Mizoram Powerlifting Assn. leh ZONET tang dun buatsaih, Mizorama pa chak ber zawnna zawh fel taka Mizoram Pachak ber P. Lalchamliana MRP, Venglai Lunglei chuan vawiin khan ropui takin Lunglei a rawn lut a, mi thahnem takten Lirthei nen Pukpuiah lo hmuakin Lunglei khawlai fanpui a nih hnuah, amah lawmna hun tawi Venglai Traffic Point-ah hman a ni a, he hun hi Pu R. Lalthansanga President Branch YMA Venglai chuan a kaihruai a ni.
He hunah hian, Pu. Lallianmawia MPS, S.P Lunglei chuan thutawi sawiin, Lungleia Police hnathawk, Lunglei tlangval P. Lalchamliana Mizoram puma chak ber nihna a chang thei chu Lunglei Police ten an lawmpui thu sawiin, a tha lamah Lunglei Police ten Mellung pawimawh tak kan phun a, chumi tihlawhtlingtu ni thei Chama chu an chhuan takzet thu a sawi. A chakna tha leh zung zawng zawngte Chama hian chakna petu Pathian tan a pek zel chuan Pathian pawhin a la chawimawi zel tur thu sawiin, ama mimal chakna ringawtah innghat lova, Lalpa chaknaah innghat zawk tura a duhthu chahin, chhimbial mipuite pawh kan tanrual chuan kawng engkimah kan chak thei a ni, a ti.
Thusawitu dang, Venglai VCP Pu Lalhmingmuana chuan, Mizoram Pachak ber P. Lalchamliana chu Venglai khawtlang ten an chhuan takzet thu sawiin, a a chenna Venglai khawtlang mai bakah, Lunglei leh a thawhna Deptt. MRP Lunglei tihmingthatu a ni thei chu an lawmpui takzet thu a sawi.
Pu K. Lalrinpuia President MJA Lunglei pawhin thusawiin, Chama hlawhtlinna ropui tak a chang chu MJA Lunglei chuan an lawmpui takzet a, Mizoram Pachak ber ni mai lova, khawvel huap pawha lang thei tur khawpa inbuatsaih zel turin a duhsak thu a sawi a, hei bakah hian Chama hi Police Deptt.a thawk a ni a, Deptt. hming pawh a ti that mai bakah, amah hi mi nungchang tha tak a ni a, chuvang chuan sawrkar thuneitu lamte pawhin Promotion an pek ngei phu a tih thu sawiin duhsakna a hlan nghal a ni.
P. Lalchamliana pawh hian thu sawiin, Mizoram Powerlifting Assn. leh ZONET tang dun ten Mizoram Pachak ber zawnna an buatsaihah chak ber ni turin Pathian hnenah a dil ngai loh thu a sawi a, intihsiaknaa tel zawng zawngten Chak ber nih chu kan duh vek a, chuvang chuan Chak ber nihna hi ka dil lova, hriselna tha tak ka neih theih nan Pathian hnenah ka dil thin a ni, a ti a, amah hmuaktu mipuite, thilpek petu, tawngtaisaktu, venglai khawtlang, Lunglei mipui leh an thawhna Deptt.a a thawhpuite leh an hotute chungah lawmthu a sawi a ni.
No comments:
Post a Comment