Lunglei Tualchhung News lawrkhawm

HPC Cup Inter Village atan inbuatsaih mek:

    HPC Cup Inter Village Football Tournament April ni 5 atanga Thuamluaia Muala neih turah inpuahchahna ngawrh taka kalchhoh-pui mek zel niin, Pu Joseph Lalhimpuia Vice Chairman HPC Lunglei chuan, HPC Cup bik atan liau liau hian Ball pawh a hran paa siam a nih tur thu kan palai a hrilh. Hei bakah hian HPC Cup hi ropui tak hawn tum a ni a, a hawng tur hian Pu Zodintluanga Sports Minister beisei a ni a, a kharna hunah HPC Lunglei Chairman leh Chief Minister ni bawk Pu Lal Thanhawla beisei a ni bawk.

Headmaster leh Zirtirtute pualin CCE training nei chho mek:

    Dist. Project Co-ordinator, SSA Mission Lunglei Dist. buatsaihin  Lunglei Dist huamchhunga School zawng zawng Headmaster leh Zirtirtute pakhat theuh pualin Continuous and Comprehensive Evaluation (CCE) chungchang training tunlai hian a buatsaih chho mek a.  CCE hi India rama zirna kalphung thar a nih avangin a pawimawh em em a, hei vang hian Zirtirtu leh Headmaster-te training ngai pawimawh vek turin an beisei a ni.
    Training thawhkhatna Dt. 8th - 10th March chhung khan Tlabung leh a chhehvel khua Headmster leh Zirtirtute pualin Tlabung Hall-ah training hi neih a ni tawh a, Bunghmun Block te tan DIET Hall Lungleiah  neih a ni tawh bawk.
    Dt.15 - 17th March vawiin atang hian Station Block te tan Haulawng CRC-ah training neih a ni ang a, Tlabung Block te tan DIET Hall-ah neih bawk tur a ni ang. Training hi karleh lamah pawh la neih chhoh zel tur a ni dawn a, Dt. 32st March thleng neih tur a ni dawn a ni.

Sericulture Dept. bultum tour nei:

    Sericulture Deptt. hnuaiah Private Farmer Lunglei a chhehvela mite 15 chu March ni 12 - 17 chhung hian Guwahati leh a chhehvel fangin an zin mek a, pangang vulhdan chungchang leh Cocoon sawngbawl dan chungchang te zirin an enkual a ni. Sericulture Deptt. Lunglei bultum hian January thla pawh khan member 6 te chu ni 10 chhung Cocoon processing chungchang zirin an lo zu kal tawh a ni. Sericulture Deptt. hian March thla tawp hian Farmer Training turin mi engemawzat tirh leh a tum bawk.

Catch Them Young Prog. nei dawn:

    J. Vansangzuala DS&YO Lunglei Dist. hnen atanga kan thudawn angin, “Sawrkar Sports Programme “Catch Them Young” chhunzawm nan Sports Deptt. leh Dist. Boxing Assn. ten Dt.17.3.2011 Ningani zing dar 7: 00 hian Govt. High School kawt zawlah naupang Boxing zirna hun a hawng dawn a, naupang Boxing-a tui mite tan tel theih a ni dawn a ni”

Civil Hospital Lungleia Cabin leh Haemodialysis hawng dawn:

    Civil Hospital Lunglei Haemodialysis leh Cabin chu Zirtawpni March ni 18 hian Pu S. Laldingliana Parliamentary Secretary chuan a hawng dawn a, khual zahawmah Pi M. Zohmingthangi IAS, DC Lunglei a ni ang. He hun hi Dr. Lalsanga Medical Superintendent chuan kaihruaiin, Khuallian Pu Dinga leh Khual zahawm DC ten thusawina hun an hman bakah, Technical Report Dr. Lalhmachhuana’n a pe ang a, lawmthu sawina hun Dr. SR. Ngurchamliana’n a hmang ang.

Air Force lak runpui nei dawn:

    D.C Lunglei hnen a tanga thu kan dawn danin, ni 7th.April.2011 atanga ni 11th.April.2011 thleng hian Indian Air Force tur lak runpui Aizawl ah neih a ni dawn a, Mizo tlangval nupui nei lo, 1st.Jan.1990 to 30th.Sept.1994 inkar a piang, +2 passed chin tan written test Physical test leh medical test te neih tur ani. Hre chiang duh tan Dy.Director, Zilla Sainik & Walfare Resattlement, Lunglei hnen ah zawh fiah theih a ni.