Inrinni tlai dar 2: 30 pm atanga khel tanin Zan dar 10:30 vel khan ICC Cricket World Cup Final chu khelh zawh ni tain, a thlengtu ram pahnih India leh Sri Lanka ten Final hi an khel a. Sri Lanka hi toss-ah chakin bat an thlan angin an bat hmasa a, over 50-ah mi 6 out-in run 274 an vaw chhuak a. Sri Lanka tan hian M Jayawardene chuan run 103 lai vawchhuakin century a siam nghe nghe a, ani tih lova run vawchhuak hnem ve leh deuh chu Sangakkara niin ani hian run 48 a vawchhuak a ni.
India hian an target run 275 vawchhuak turin Sehwag leh Tendulkar ten bul an rawn tan a. Sri Lanka Bowler vawm kawh zet mai Malinga ball vawm kawh zet avangin India innghahna pakhat Sehwag chuan run khatmah siam hman lovin ball vawm hnihnaah a thi nghal a. India thiampuipa Tendulkar pawh Malinga ball vawm kawh avang bawkin run 18 chiah a siam hman tihin a out ve bawk.
India tan tute tan thin a phu dep dep a, India hi an target a san avang leh a tir lamah an thiampuipate an out nghal avangin an chak loh mai a rinawm angreng hle a. Mahse, hetih lai hian fimkhur taka bat hum tlattu Gautam Gambir chuan run 97 lai vawchhuakin a out a, ani bakah hian Kohli chuan run 35 vawchhuakin, Yuvraj Singh chuan run 21 a vaw chhuak a, India in hun tawp lamah ball 10 chuang awrh an nei tawh tihah India tan hian Captain Dhoni chuan rick huai zet zeta lain a hlap pawp pawp a. ball 11 chiah a awm tawh tihin run 4 chiah an targat khum nan an mamawh tawh tihah, Dhoni hian run 6 a vawchhuak leh ta!
India hian over 48.2-ah run 277 vawchhuakin pali an out hman a, 6 wicket in Sri Lanka lakah hnehna changin ICC Cricket World Cup 2011 champion an ni ta a ni.
India Captain Mahendra Singh Dhoni hian a khel tha hle a, ball 79-ah out lovin run 91 a siam a, Man of the Match-ah thlan a ni a, Indian player Yuvraj Singh-a chu tournament chhung zawnga khel tha ber Man of the Tournament-ah thlan a ni bawk. Final-ah hian Gautam Gambhir pawh a che tha hle a, ball 122-ah run 97 a siam a. Gambhir-a leh Dhoni-a te bat dunin run 109 an siam chuan India tan champion theihna kawng thui tak a siam a ni. Kum 1983 khan India hian England-ah West Indies hnehin Cricket World Cup-a an champion hmasak ber tum an lo tawng tawh a ni.
ICC Cricket World Cup 2011 Final hi President Pratibha Patil-i leh Sri Lanka President Mahinda Rajapaksha-a te pawh Wankhede Stadium-a India leh Sri Lanka Final match entu mipui tam tak zingah an tel ve a, Union Minister Kapil Sibal leh sumdawng hausa tawntaw Mukesh Ambani te bakah Bollywood filmstar thahnem takte pawhin inkhel hi an en a ni.
No comments:
Post a Comment