‘Kohhranin Missionary tirhchhuah duhna thinlung kan neihna tluk zet hi kan ram hi kan vei a hun tawh’ - Dr. Thangtea

Lunglei 12th, March :   Circuit House Conf. Hall nimin khan Mizoram Youth Club Lunglei hawnna hun hman a ni a, he hun hi, C. Lalrimawia President MYC Lunglei chuan a kaihruai a, Dr. R. Lalthangliana MLA, Senior Adviser MYC, chuan he hun hi a hmanpuiin a hawng.

MYC Lunglei hawngtu Dr. R. Lalthangliana chuan kan ram thalaite hian kawng engemaw takah chuan Quality kan nei a, kan la pho chhuak thei rih lo mai mai a ni a ti. Hetianga MYC Lunglei din a ni ta chu lawmawm a tih thu sawiin, thalaite hmasawnna tur kawng hrang hrang ngaihtuah leh tih tak takna thinlung pu a, he pawl hi a kal zel a duhthu a sawi. Hei bakah hian Kan ram siamthatna kawngah thalaiten mawhphurhna an nei lian hle a, hetih laiin, MSACS chhinchhiah danin HIV/AIDS vei tam ber chu thalaite an ni a, kum 25 - 34 inkarah vei an tam ber bawk. Hetiang a nih avang hian Kohhrante pawh hian thalaite nun kawng dik an zawh theihna tur hian veina thinlung tak tak kan neih a, Kohhranin Missionary tirhchhuah duhna thinlung kan neihna tluk zet hi kan ram pawh hi kan vei a hun tawh a ni a ti. Kan ram siamthatna tur hian tih tak takna thinlung kan neih a tul a, chumi atan chuan MYC Lunglei pawh hian awmze nei taka hma a lak zel a duhthu a sawi a, muthlu hman leh chawl hman kan ni lova a taka hma la zel turin MYC Lunglei hi a hawng a ni.

MJA President Pu K. Lalrinpuia pawhin, thalaite khawvelah kan chuangkai tawh a, Kohhran te, khawtlang ti nuama ti hlim tute chu thalaite an nih thu sawiin, kan ram hruaituah ngei pawh thalaite kan nei chho zel a, thalaite hian nasa takin hma kan sawn chho zel a ni a ti. 

Khamliana President MYC, Hqrs. Aizawl (National Awardee In Social Network) pawhin thu sawiin, India khua leh tui kan nihna kan pawm angin, Sorkar do zawngin he pawl hi a kal a thiang lova, kan theih chin chinah chuan inngaihtlawmna nena ke kan pen zel hi a pawimawh a ni a ti. Hruaitu hlawhtling ni tur chuan mite hmusit nih ngam a ngai fo thin a, inngaihtlawmna nen chhiahhlawh dinhmuna din pawh hreh loh a tul thu a sawi.

Lalrithanga Secreatry chuan report pein, MYC Lunglei Branch chu 22.2.2011khan din tan a nih thu a sawi a ni.