CR. Laldingliani’n exam a zo fel a, Radio-ah hla a record dawn

    Leitlangpui Zaithiam CR. Laldingliani Serkawn nula pawh kar liam ta mai khan B.A Final exam a zo ve ta a. Programme hrang hrang hmachhawp a nei nual. Karleh chho atang hian All India Radio Station Lunglei-ah hla thar 5 record a ngai a. Chumi atan chuan Exam a zo chiah tihin a inbuatsaih chho nghal char char a ni. Tunah hian hla thenkhat chu record mai theih turin a inpeih tawh thu Thalai Times a hrilh. 

Hun engemawti chen chu exam a neih avangin Programme hrang hrangah a hmel kan lo hmu lo deuh reng a, mah se tunhnaia Chapchar Kut kan hman zawh tak, kar liam ta Zirtawpni khan thiam tak maiin Thuamluaia Mual-ah a rawn inlan leh thei ta a, Chapchar Kut hma Ni chiah khan exam a zo ve chiah a ni.

    Tunah B.A result a nghak mek a, a exam a tih that leh tih that loh chungchangah CR-i hian sawi thiam har a tih thu sawiin, a pass a nih chuan zir zawm leh zel a tum thu a sawi. Mahse, enge a zir dawn tih chungchang erawh engmah a la sawi lawk theih loh thu a sawi a ni.