Aw Ruthi............

    A hun sawifiah nana hmanlai tih mai pawha chiang phak lo khawpa hun tam liam ta, Isua Krista leh Lal Davida te pawh la pian la hma Bethlehem hunlai khan chu khuaah chuan tam nasa takin a lo tla tawh a. Chhungkaw khawsak phung namen lovin a harsa a, tam avanga nunna chan hialte pawh an awm ngei a rinawm hle.
    Chhungtin maite chuan engtin nge he tam hunah hian ei an hmuh ang a, an chhungkua, an nupui fanaute leh an tu leh fate chu an chhawmdawl tak ang? Engkim mai chu a harsa em em a, rim taka hna thawkin an lo siamte pawh chuan an beisei loh ang rah a chhuah a, chhiatkum an hmachhawn dawn a ni ber. Chutiang a nih avang chuan chhungtin maite chuan an damkhawchhuah theih dan tur an dap a tul a, eitur awm nia an hriatna lam apiang chu an pan hlawm a ni.
    Chutianga tam tuar zingah chuan vanduai chungchuang tak mai Elimeleka te chhungkua pawh an tel ve a. An chhungkua chu a nupui Naomi leh a fapate pahnih Mahlona leh Kilion-a te nen an vaiin pali an ni. Tumah sawrkar hnathawk an chhungkaw zingah an awm lova, an eizawnna chu nitin indapchawp leh loneih a ni ber. Amaherawhchu, chhiat kum an tawh avangin khua a kheng a, a zuva bawk avangin buh leh bal khamkhawp an thar chhuak thei si lo. Chuvang chuan an hun tawn tur hmabak chu kutdawh a nih mai loh chuan riltama thih mai chu a ni ta si!
    Mahse, chutianga a nupui leh fapate pahnih kutdawhpui mai chu a duh loh rualin riltama an thih hun nghahpui mai chu Elimeleka chuan a tum hauh lo; eitur awmna leh khawsak awlsam theih zawkna tur hmun nia an hriat Moab ram lama pempui mai chu tha bera hriain chumi khaw lamah chuan an pem ta nghe nghe a ni.
    Hemite chhung hi hetih hunlai hian vanduai tur renga Khuanu duan an ni bik nge, Moab-ah hian dam khawchhuah tumin kal mah se rei pawh an la awm hman hmain pa ber Elimeleka chuan, he khawvela ril tamleh tuihal hre tawh lo turin a chhungte chu a kalsan a. Naomi chuan a fapate pahnih chu a hmeithaipui zui ta a ni.
    Chhun lamah a fapate pahnih chu rimtaka hnathawk turin an chhuah ziah a tul a, hmeithai pitar Naomi ringawt chu Innghaktu leh In lama eisiamtu awmchhun a ni ta a ni. Chutiang a nih avang chuan an duh reng vang pawh ni em em lo, a tulna avang zawkin a fate pahnih Mahlona leh Kiliona te chuan an ram mi pawh ni lo, Moab mi chu nupuiah an nei ta ve ve a.

