Lunglei Tualchhung News lawrkhawm

World Consumer Right Day

    Nimin kha khawvel pumpuia World Consumer Right Day a ni a, hemi denchhen hian Saikuti Hall Lungleiah pawh hman niin, Biakchungnunga Vice President LDCA in he hun hi a kaihruai a, Lunglei DC,  M. Zohmingthangi  IAS chu khuallian a ni.
    Pi M. Zohmingthangi chuan, Danin Consumer te a humhalh nasa a, Kan dan neih te a nihna ang a humhalhna kawngah mitin te kan pawimawh a, kan dikna leh chanvo humhalhna kawngah  hian mawhphurhna kan nei vek a ni a ti.
    Nimina Consumer Right Day hmannaah hian Dr Andrew H Vanlaldika District Consumer Protection Officer chuan Consumer te dikna leh chanvo  humhalh a tulna tih thupui hmangin Paper  a Present bawk. He hunah hian Lunglei District a Consumer thubuai za zel a 99 chu chin fel a nih tawh thu tarlan a ni bawk. Chawhnu lamah Annual Gen. Meeting neih nghal a ni a, Pu C. Zairemthanga LDCA President-chuan a kaihruai

Bethel Centre-ah Free Clinic

    Vawiin hian KTP Ramthar Branch chuan Bethel Centre Sazaikawn-ah a thlawna in entirna Free Medical Clinic an buatsaih dawn. Free Medical Clinic an buatsaih turah hian an Branch member Doctor te leh Nurse ten Bethel Centre-a awmte, hrilselna hi an endik sak anga, damdawi an mamawh angin a thlawnin an pe leh dawn a ni. Vawiina Clinic an neih hunah damdawi hi pe nghal lovin, naktuk ningani hian a hranpa-in damdawi hi an pe leh ang. KTP Ramthar Branch hruaitute chuan Home/Centre dang hrang hrangah pawh a thlawna inentirna hi la buatsaih chhoh zel an tum thu Lunglei Times an hrilh.

Lunglei Dist. PYD Conference

    Naktuk March ni 17 atanga tanin ni 20 thleng hian Lunglei Dist. PYD Conference Vawi 43-na Lungsen Field-ah neih a ni dawn a, Speaker-ah Rev. R. Laltlankima leh Rev. Lalmalsawma Sailo te hman an ni ang. Thupui-ah “In Thianghlim tur a ni” (I Pet. 1:16) tih hman a ni dawn a ni.

Pu S. Dinga hun hman dan tur

    Vawiin hian Pu S. Laldingliana Parliamentary Secretary chuan Saiha Group YMA Conference Lungpuk ah neih tur hmanpuiin khuallian  a ni ang a, naktuk hian  Tawipui Group YMA Sport Meet ah Khuallian a ni leh ang. Ni 18.3.2011 ah Theiriat Playground a tlawh bakah Lunglei Civil Hospital-a Haemodialysis khawl dah thar leh Cabin siam thar a hawng ang a, Inrinni hian Aizawl-ah a let leh dawn a ni

TKP Unit pual Volleyball tourney vawiinah

    TKP Serkawn Unit chuan an Dioamond Jubilee lawmna atan Lunglei khawpui chhunga TKP Volley Ball Tournament an buatsaih chu vawiin atang hian khelh tan a ni dawn. Centenary Field Serkawn-ah dar 10:30am hian Rev. R. Lalbiakliana FOD Director-in a hawng ang. Volley Ball Match khelh chhunzawm nghal a ni ang. Lunglei khawpui chhunga TKP Unit hrang hrang atangin Mipa Team 13 leh Hmeichhe Team 9 he Tournament-ah hian an tel a ni.
    TKP Serkawn Unit hian July ni 30, 2010 khan Diamond Jubilee Celebration Opening Function hmangin tun thleng hian Diamond Jubilee lawmna hrang hrang kalpui mek reng a ni a, kumin July ni 29 - 1 August 2011 chhung hian Diamond Jubilee lawmna pui ber neih tumin an inbuatsaih mek bawk. Ropui takin ruai nen lawm an tum a ni. Diamond Jubilee pual hian Music Video pawh siamin, tlangzarh thuai an tum.