MJA Lunglei General Meeting neih a ni. BSNL Broadband Internet leh Power line chhe zing lutuk chungchangah ngaihtuah

Lunglei 21st, March : Inrinni tlai khan MJA Lunglei chuan Lunglei Press Club-ah General Meeting neiin, he hun hi Pu K. Lalrinpuia President MJA Lunglei chuan a kaihruai a. Gen. Meeting an neih zawh hnuah, High School Headmaster-te nen an inkhelh tuma hnehna an chan lawmpuina atan DFO Pu Kawlhnuna’n chaweikhawmna tur Rs 3000/- a pek leh Pu PC. Lalthanliana, LAD Minister-in Rs 1000/- a pek hmangin ruai an theh nghal a ni.
    He hunah hian, 'MJA firm hrang hrang hnathawktu inhawh chungchang' tih thupui hmangin Pu Lalrintluanga Khiangte Vice President chuan thusawina hun a hmang a, Pu H. Lalthansanga Ex- President MJA Lunglei 'MJA thawhhona leh inpumkhatna' tih thupui hmangin thu a sawi bawk.

    Pu Sangtea hian MJA te chu eizawnna thuhmun nei, intelkhawm kan ni a, mahni mimalin tumah ropui tak leh langsar tak pawh kan awm lo, amaherawhchu, pawl anga kan in hlawmkhawm a, lungrual taka kan thawhho hian keimahni leh kan pawl hi min ti zahawm a, mite mithmuhah min ti mawi ve thin a ni. Chuvang chuan chawbel khat zen theuh theuh, chhungkuaah innghirnghona leh lungrual lohna a awm chuan pawl a chak lovin min ti thuanawp thin a, chuvang chuan MJA Lunglei te chu thawhhona tha leh inlungrual taka kan awm zel hi a pawimawhin  a tul takzet a ni, a ti.
    Dr. Andrew H. Vanlaldika Adviser pawhin thu sawiin, Chanchinbu enkawl chungchangah fimkhur a tul thu, a head leh a thu inmil lo a awm leh zeuh thinte, uluk zawka edit a tul thu a sawi bakah, chanchinbu fiah tha leh layout nalh a pawimawh thu leh thil hrang hrang a sawi.
    Pu P. Lalhmangaihzuala Adsiver pawhin, Chanchinbumite chu khawi hmunah pawh mi langsar an nih thin avangin, incheina chungchangah an fimkhur a tul a, thawmhnawm man to kher inbel tur tihna lam ni lovin, mite mithmuh leh min lo thlir danah pawh mawi thei tura incheina kan uluk a tul thu a sawi.
    Anni ho bakah hian MJA member hrang hrangten an ngaihmawh zawng leh thil pawimawh hrang hrang MJA huangchhung thil bik sawina leh zawhna leh chhanna hun an hmang bawk.
     MJA Gen. Meeting-ah hian member kan kal tha hle a. MJA Dist. Hqrs, Lungleiah hian tunah hian member 34 awmin, heng zinga mi 28 te hi Lunglei khawpui chhunga awm an ni a. A bak mi 6 te chu Hnahthial Sub. Division-a awm te an ni a. Hnahthial Sub. Division hi Dist. Hqrs, Lunglei enkawlna hnuaia awm niin, Mizorama MJA-in Sub. Division a neih chhun a ni a. MJA danin min phalsak angin, MJA Dist. Hqrs, Lunglei Executive meeting chuan an hruaitu tur pawh ruatsak thinin, tuna Chairman nilai chu Pu C. Lalbuatsaiha Editor, Hnahthial Today a ni a. Secy chu Pu VL. Liansanga Jt. Editor, Calathea a ni.
    Lunglei Press Club-a MJA Lunglei Gen. Meeting-ah hian Gen. Secy K. Lalrochana chuan Resolution pahnih a pharh a. Resolution pharh te hi siamthat ngai lai nia hriatte siam that a nih hnuah lungrual taka pawm a ni.
    RESOLUTION
    1. Mizoram, a bik takin chhimlamin power kan hmuhna kawngah line tichhe zawnga thil tih leh thingkih a awm thin mipuiin kan tuar phah zing hle a. Hetiang hi tun hnuah a thlen tawh lohna turin line tichhe zawnga thil tih awm reng reng chu sorkarin a mawhphurtu zawng chhuakin, hrem ngei se kan duh a. Hetihrual hian misualte avanga mipuiin harsatna kan tawh leh tawh lohna turin khaw tin VC leh YMA te chu an area theuhah electric hrui kalte venghim turin kan ngen a. Power & Electricity Department pawhin tun aia tha zawka mipuite hnena eng pe thei turin theihtawp chhuah leh se kan duh a ni.
    2. BSNL-in Broadband Internet a pek chhuahna cable chu hmun hrang hrangah tihchhiat leh rukbo a awm thin avangin line a chhe zing hle a. Hei hian mi tam tak eizawnna a tihchhiat avangin sorkarin cable tichhia leh ru thin te chungah hian action la ngei se kan duh a ni.
    Tun hnuah misual thenkhatte avanga mipuiin harsatna kan tawh tawh loh nan khawtin VC leh YMA te chu an area theuha cable kalte venghim tura hmala theuh turin kan ngen a. Hetihrual hian BSNL pawhin tun aia tha zawka mipuite hnena service pe thei turin tan la ngei se kan duh a ni.
    tiin Resolution hi an pass a ni.