    Mahlona nupuia chu Ruthi a ni a, Kiliona nupui ve thung chu Orpi a ni. Chhungkaw nu ber Naomi chuan a hmangaih a pasal Elimeleka thlah an mang mai loh nan a fate chuan fa hring thuai thuai se, tu hmel hmuh ve thuai thuai pawh a chakin a beisei em em a. Mahse, vanduai tur renga Khuanu ruat a lo ni nge a beisei loh ang thil hlir chuan a hmuakin, a fate pahnih Mahlon leh Kiliona te pawh chuan an nupuite lakah fa pawh an la hrin hmain, a pasal Elimeleka hnungzui chuan he khawvela tam tuar leh tawh lo turin an kalsan ve leh ta si! Chutiang chuan Moab ramah damkhawchhuah beiseiin an pan a, mah se kum 10 emaw chhung vel lek an chen chhung chuan Naomi chuan vanduaina hlir a tawng a, a pasal mai bakah a fapate pahnih a hloh a ni.
    He khawvela mi vanduai ber niin Naomi chuan a inngai a, lungngaia indawmkun reng bak chu tih theih engmah a nei si lo. Tumah chhung leh khat hnaivai pawh Moab-ah hian a nei lova, chuvang chuan Moab-a awm reng tul tihna pawh a nei tawh lovin a pianna ram Israel ram lamah chuan kir leh turin a rilru a siam fel ta! Hreh tak chungin a famote pahnih Mahlona nupui Ruthi leh Kiliona nupui Orpi te chu a fawp ngawih ngawih a. Tap zawih zawih chung chuan an chhungte hnen lama kir leh ve ve tur leh pasal dang tha tak nei leh tura a duhsak thu a hrilh zui ta a ni.
    Chutianga annu Naomi’n an chhungte hnena kir leh tura a tihna an hriat chuan, an pasalte laka fa pawh la hring lo, Ruthi leh Orpi te tan chuan. “zia tak raw”  tia lawm taka an chhungte hnena kir leh nghal vang vang awm tak a nih lai chuan a ni hauh si lo, an pahnih chuan, “Kan kal lovang, i chite hnena i hawnnaah chuan kan tel ve zawk ang” an ti thei tlat nia! He mite pahnih hi mo rinawm tak chu an va ni em! Hetih hunah hian an kir lo a nih vaih chuan an la chen ngai lohna leh hmelhriat pakhat pawh an la neih lohna ram, Israel ram lamah annu Naomi rual chuan an kal ve ngei a tul dawn si!
    Ruthi leh Orpi te chu dinhmun khirh takah an ding ve ve a, an pasalte laka fa pawh la hring lo an nih ve ve avangin annu Naomi chu kalsanin an chhungte hnena kir leh pawh nise tuman an dem hauh lovang. Chutiang a nih avang chuan Naomi pawh chuan kir leh mai tur chuan a duh takzet thu a han hrilh nawn leh thin a, a famote pahnih rilru pawh chu a buai ve takzet! Ngun taka an ngaihtuahna sengin, chumi hnu chuan Ruthi leh Orpi te chuan an rilru an siam fel ta. Kiliona nupui zawk Orpi chuan tap zawih zawih chungin Naomi chu a fawp a, a chhungte hnen lama kir leh turin a pasala nu Naomi leh a mopui Ruthi te chu a kalsan ta a ni.
    Chutianga Orpi a kir leh tak hnu chuan Naomi chuan Ruthi pawh chu a mopuinu Orpi anga kir ve leh mai tur chuan a han ti thin a. Mahse, Ruthi chuan a pasala nu Naomi chu kirsan a tum lo bur si! He dinhmun atang chiah hian Ruthi tluka a pasal leh a chhungte tana mo rinawm an awm thei lovang tih chuan rilru ngaihtuahna a luah phah fo thin a ni.
    Naomi hnenah chuan he tawngkam ropui tak mai hi chhak chhuakin, “Nangmah then tur leh nangmah zui lova haw leh tur chuan min thlem lo hram hram rawh: i kalna apiangah ka kal ang a, i chite chu ka chite an ni ang a, i Pathian chu ka Pathian a ni ang: i thihna apiangah chuan ka thi ang a, chutah chuan min phumve mai tur a ni; nang leh kei hi thihna chauh lo chuan thil dangina min then dawn chuan LALPAN a tih tihin min ti mai sela, chu aia nasa pawhin” a ti thei nia mawle!
  
