Lunglei Tualchhung News Lawrkhawm

Gauhati High Court Chief Justice Lungleiah lo kal:

Gauhati High Court Chief Justice, Justice Madan B. Lokur chuan vawiin zing dar 9: 30 hian District Court Lunglei a tlawh dawn a, hemi hnu hian Serchhip pan leh nghalin tlai dar 3:00-ah Serchhip Court a tlawh leh ang a, tlai dar 4:00-ah Serchhip hi chhuahsan lehin Aizawl lamah a kir leh nghal ang. Gauhati High Court Chief Justice, Justice Madan B. Lokur hi  R. Thanga Registrar, M. Lalrinsangi Asst. Registrar leh Lalngaihzuala Jr. AA. Gauhati High Court, Aizawl Bench leh a thawhpuite’n an rawn tawiawm dawn a ni.

Pu S. Dinga P/S lo kal dawn:

Karleh thawhtanni khian Pu S. Laldingliana Parliamentary Secretary chu Saiha leh a chhehvel khua tlawh turin a kal dawn a, ni 16.3.2011 ah Saiha Group YMA Conference Lungpuk ah neih turah khuallian  a ni ang a, ni 17.3.2011 ah Tawipui Group YMA Sport Meet ah Khuallian a ni leh ang. Ni 18.3.2011 ah Theiriat Playground a tlawh bawk ang a. Ni 19.3.2011 ah Aizawl-ah a let leh ang.

Dr. Thangtea’n thu a sawi dawn:

Dt.14.3.2011 (Mon) Dar 11:00 a.m hian Mizo Hnam Run (MNF Office) Chanmari-ah Dr.R. Lalthangliana, MLA in thu a sawi dawn a. MNF Party mi leh sa, a tam thei ang ber lo tel turin an sawm.

Power lakna line chhiat vangin:

Niminpiah Ningani tlai khan Lunglei leh chhim lam pang zawngin Power kan lakna Haulawng bul Tuipui tlangah Thing lianpui in Electric hrui a vaw chhia a, hei vang hian Power hmuh theih a ni lova, tualchhung chanchinbu pawh a chhuak thei lo. Deptt lam chuan Power a tha lo tih an hriat veleh siamthat hna hi an thawk nghal a, tun dinhmunah chuan harsatna danga  awm anih loh chuan Power kan hmuh that tawh a beiseiawm niin Deptt hotu ten an sawi. Hemi zan hian Hnahthial atangin VIP pek tur 1.5 MW an pawtthla nghe nghe a ni.

BSNL in Cable siamtha mek:

BCM Chanmari Biakin bulah BSNL Lunglei chuan  an Cable thlun that hna nimin atang khan an thawk tan a, hei vang hian helai chhehvel bawrah hun engemawti chhung Telephone a chiangkuang dawn lova, Subscriber te hrethiam turin BSNL staff te chuan an ngen a ni.