“Loving You a Thousand Times”

    Tunlaia thalai tam takte ngaihven leh en chaka a chhuah hun tur thlenga an lo chhut lawk hial thin pakhat chu Korean Serial film pakhat, “Loving You a Thousand Times” tih hi a ni awm e. Tam tak chuan a film hming han lam kual teh duah ai chuan, “Rai puar film” tiin an lam mai thin.
    Chumi hmain, Nu leh Pa, thalaite zingah pawh Korean Serial film chungchanga kan ngaihdan a inang lo hlawm hle a. Mahse, chu lam chu sawi vak ka tum rih lo, duh leh hun remchang dangah chu lam chu ngaihdan hrang hrang awm thei, a thatna leh a that lohna, inzirna tur leh entawn loh tur kan neih hrang hrangte chu kan la ziak leh thei em ang chu. Enga pawh chu nise kan ngaihdan a inang lo tihah hian duhtawk mai ila, a ziaktu ngei pawh hian TV en tha hman vak lo chung pawhin thalai tamtakte ngaihven a nih avangin tlem a zawng han ziak lan hrim hrim ka duh mai a ni, kan ti mai teh ang.
    Mi chungah eng ang harsatna nge thleng a, ang dinhmunah nge an din tih pawh la hriat loh lai atanga vanneih vang nge, vanduai vang zawk tih pawh ngaihtuah thiam loh laia intawng hlawl! Harsatna khirh tak, a ruktea chhungkaw thila inkungkaih rukna lo awm reng kara hmangaihna lo piang chhuak si! Chuti ang a ni chung pawha, “Ka hmangaihna che hi sang tam tak ang a nia sin” ti thei, “Hmangaihna mak mawi leh duhawm” tih ve mai tur niawm a mawi, “Loving You a Thousand Times” Korean Serial Film thawnthu hi Kim Sa-Kyeong ziak a ni a, Episode 55 zeta tam a ni a, chuvang chuan a chan chhung pawh a rei dawn a, a darkar zawng pawhin darkar tam tak a ni dawn a ni tih chu kan hrethiam mai awm e.

