Bru Refugee laklet chungchangah YMA Sub Hqrs. in ngenna lehkha an siam

    YMA Sub Hqrs. Lunglei chuan Bru Refugee chungchang Executive Committee, Meeting-a an lo ngaihtuah tawh angin ngenna   Deputy Commissioner, Lunglei hnenah hetiang hian an thehlut.
        “Lunglei District atanga lakkir turte hi Chhungkua 268 (Puitling 1221 leh Naupang 235) niin kan lo hria a, Refugee dik tak, dan anga lo kir turte chu thlamuang takin lo kir se kan duhpui a ni.
        Hetih lai hian refugee te endikna chu Kum 1995 Electoral Roll Based nise. Tin, Refugee lakkir turte pawh an mahni khua (an chhuahsan) ah ngei dahkir leh nise tih chu Central YMA thuchhuak leh YMA te kan dinna a la ni reng bawk a ni.

        Tunah hian Lunglei District a lakkir turte hi Thorang Assembly Constituency huamchhung Putlungasih-ah dahkhawm vek turin sorkar in hma a la mek niin kan hria a. Sorkar hmalakna hi zahawm kan ti hle chungin Constituency pakhat chhung leh hmunkhat a Bru refugee te dahkhawm hi a him lo kan ti a. Kan hmathlirte min hriatthiam-pui a khawngaihtaka sorkar rua-hmannate min enawn sak tur leh hma min laksak turin YMA Sub Headquarters, Lunglei  te’n kan rawn ngen che a ni.
        Kan ngennate min ngaihpawimawh sak a min tih hlawhtlinsak theih chuan kan lawm hle ang, tiin an ngenna lehkhaah hian an ziak a. P. Lalhmangaihzuala President leh K. Lalfakzuala Secretary YMA Sub Hqrs. Lunglei te chuan an hming an ziak a ni.