Thanzamasora khuaa thihna thleng chungchangah Dawi thil nia ngaiin Bawlpu an ngaichang mek

    Thanzamasora khuaa March thla tir lama mi panga (5) lai thih chungchanga thuthang lengvel hrang hrang awm mekah nilaini khan C. Lalzuiliana Sub-Deputy Commissioner, Tlabung hovin, Pu Lawmte-a (DDK), Pu Thanbanglova, VCP Lungrang ‘S’ te leh Lunglei atangin police 5 (S.I) hovin Thanzamasora khuaah hian an zuk kal a, he khuaa thil thlendan chungchang hetiang hian DC Lunglei hnenah nimin khan C. Lalzuiliana Sub-Deputy Commissioner, Tlabung hian report a thehlut.
    Thanzamasora-ah hian March ni 20 hmalam khan mipanga thihdan inang tak takin an thi a, chungte chu , Malisho (20) March ni 4-ah, Boro (25) March ni 8-ah, Phurinia Loda (35) March ni 13-ah, Suniron (30) March ni 20-ah, Shitiso (25) March ni 20-ah heng mite hi an thi a. Heng mite hi an khua a sik a, thenkhat chu an lu a na bawk a, thiin an luak deuh vek a ni. An thih hian an taksaah dum thluah thluah awm vek niin an sawi.

    Chawngte atangin Dt. 13/3/11 khan Doctor in a tlawh a. Health Worker-in tum 2 a tlawh tawh bawk. An kal laiin damlo an awm lova mitthi awm loh lai a nih bawk avangin ngaihdan mumal tak neih harsa an ti niin an sawi a. Dt. 8/3/11 khan an natna ang taka na,  Zoliana (35) Neapli, Lalnutui khua a thi tih report dawn a ni bawk. Tunah hian an natna anga na mek hi mi 3 an awm a, Thanzamasora-ah hian 1 a awm a, Chawngte ‘C’-ah 2 damdawiina awm leh Bawlpuin a enkawl mek Thanzamasora khua ve ve an awm mek bawk.
    A nghawngte:
1. Heng natna/thihna hi Dawi hnathawhah an ngai nghet hmiah.
2. An hlauh avangin chhungkaw 13, Chawngte ‘C’, Borapansury, Ngharum-ah te an insawn.
3. An Bawlpu rawih Chawngte ‘C’ a mi Dt. 29.3.2011-ah lo kalin zanah thu a puang ang a, a dawi in a hneh chuan an thi tawh lovang a, an khuaah an awm leh ngam ang, A hneh loh erawh chuan a remchanna hmun hmunah insawndarh an tum. Mahse, insawn ka tum lo ti mi 7 an awm.
4. Tumahin hna an thawk ngam lova, zanah pawh In 4-ah an riak khawm thin. Bawlpu an rawihin, Dt. 29.3.2011-a a thupuan tur an ngaichang a, chu chu an lo nghak tawp mai a ni.
5. Ei leh bar lamah tunah chuan hei hian harsatna em em a la thlen rih lo.
    Hetiang hi thil awmdan a nih avangin tuna damlo mekte Chawngte ‘C’ a mi emaw, Thanzamasora emaw atang hian Medical Expert ten engnge a nih hriat tumin a rang lamin hma lak nise a tha hle ang. Bawlpu lo kal hun tur an tih kha Dt. 29.3.2011 hi an nghah avangin an mahni lam hi engmah sawipui theih an ni rih lo niin, C. Lalzuiliana Sub-Deputy Commissioner, Tlabung chuan DC hnena a report-ah hian a tarlang a ni.