ICC Cricket World Cup Semi Final hnuhnung zawk nimin tlai atanga khelin nizana zawh takah a thlengtu pakhat zawk India chuan thenawm ram Pakistan an hmachhawn a, inkhelh tan hma atang rengin India leh Pakistan inkhel tur hi Silai tel lova Indona ang hiala sawi leh tehkhin a ni a, hei vang hian ram pahnih hruaitu lian ber berte pawhin he inkhel hi a hmunah an en a. India hian Pakistan lakah run 29 in hnehna an chang ta a ni.
Inida hi toss-ah chakin bat an thlang hmasa a, India tan hian an thiampuipa Sachin Tendulkar leh Sehwag te rawn pen chhuakin Sehwag hian a vai huai bawk a, run pawh a vaw chhuak tha ang reng hle a. Amaherawhchu, dam rei zo livin ball 25 chauh a vuak hnuin a out a, run erawh 38 lai a siam hman a ni.
He inkhelah hian Sachin Tendulkar-a vanneihna a inherchhuak tih loh theih loh niin, out ang tak takin tum engemawzat a awm a, mahse, vanneih thlak takin a out leh lo hlauh thin a, tum 2 lai phei chu a ball vuak an catch thuak thuak a ni ber. Sachin-a hian ball 115 a vuak atangin run 85 zet a siam hman a, Sachin-a out hnuah India players dangte hian run an siam tam hlei thei lo a ni ber. India tan hian Gambir chuan run 27 siamin, Kohli-a’n run 9, Dhini-a’n run 25, Raina’n run 36, Harbhajan Singa-a’n run 13, Z Khan-a’n run 9 siamin, Nehra chuan ball vawi 1 a vuak naah run 1 siamin a ball vawi 2 vuak naah a run out tak avangin run 1 chiah a siam hman a, ani bakah hianYouraj Singh chuan ball vawi 1 a vuak naah run khatmah siam lovin a out ve bawk. Patel erawh bat ve hman lovin over 50 a zo va, India hian run 260 a pumpuiah an siam hman a ni.
Pakistan lamin run 261 tal siam tumin bat an hum ve thung a, mah se, Pakistan lam pawh hian mimal run siam hnem tak an nei thei bik chuang lovin India lam ai hian an out hma zawk mah hlawm emaw tih tur ni chhovin Pakistan tana run siam tam deuhte chu Mohammad Hafeez chuan run 43 siamin, Misbah-ul-Haq chuan run 56 a siam a, Shafiq chuan run 30 a siam a, anni pathum bak hi run siam tam sawi tur awm lovin India lamin over 49.5 an vawm hnuah Pakistan tan hian Saeed Ajmal chu la out ve lo mahse, All Out-in India hian 29 runin hnehna an chang ta a ni.
Heti hian India chuan kum 36 chhunga Cricket World Cup-a Pakistan laka chak loh nei miah lova an awmna record an humhim a ni. Final-ah India hian Inrinni khian Mumbai-ah Sri Lanka an hmachhawn dawn a ni. Final khel tur ram 2-te hi Cricket World Cup-a vawi 1 ve ve lo champion tawh an ni a, Final an thlen tum 3-na ve ve a ni .
No comments:
Post a Comment