The Empty Egg: Easter Day

Jeremy chu naupang kum 12 laia upa ni tawh mahse, pianphunga rual ban lo leh thluak chak lo tak anih avangin Pawl - 2 chiah a la zir a. A zirna kawngah beisei tur engmah awm lo mahse, school kal chu nuam a tiin, a school kalpui thiante nena hun hman ho chu a tan chuan a nun hlimna ber niin, schhol kal loh chu a duh ngai lo a ni.

Class chhungah a changin thawm bengchheng tak a nei a, a chang leh thutthleng ti riin, a thiante tan harsatna a siam ve fo thin a ni. A lakah beisei tur em em a awm loh avangin nikhatchu an zirtirtunu,  Doris Miller-i chuan Jeremy-a nu leh pate chu School-ah kovin Jeremy chungchang a sawipui a, an fapa chu special school an buatsaih ang chi-ah kaltir zawk mai thaa a rin thu leh, school pangngaiah chuan a thiante tibuaitu a nih mai bakah a classmate te ai pawhin kum 5 laia upa zawk a nih thu a hrilh a.

Chu thu Jeremy nu Mrs Forester-i’n a hriat chuan a mittui a tla zawih zawih a, “Miss Milner, kan fapa dinhmun hi chu kan hria a, kan chhehvel bul hnaite teah pawh chutiang special school chu a awm tih kan hria a ni. Mahse, Jeremy hian he school-a kal hi nuam a ti a, he school hi chhuahsanin, special school-ah kaltir ni ta ila chuan, a nunkhua hi a chau vek dawn si! Chuvang chuan khawngaihtaka min hriatthiam angai a ni,” tiin Miss Milner i khawngaihna chu a dil a.

Chutianga Jeremy nu leh paten Jeremy-a school kal zawm theih nan an dil avang chuan Jeremy pawh chu a thiante zirlai 18 zingah chuan lehkha zir  chhunzawm ve leh thei ta a ni.

Nikhat chu Miss Milner-in class a lak laiin Jeremy chuan tum dang bawkin dawhkan chu a tlawh ri lehpek a. Chutih rual chuan, “Miss Milner, ka hmangaih che” tiin a la tawngchhuak zui! Miss Milner-i chuan Jeremy dinhmun chu a hriathiam sak avangin a lung a chhe hle a, mittui tla pur chung chuan, “Ka hria a lawm Jeremy, ka lawm lutuk’ tiin a chhang a. Chutiang chuan harsatna tam tak Jeremy chuan siam fo thin mahse, a thiante zingah chuan nitin thuin class chu a kal ve zel a.

Isua Krista thawhlehna ni champha Easter Sunday chu a thleng tep tawh a, chumi pual chuan Miss Milner-i chuan zirlai naupang 19 te hnenah chuan Plastic hmanga siam Artui ruak pakhat theuh chu pein, “Isua Krista thawhlehna pual hian  he artui chhungah hian thawhlehna chungchang entirna tur thil in duhzawng a piang thunin naktuk hian school-ah in lo keng leh vek dawn nia, in hre thiam em?” tiin artui ruak chu a pe theuh a. Zirlai naupang 18 te chuan, “Aw, kan hrethiam e” tiin an chhang rual dual a, mah se Jeremy-a erawh chu a ngawih reng avangin Miss Milner-i chuan a hriatthiam loh taka “nakinah a nu leh pate chu a awmzia ka la hrilh mai ang” tih rilru pu chuan a ngaihtuahna a siam a.

Tlai a lo ni a, a choka-a tuikhawihna chu engemaw thilin a dan avangin tui luangchhuak thei lovin a awm a, chumi buaipui chuan hun hmangin telephone hmanga Jeremy-a nu leh pate biak a tum pawh chu a lo theihnghilh hmin der mai!

