar Kût 2024  atan Zorampari, Rahsiveng chu thlan a ni.

Miss Chapchar Kut Rahsiveng nula, Zorampari  (Papari) hi Zothanzuala Hnamte leh Vanlaldiki Sailo te fa pathum zinga naupang ber niin, ni 27.09.2003 khan piangin pianpui unau mipa pakhat leh hmeichhia pakhat a nei.Tunah hian B.A IV Seme

ster, Lunglei Govt. College-ah zir mekin nula nungchang tha  leh hleitling tak niin, 5.5ft. a sang a ni.

Kohhran leh khawtlangah a phak ang tawka inhmang mi niin BCM Rahsivengah an lawi a. Rahsiveng Branch YMA Cultural leh Section-ah te Committee Member a ni mek bawk.

Miss Chapchar Kut 2024 hnenah hian, pawisa Fai Rs 10,000/-, Memento, Sash leh Vakiria te hlan a ni bawk.

Carabao Cup Final khel tur Liverpool vs Chelsea

     Pathianni zan dar 8:30 khian Wembley Stadium-ah English Carabao Cup final khelh a ni dawn a, English team lian pahnih; Chelsea leh Liverpool an inhmachhawn dawn.

    Final-a intum tur Chelsea leh Liverpool hi team inang lo tak an ni a, season kal mekah an inchetthat hleih hle. London club lian Chelsea hi English Premier League-ah a che chhe viau a, 10-naah aia sangah an awm hleithei meuh lo. Final-a an khingpui Liverpool an hneh nawlh a nih loh chuan season kal mekah trophy dang beisei tur an nei ang hial a ni. Chumi a nih vang chuan an tan Carabao Cup-a champion a pawi mawh dawn hle.

    Chelsea ang lo takin Liverpool erawh inelna hrang hrangah an chetha tluang viau thung. English Premier League-ah hma an hruai mek a, Europa League-ah last 16 an lut tawh a. FA Cup lamah pawh champion tura rinkai ber zinga mi an ni mek. Trophy lian pali la kawp thei dinhmun duhawm takah an ding mek a. An manager chhuak tur Jurgen Klopp thlah nan trophy lian pali lak kawp an tum dawn a. Carbao Cup hi an trophy lak theih hmasa ber a nih vangin champion an tumruh hle ngei dawn.

    Chelsea hi EPL an khelh hnuhnung berah an khel tha viau a, champion lai Manchester City nen Etihad Stadium-ah 1-1 in an inhnehtawk. City lakah an chetthat vangin an tan tun hi Liverpool hmachhawn tura hun tha, inrintawkna an neih san lai leh an phur vanglai a ni dawn. Hetihlai hian Liverpool pawhi EPL an hmachhawn hnuhnung berah Luton Town chu 4-1 ngawtin an sawp ve tho bawk a, champion turah an inngai nghet thei hial ang. Wembley-a an khingpui tur Chelsea hi January 31, 2024 khan 4-1 ngawtin an lo sawp tawh bawk a. Chelsea hneh nawn leh turin an inringtawk hle ngei ang.

    Wembley Stadium-ah final khelh turah hian Liverpool hi champion tura rinkai zawk an ni a. Final boruak sangah inlehthalna a thleng duh viau tho bawk a. Chelsea hi an champion ve nawlh thei tho bawk.

PHAR NATNA VEITUTE KA CHIBAI VE TA

October ni 9, 2012 zing khan Tlabung lam panin ka zin a, chhun dar 12: 30 pm velah Tlabung hmun thlengin, ka thlenna Zodin-ah ka bungrua te nghatin ka han awm hahdam deuh hlek hnu chuan, Tlabung hmuna awm ka cousin Mazuala chu hmun ka tlawh tur awmna vel ka hriat loh avangin min kalpui tur chuan ka sawm a, kan pahnihin Tlabunga ka tlawh tum hmun hrang hrang tlawh tur chuan Taxi hmangin kan tlan ta a ni.

(T. Shirt Pawl ha hi keimah ka ni)

            Zodin atangin Tlabung Civil Hospital lam panin kan tlan thla a, Civil Hospital piaha kawng peng lamah chuan Phar Damdawi In pan chuan kan tlan phei zel a, thui em em pawh tlan ngai lovin kan piah lawka, “Leprosy Hospital, Tlabung” tih lo intar leh Phar Damdawi In building hmun fal deuh raiha lo awm chu kan hmu ta. Taxi atanga chhukin Phar Damdawi In building thla te chu ka lak zawh hnuin damdawi In chhung lama lut tur chuan ka han inbuatsaih a, vawikhatmah phar la hmu ngai lo ka nih mai bakah, engtia han biak tur nge ni ang a, engtin nge min lo dawnsawn ang tih pawh ka ngaihtuah thiam chiah lo. Mah se, hei leh chen ka kal tawh a lawm tiin, Damdawi In chhungah chuan ka han lut ta a ni.

