Mizoramah BPL List tam tak zingah RSBY kalpui nan R & D BPL Lish chiah hman a ni dawn

Vawiin khan Synod Conference Hall Chanmari-ah Mizoram State Health Care Scheme (MSHCS) leh Rashtriya Swasthya Bima Yojana (RSBY) inkawp kalpui fan chungchang zirhona Medical department-a thawktu hrang hrangte pualin neih a ni.
    He Training ah hian CHC atangin Medical Officer pakhat theuh leh SDH, PHC tin atangin Health Supervisor, MC atangin Health Worker pakhat zel, CS Pakhat atangin Account Clerk te an tel a ni. He hun hi Dr. F. Lallianhlira Chief Medical Officer in kaihruai a, khawvelah hian natna hrang hrang in min tlakbuak laiin, hrisel tha kan nih a ngai a, kan changkan theihna tur chuan hriselna hi a pawimawh a, miretheite tan hrisel a harsat avangin Central pawhin he Scheme hi a ngaipawimawh em em a, chuvang chuan he RSBY pawh hi a duang a ni ti.

    Zirsangliana chuan RSBY chungchang sawifiahin, RSBY hi Central Scheme a ni a, he Scheme-ah hian BPL chhungkaw tinten kum khatah inenkawlna senso atan Rs. 30,000/- thleng an hman theihna tura kumkhat atan ruahman a ni a, he RSBY hi kumin 2010 atang hian Mizoram Health Care Scheme nena kal kawp turin Mizoram Sorkar in a ruahman thu a sawi. He Scheme hian a tum ber chu chhungkua an lo hrisel zawk nana awlsam taka Damdawiina inenkawlna an lo dawn theih nana duan a ni. Mahse, hetih lai hian enrollment tih nan Rs. 30/- kum khat atan chawi ve a ngai dawn a ti bawk. 

         

  Natna khirhkhan bikah inenkawlna senso Rs. 30,000/- bakah BPL tan hian Rs. 2,00,000/- dang a bill theih dawn a, APL chhungkaw tan Rs. 3,00,000/- thleng a bill theih thung dawn a ni. He Scheme hian a huam theih chinte chu sorkar (Central leh State) hna thawh nghet nei lo, India khua leh tui ni ngei Mizorama cheng, chhungkua a hotu ber Electoral Roll a hming chuang emaw, chhungkaw hotu ber Voters ID nei ngei kum bithliah zat awm chuang lo a ni bawk. He Scheme a tel te chuan Smart Card emaw, ID Card emaw an neih ngei ngei a ngai dawn a, heng card te hi finfiah nan hman a ni dawn a ni a ti.
   

Hemi hnu hian Mizoram State Health Care Scheme chungchang Dr. Biakthansangi Dy. CEO chuan sawina nei lehin, he Health Care Scheme-ah hian pawisa neih reng an inbeisei thu a sawi a, nikum hmasa lama Health Care Scheme a pawisa tang cheng vaibelchhe 5 vel ala awm thu sawiin, he mi kawngah hian beiseina kawng kan la nei bawk a ni a ti a, MoU sign lamah thil fel lo a lo awm avangin, Reliance Company lamin harsatna an siam a, chuvang chuan tunah hian harsatna kan la nei rih a ni a ti bawk.
    Mizoram State Health Care Scheme leh RSBY chu kaihkawp anih tur thu sawiin, RSBY bikah BPL chhungkua nih kher angai a, chutih rualin Mizoram BPL List hran hran hi a tam hlein, Supply Deppt. R&D Deppt., UD&PA leh VC ten a hran theuhin BPL List an nei a. Chuvang chuan tun tumah chuan R&D BPL List chu an hman tur anih thu sawiin, BPL List dangte erawh chu RSBY-ah bik chuan hman theih a ni dawn lova, Mizoram State Health Care Scheme-ah erawh chuan hman theih anih tur thu a sawi a ni.
    BPL chhungkaw tan hian he Health Care Scheme hnuaiah hian Rs. 100/- enrollment fee a ni dawn a, APL tan erawh chuan chhungkua a member panga chinah, cheng nuai khat thleng bill thei tur tan chuan Rs. 500 an sen a ngai dawn a, member pakhat zel belh a nih dawn chuan Rs. 100 member pakhat zelah an sen a ngai dawn thung a, cheng nuai hnih thleng bill thei tur tan chuan  Rs. 750/- ngaiin, Rs. 200/- member panga aia tam an nih chuan an chawi belh zel a ngai dawn thung a, cheng nuai thum thleng an bill dawn a nih chuan Rs. 1,000/- chawi ngaiin, chhungkaw member panga aia tam an nih chuan member pakhat belh zelah Rs. 300/- zel an chawi a ngai ve thung dawn bawk a ni. RSBY hnuaiah hi chuan chhungkaw khatah member panga tan chauh ruahman a ni a, Mizoram State Health Care Scheme hnuaiah ve thung erawh hi chuan chhungkaw member bithliah zat a awm lo a ni a ti bawk.