**************************

    Ruthi chungchang ka chhiar hian ka rilru ngaihtuahna thui takin a hruai a, tunlai hmeichhe fel leh nula fel tia kan sawi tam tak hian Ruthi hi an va tluk dawn lo rua em! Nang ni ve ta la Ruthi ang hian i pasal leh a chhungte chungah i dam chhung atan i rinawm kumkhua thei angem le?
    Ruthi chu thisen pal lo, a pasal laka fa pawh la nei lo, naupangte leh pasal hmuh leh thuai pawh huphurhawm loh a nih vei nen, a pasal leh a pasala nu Naomi laka rinawm kumtluan turin hmeihriat pawh a la neih ngai lohna Israel ram lama awm hlen tawh tur chuan a pasala nu Naomi chu a zui ta a nih kha!
    Tunlaia kan hmeichhe tam takte hi han ngaihtuah ve mai mai ta ila, pasal an han nei ve ta cheng a, rei pawh an inneih hmain an pasalte lakah thil ho leh tenaute teah an vui a, indan an kherh thuai mai thin. Hmeichhe tam tak chu an pasalte hnathawhna avangin hmun dangah an awm a  tul a, an pasalte lakah fa pawh hring tawh reng mahse, an pasalte awm loh hlana an pasalte in lama awm  reng pawh peih lovin an chhungte hnen lama awmdan ngawt an ngaihtuah fo thin a ni. Chumai a ni lo, a nuamah leh hrehawmah pawh, hlimlai leh hlim loh lai, bawrhsawm lai pawha damchhunga inchhawmdawl tawn tura Pathian leh Kohhran ho hmaa intiam kur luk chung si chuan, an inti khawtlan fova, “Thihnain min then hma loh chuan”  tia an intiamna te pawh zawm zo lovin vawi tam tak an in then a, inthen hlen pawh mi tam tak an awm thin a ni.
    Mahse, chutiang ang mi chu Ruthi hi chu a ni ve hauh lo tih chiang takin kan hria a, chuvang chuan tunlai hmeichhe tam tak hian Ruthi nun atang hian entawn tur tam tak an nei a ni. Ruthi chu a pasal thih hnuah pawh a pasal leh a pasala chhungte tan a rinawm reng a, chuvang chuan Pathian pawhin a hrerengin a pasala nu Naomi hmangin Pathianin pasal tha tak dang Israel rama an kir leh hnuah a neih theih phah nghe nghe a, he khawvela hming dai tawh ngai reng reng lo tur Lal ropui tak tak, Lal Davida leh Lal Solomona te thlahtu ni turin Pathianin a ruat ta a nih kha!
    Ruthi nunah hian a bik takin hmeichhe ho tan entawn tur a va tam em! A pasal hmasa Naomi fapa Mahlona lakah fa a hrin loh avang leh, Naomi pasal Elimeleka chi thlah kal zel tur an mang loh nan Ruthi chuan Naomi tan fapa a hrin sak ta a, chu a fapa hmingah chuan Obeda sain, Obeda chuan Jesaia a hring ve leh a, Jesaia chu Lal ropui Davida pa a ni a, Davida chu khawvela lal fing ber Solomona pa a ni ve leh a nih kha!
    Kan hriat theuh angin Ruthi chuan Israel rama a pasala nu Naomi a zui hnu khan pasalah Boaza a nei leh a. A chi leh kuangte awm lohna ram Isael rama an chen tak hnuah pawh khan Israel hmeichhe ho chuan, a pasal hmasaa nu Naomi hnenah, “I monu nangmah hmangaihtu, fapa pasarih aia i tana tha” an tih sak hial a nih kha! Chumai ni lovin Israel rama an chenna khuaah pawh Ruthi fel zia chuan khua a deng chhuak hial a, khaw mite chuan, “Kan khuaa mi zawng zawngte hian hmeichhe fel tak a ni tih an hre vek si a” an ti hial a ni.
    Mo fel leh rinawm Ruthi chu Moab mi ni mahse, Pathianin a chawisang a, a mi ruatte lo pianchhuahna tur atan a thlan phah ta nghe nghe a ni. Ruthi nunah hian entawn tur a va tam em! Mo fel leh hmeltha Ruthi anga nun hmang ve thei turin kan nulate hi inbuatsaih se, pasal an neih hnuah pawh an pasalte laka rinawm leh an pasala chhungte chu an chhungte tak tak anga enkawl leh chhawmdawl zel tura an rilru an siam a tul takzet. Chu chu Pathian duhdan pawh a niin, chutiang ang hmeichhe rinawm leh fel chu Pathian pawhin a chawisang thin a ni tih an hriatreng a va tul em!
    Fapa pasarih aia pawha tha leh hlu, Mo fel leh rinawm; Aw RUTHI.......

- V. Rokhawlkima