           

Phar Damdawi In ka tlawh chanchin tawite ka ziak tak tak hmain, Mizorama Phar enkawlna damdawi In (Leprosy Hospital) awm chhun Tlabung a mi hi 1978 khan din tan a ni a, Phar enkawl/mutna  khum awm tura tih a ni a, tunah hian Phar enkawl lai mi pathum (3) an awm mek a ni.

           

Leprosy Mission lam rawngbawlna sermon vawi tam tak lo ngaithla tawh mah ila, tu emaw sawi angin, “Phar te ka hmuh chuan ka chibai miah lo ang a, min lo chibai hmain, kut pahnih suihin, ‘NAMASTE’ tiin kun zeuh zeuh ila a ni mai” tia a sawi kha ka ngaihtuah chhuak a, kei hian tunah phar natna vei mektute chu ka hmu dawn ta a, ka chibai ang nge chibai lovang tih pawh ka ngaihtuah nasa hman hle a, amaherawhchu, eng nge ni raw sek sek ka chibai loh ang, an mahni chu ten leh an deh hlau tak anga ka awm min hmuh ka duh lo hrim hrim, chuvang chuan ka chibai ngei tur a ni tiin, ka rilru ka siam fel ta a ni.

PHAWNGPUI TLANGA’N

Tuanzai relin an sawi Phawngpui tlanga’n,
Riahrun sawnin tlang lawn zai kan rel e;
Zothlifim leng vel hah tidam tura’n,
Thaw heuh heuh, hlim ten dawn zai kan rel e.


Khua chuan, hawi velin romei lo zam e,
Hring len vangkhua leh raltiang tlang thliri’n;
Chawngpereng tel lo, hlimzai kan vawr e,
‘D’ tel ve lo, hlim te a, lam thaii’n.


Tlangbawm Chhawkhlei par leh Nauban parte,
Vul zai a rel,  par an chhuah tlang mawia’n;
Tel ve lo ‘D’ tan thliah ka nuam ngei e,
Thliah rem lo par, vul reng la tlang mawia’n


Kan tuanna Farpak, Phawngpui tlang kha maw,
Tialpari puk nen tawn leh ni awm maw?

Shakespearan sonnet
Rhyme: abab cdcd efef gg
Iambic Pentameter
Dt. 24th March, 2012

KAN HNAM NUNZIA LEH NUNPHUNG THANGTHARTE THINLUNGAH TUH A TUL

“Kan hnam nunzia leh nunphung thangtharte thinlungah tuh a tul” tih  thupui hmangin thu kan sawi dawn a, a hmasain thangtharte thinlunga kan tuh tur kan hnam nunzia leh nunphung kan tih tak chu eng nge ni ang? Kan hnam nunzia leh nunphung tam tak zingah a zawng a zain thangtharte thinlunga tuh hi a tul vek angem tihte pawh kan ngaihtuah tel erawh a tul awm e. Tun tumah chuan kan hnam nunzia leh nunphung, kan pi leh pute hunlaia an lo chin dan thin, nunze mawi leh entawn tlak, an khawsak dan chungchanga an nunphung tha tak tak, hun lo inher zela tunlai thangtharte khawvel lo inher chhuakah, khang kan pi leh pute hunlaia kan hnam nunzia leh nunphung tha tak takte kha kan theihnghilh mai lohva, kan chhawm nun zel theih nan thangtharte thinlungah a tharah kan tuh zel hi a tulin a pawimawh em em a, chutianga thangtharte thinlunga kan tuh tul ang chi thenkhat emaw chauh kan sawi hman dawn a ni.

       Ka han sawi lan tel leh duh hmasak chu, khawvela hnam tinte hian an pi leh pute hunlai atanga lo chin thin dan, hnam nunzia leh nunphung ze nghet tak an nei theuh hlawm a, hetianga hnam zia leh nunphung hran neih hi thil pawimawh leh tangkai tak niin, hnam hrang hrangte kan inhriat hran a, a tha lo zawng ni lova kan inthliar hran theihna thil tangkai tak a ni. Chutiang bawk chuan keini Mizote pawh hian kan pi leh pute hunlai atang tawhin  lo chin thin dan hnam zia (culture) leh hnam nunphung kan nei ve a, khang kan hnam nunzia leh nunphung tha tak takte kha; thangthar lehzel hun kan lo chuankai hian a bo telh telhin, nakinah phei chuan kan hnam zia leh nunphung pawh hre mang lova kan khawsak theih hun hi lo la thleng thei a ni. Tun dinhmunah ringawt pawh hian han ngaihtuah ta ila, kan hnamzia leh nunphung tha tak  tak ni si; tam tak kan hriat mang tawh loh leh kan chin than tawh lohte pawh a awm chho ve mek zel a nih hi!

