‘Lungkham’ C. Lalhruaitluanga ziak Rs 50/- tlangzarh a ni ta

Nimin zirtawpni chawhnu dar 1:00 khan C. Lalhruaitluanga, Chanmari Lunglei lehkhabu ziak, “Lungkham” chu Lunglei Press Club-ah Pu. K. Lalrinpuia, President MJA Lungleiin a tlangzarh.
Lehkhabu Tlangzarh Inkhawm hi Lalrintluanga Khiangte Vice President MJA Lungleiin a kaihruai a, V. Rokhawlkima, Jt. Editor Lunglei Times chuan “Lungkham” lehkhabu Preview hun hmangin, Lungkham lehkhabu, C. Lalhruaitluanga ziak chu phek 128-a chhah, Rs 50 man a ni a, thuziak hrang hrang 23 awmin, heng thuziak hrang hrangte hi, thuziak hlawm then (Category) 4-ah a dah a nih thu sawiin, lehkhabu tha leh ngaihnawm tak a nih thu a sawi a, chhiar manhla tak a ni a, “Lungkham” lehkhabu chu leia chhiar theuh turin kalkhawmte a duhsakthu a sawi a ni.

Lehkhabu tlangzarhtu Pu. K. Lalrinpuia pawhin thu sawiin, hetianga Lunglei lam atanga lehkhabu tha tak ziak thei an awm leh ta chu lawmawm a tih thu a sawi a, Lungleiah ziak mi tlemte awm zingah lehkhabu ziak puitling thei pawh an la tam loh thu sawiin, hetianga Hruaia’n lehkhabu a ziak puitling thei chu Lunglei lamin bung thar kan kai a ni a ti.
Ani bakah hian, MAL Jt. Hqrs. Lunglei aiawhin, Pu. C. Hrangdula President-in thusawina hun a hmang a, Writers Club Lunglei aiawhin, Pu. TC. Jonunsanga’n thu a sawi bakah, lehkhabu ziaktu C. Lalhruaitluanga leh mi dang thenkhatten thusawina hun an hmang a, lawmthusawina hun Pu. F. Lalngaihzuala, Secy. MJA Lunglei-in hmangin hun tihtawp a ni.