A tuk a lo inherchhuak a, Pawl 2 zirlai naupang 19 te chu School-ah an lo kal kim thap a, hlim tak maia ti ti hova, infiamin an nui bawk bawk hlawm a. School tan hun a ni a, Miss Milner-i’n class a rawn lak chuan, a hma nia a lo hawn tir tawh Plastic Artui chu Basket chhungah an dah hlawm a. Class pangngai an lak zawh hnuin, artui-te chu a mal te te chuan Miss Milner-i chuan phawrhin artui hmasa ber chu a han hawng a, a chhungah pangpar mawi tak lo awmin, Miss Milner-i chuan, “Aw, pangpar mawi tak a ni, hei hian nun thar a entir a ni” tiin a dah hnu chuan a dang chu hawng lehin chu artui chhungah chuan Plastic hmanga siam Phengphehlep lem lo awmin, “Aw, hei pawh nun thar entirna a ni” tia Miss Milner-i’n a han sawi chuan hmeichhe naupangte chuan “ka artui a nih kha” tiin a hlim hle a.

Chutiang chuan Miss Milner-i chuan artuite chu hawngin a chhunga thil awm chu amah leh artui kengtu naupangte chuan an sawifiah zel a, artui pali-na chu a han la a, a han hawn leh chuan a chhungah engmah a awm ta hauh lo mai!

He artui hi chu Jeremy-a ken ngei a ni maw tiin Miss Milner-i chuan a ngaihtuah a. A hma ni tlai lama a buai em avanga Jeremy-a nu leh pa engmah a lo hrilh hman ta lo kha pawi a tiin, Jeremy-a artui ruak a hmuh chuan a lung a chhe hle a. Sawi tur reng a hre ta lo!

Chutih lai chuan Jeremy-a chuan, “Miss, kha kha ka artui a nia i va sawi ve lo ve” tiin a la rawn zawt zui! Chumai chu ni lovin Jeremy-a chuan Miss Milner-i thusawi hun ngaichangin an Miss mitah tak chuan a en reng a. Miss Milner-i chuan inthiam lo tak chungin, “Jeremy, artui hi a ruak tlat a ni, enga ti nge a ruah chhan hi sawi tur i nei em?” tiin a zawt let a.

Jeremy-a chuan phur tak maiin, “Aw nei e Miss, Isua pawh kha a thi a, mah se a Pa-in a kaitho leh a, a thlan kha a ruak ta a ni” tiin a chhang a, chumi hnu chuan chawlhlawk dar a lo ri a. Zirlai naupangte chu infiama intihlim turin an chhuak ta hlawm a. Miss Milner-i chuan Jeremy-a thusawi chu ngaihtuah letin, lungchhe tak chuan a tap zawih zawih a.

Chumi ni atanga thla 3 hnuah chuan Pawl 2 zirlai naupang Jeremy-a chuan a class-mate, a thian zirlai 18 te zinga awm ve tawh lo turin thihna chuan a chungah ro a rel ta!

Jeremy-a thih ni chuan, a kuang chungah Artui 19 a awm a, chung artuite chu ruak vekin, a chhungah engmah a awm lo!

Isua Krista pawh kha a thi a, mah se thihna hnehin a tho leh a, a thlan kha a ruak vek a ni. Jeremy-a pawh nung turin a thi a, nakinah chuan thihna hnehin a tho leh dawn a ni.

“Isua thihna hnehin a tho leh ta”

- Happy Easter

(He thawnthu tawite hi, ”The Empty Egg: Easter Day” tih thupui hmanga ziak a ni a, hre tawh leh chhiar tawh pawh in awm mai thei, Vawiin Easter Sunday puala tihchhuah atan ka duh em avangin thiam lo chung leh kimchang lo angreng takin, kan Kohhran Chanchinbu "Zion" a tih chhuah atan Mizotawngin ka han dah ve a, kimchang lo teh mah se ka han tarlang ve hrim hrim a ni - V. Rokhawlkima