“KUCH TOH LOG KAHENGE”

Dr. Ashutosh & Dr. Nidhi

Dr. Ashutosh-a thar (Sharad Kelkar)

Dr. Nidhi Verma

Lenlai a rual lo hi............!!!:   
    Tunlaia Hindi Serial Film kan en lar tak pakhat chu, “Kuch Toh Log Kahenge” hi a ni awm e. He Serial Film thawnthu hi Kamlesh Pandey ziak niin, thawntanni - Zirtawpni zan dar 8:00-ah a chhuak thin a, Season khatna-ah hian Episode 118 thleng chan tawh a ni. (March ni 14, 2012).
    “Kuch Toh Log Kahenge” serial film hi hmangaihna thawnthu, kum lama inrual lo tak, a changtupa chu a changtunu aia kum 18 zeta upa anih avanga an inkara harsatna awm chungchang a ni. Mizote pawhin kum avang hian in hmangaih leh inngaihzawnna kawngah harsatna chu kan nei ve tho awm e. Kan hla pakhatah pawh,
“A rem lo nang nena lendun hi,
Engdang vang a ni lo lungrunpui,
I pian a tlai kei hma si a,
Lenlaia rual lo hi a pawi ber ber mai!”
    tihte pawh a awm ve tho kha maw!
    A changtu-ah harsatna an tawk:
    “Kuch Toh Log Kahenge” serial film hi an chang chho mek zel a, hetih lai hian harsatna hrang hrang an tawk chho ve bawk a, a chhan chu he film-a changtupa ber Dr.  Ashutosh (A hming tak Mohnish Behl) chu he film-ah hian chang chhunzawm tawh lovin a aiawh Dr. Ashutosh-a thar (Sharad Kelkar) chuan a chang chho ve thung a. Hetianga serial film a zawh hma hauhva a changtupa ber thlak a ngai ta hi he serial film en thin tam tak chuan an duh lovin sawiselna a nasa hle a. Hei hi engvang nge a chhan ni ang tia zawhna hrang hrang a awm mek laiin, he serial film siamtute lam chuan Dr.  Ashutosh-a hmasa zawk hian a hnung zang a tihnat avang leh a hriselna a that tawk loh avangin a chan chhunzawm thei lova chuvang chuan a aiah midang chan chhunzawm tir a nih thu an sawi a, hetiang a nih lai hian, he serial film en thintute chuan hei hi awih lovin Dr.  Ashutosh (A hming tak Mohnish Behl) ngei hian chan chhunzawm se an duh a, hetianga an ban mai hi an hrethiam lo a ni.

Chuck Bartowski hi tunge a nih??

    Thalai hovin tunlaia an lawm em em, TV hmaa an thut tam phahna CHUCK TV serial-a a changtupa ber Chuck Bartowski hi a hming dik tak chu Zachary Levi Pugh a ni a, 29 Sept, 1980 a, Lake Charles, Louisiana, USA a piang a ni a; TV Actor a nih mai bakah director a ni a, singer a ni bawk.
    Lemchan thiam tak a ni lo thei lova, kum 6 mi lek a nih lai atangin Theatre lamah lemchangin a lo in lan zak zak tawh. Chuck film-ah hian Yvonne Strahovski nen chang dunin Teen Choice Awards 2010 - ah Chuck film an chan that dun em avangin Best action Actor  leh Actress a thlan dun an ni. Kum 2008 khan Zachary Levy hi Entertainment Weekly's Top Thirty People Under Thirty a thlanchhuah zingah a tel.

Lehlin film leh a behbawm

    Tunlaia kan film en tam ber leh kan buaipui viau chu Korean film hi a ni awm e. Thenkhatten Korean film an nin zia an tlangaupui chiam laiin, thenkhatten tih tawp mai an hlauh thu leh, a ning zawnga lo tlangaute khak zawnga awka lo chhuah ve tawk an awm bawk. Enga pawh nise, kei chuan engti hawi zawng berin nge han ziak ka tum pawh ka hre chiah lem lova, a behbawm vela kualin, tute emaw angin, ‘Thlarau thawh dan a zir zelin’ rilru a rawn lut a piang han thai chawpchilh mai ka tum zawk a ni.
    Tunlaia Korean serial film kan buaipui chiam ang hian tunhma deuh han ti ila, hun rei vak pawh la ni loah khan, vai film ‘Kasautii Zindagi Ki’ kan buaipui chiam tawh a, khami hnu deuhah, “Karam Apna Apna’ tih emaw ni? A film hming ka hrefuh chiah engem aw? Kan buaipui leh chiam anih kha!
    ‘Kasautii’ thlipui Mizoramah a tleh lai kha chuan, a buaithlak thin teh anih kha! Cable Network lam ten a chhuah hun tur an han siam a, chumi dar zat hre reng chuan kan chang far a. Naupang mai chu sawi loh, nula leh tlangval, nu leh pate pawhin hmuhnawm an ti em em a, a lo sel ve tawk pawl chu an awm reng tho a ni.