    He serial film hi a thui em avangin August 29, 2009 - March 7, 2010 inkar khan release niin tihchhuah thin a ni.
    He film kalhmang (plot) tawite han tarlang ila:
    A changtunu ber nula pakhat Ko Eun-Nim a hming tak (Lee Su-Kyeong) awmin a naupan laiin a nuin a thihsan avangin a pain nupui dang a nei a. Chhungkaw khawsak harsa tak an nih avangin nakin hunah an chhungkaw khawsak a lo nawm ve zawk nan tiin taima takin lehkha a zir thin a. Mahse, Zirtirtu ni tura a zirna kawngah harsatna tam tak tawngin a zirna atan amah inhlawhfak chawp angai a, chutiang a ni chung chuan a chhungte ngaihtuah tel ngai nen a nun zawng zawng chu midangte hriatthiampui ve si lohvin a chhungte tan a chhi ral thak a ni.
    An chhungkaw khawsak harsat leh hrehawm em em lai chuan hun khirh lehzual chuan lo hmuakin a hmangaih a pa chu a thin thlak ngaiin a dam lova, a enkawlna turin damdawi In sen so tur sum an nei si lo. Chuti ang a nih avang chuan Ko Eun-Nim chuan a duh reng vang ni lovin mi hausa tak chhungkua fa nei thei si lo Baek Se-Hun (Ryu Jin) te nupa fa tur pawisa hlawhin a paisak ta a ni.............
    Hetih lai hian Ko Eun-Nim chuan fa a pai hma daih tawha mak angreng taka a tawn leh nawlh thin pakhat Kang-ho Baek (Jeong Kyeo-Woon) nen chuan inhmelhriatin, Kang-ho Baek chu USA lamah lehkha zirin a awm bo leh daih a. USA atanga a rawn kir leh hnuah pawh mak deuh maiin Ko Eun-Nim nen chuan an intawng leh nawlh thin a ni.
    Ko Eun-Nim chuan a fapai chu hringin a naute chu tlanbo pui han tum viau mah se a theih tak loh avangin a ma fapa ngei pawh hre lovin hun a hmang chho reng thin a. Chuti anga hun a hman reng lai chuan mak tak maia a tawn leh nawlh thin Kang-ho Baek nen chuan an hnathawhna avangin inhmu reng lo thei lo dinhmunah an ding chhova. Ko Eun-Nim chuan a pa enkawl nana mi fa a paisak  Baek Se-Hun (Ryu Jin)-a nau a ni tih reng a hre lova, Kang-ho Baek  lahin a ute nupa tana fa hrinsaktu a nih tih reng lah a hre hek lo.
    Kang-ho Baek leh a u Baek Se-Hun (Ryu Jin) te chu mize in ang lo tak an ni a, a u zawk hian lehkha a thiam theih loh em em laiin, a nau zawk Kang-ho Baek ve thung hi chu lehkha thiam thei deuh a ni a. Mahse, chutiang a ni chung chuan a nu chuan a duhsakna a lantir ve ngai lovin a u zawk Baek Se-Hun chiah chu a duhsak hlur si! Hei hi engvang nge ni ang? Unau chu duhsak dan pawh inang reng tur a nih laiin a u zawk chauh a nu hian a duhsak hlur bik le? A chhan chu Kang-ho Baek hi an fa tak ni lovin midang fa a lo ni reng a ni maithei a sin!..................
    Chuti anga chhungkua leh chhungkua pawh inhrechiang lo leh hun khirh leh harsatna tam tak karah chuan Kang-ho Baek-a u te nupa tana fa hrin saktu Ko Eun-Nim leh Kang-ho Baek te chu hmangaihna khurhah an tlu lut ta a ni.
    Nakinah chuan “Lang lo tura thuhruk engmah a awm lo” tih ang mai khan thuruk reng a awm thei  dawn em ni? Chuti ang hun a lo thlen hunah pawh chuan an chungah eng thil nge thleng zel dawn le? Hun khirh leh harsatna tam tak karah pawh Nuthlawi fa nei tawh lakah hian “Loving You a Thousand Times” tih hi thil awlai tak chu a ni hauh lovang le!
    A changtu pahnih bikte chauh chanchin tawi:
    Lee Su-Kyeong: (Ko Eun-Nim) anga chang, he film-a a changtunu ber hi niin, 13th March, 1982 khan Seoul, South Korea khawpuiah a lo piang a, 170 cms a sang niin film hrang hrangah a chang nual tawh a, chungte chu, Triangle/Teuraiaenggeul (2009),  Romantic Island (2008), Rainbow Eyes /Gamyeon (2007), Tazza: The High Rollers | Tajja (2006) - Hwa-ran, Wet Dreams 2 | Mongjunggi 2 (2005)-ah te bakah, * Dae Mul (SBS / 2010), Secret Agent Miss Oh | Kukgaga Bureumda (KBS2 / 2010) , Loving You a Thousand Times | Cheonmanbyeon Saranghae (SBS / 2009), Love & Law | Daehanminguk Byeonhosa (MBC / 2008), The Daughters-in-Law | Myoneuri Jeonseongshidae (KBS2 / 2007), Soul Mate (MBC / 2006), Love In Heaven | Haneuliseyeo (SBS / 2005) leh You Will Know | Alkedoelgeoya (KBS2 / 2004)-ah te a lo chang tawh a ni.
    Jeong Kyeo-Woon: (Kang-ho Baek lema chang hi 28th June, 1982 khan a piang a, pa hleitling zehzuah tak niin, 184cm zeta sang niin 6feet ruk hawlhtlang zan a ni. Film hrang hranga a lo chan ve tawhna te chu: Sign | Ssain (SBS / 2011) - Choi I-Han, Dr. Champ | Dokteo Chaempeu (SBS / 2010) - Park Ji-Heon, Loving You a Thousand Times | Cheonmanbyeon Saranghae (SBS / 2009), Korean Ghost Stories | Jeonseolui Gohyang (KBS2 / 2009), Again, My Love | Miwodo Dashi Hanbeon (KBS2 / 2009), Sisters in Love | Taeyanghee Yeoja (KBS2 / 2008), Robber | Bulhandang (SBS / 2008), A Happy Woman | Haengbokhan Yeoja (KBS2 / 2007), Dr. Gang | ?? ? (MBC / 2006), Biscuit Teacher and Star Candy | Keonbbang seonsaengkwa byeolsatang (SBS / 2005)-ah te a ni.
    A thui lutuk dawn a ziak chipchiar theih loh a ni e.

By- V. Rokhawlkima