Lunglei Tualchhung News lawrkhawm

Kawngpui siamthat hna thawk

    Er. C. Liantluanga EE PWD(Rd) Div. Lunglei chuan tunlai hian Lunglei khawchhung hmun hrang hrangah kawng repair, Black Topping hna thawh mek a ni tih sawiin Luangmual Kudam panna kanwg pawh nimin atang khan thawh tan a ni a, hemi hi zawhfel anih hunah Dist. Road lam kan bei ve leh nghal ang a ti. Dist. Road hi karleh lam chuan Black Topping tih hman an in beisei thu sawiin, sum erawh duhthalin hman tur a awm lo a ti.  Lunglei By Pass Road pawh HPC Vice chairman hmalak na angin Ni 10.3.11 khan Delhi-ah DPR thawn thlak leh a ni a, Vbc 23.65 vel a ni a, thil harsa vak tur a awm tawh loh avangin hmalak a nghahhlelh awm tawh hle tih a sawi bawk. Aizawl to Lunglei World Bank kawngpui chu PWD ten 102 Km-209 Km Sethlun to Kanghmun inkar repair hna an bei mek tih a sawi bawk.

Rhino Adventure Club fehchhuak

    Nimin khan Rhino Youth Adventure Club Electric veng-te member 10 te chuan Rihdil leh Buannel tlawh turin Lunglei an chhuahsan a, karleh lamah an lo hawng leh ang.

BSNL Internet Broadband siam

    Lunglei BSNL Broadband chu BSNL lamah an khawl Card pahnih a kan chhiat avangin nihnih chhung a khaihlak a, nimin tlai dar 3:00 khan Broadband Subcriber Assn. Lunglei hruaitute chu a hmunah kalin,khawlchhiat dan te  BSNL hotute en hovin nimin tlai dar 4:30 vel khan Broadband Service hi siamthat a ni. Lunglei Broadband in hma a sawn theih nan Broadband Subscriber Association leh MJA te chuan Joint Meeting neih thuai an tum a ni.

Mizoram Pachak-ah Chama

    Mizoram Powerlifting Assn. leh ZONET tang dun buatsaih, Mizorama pa chak ber zawnna chu nizan hmasa khan round hmasa zawh fel a ni ta. He intihsiakna first round-ah hian P. Lalchamliana, MRP Lunglei  chu pakhatna niin, first round-ah hian mi 6 an tla tawh a, final round-ah mi 8 in intihsiakna hrang hrang chi 9 hmangin an inel leh dawn a, first round-a an point hmuh tawh sa chhawm lovin a bul atangin an intihsiak leh dawn a ni. Final round hi April ni 4 atangin neih chhunzawm leh a ni ang.

Mizoram aiawh turin Isak-a

    Isak Lalsawmliana Zotlang chu  Table Tennis North East Games-a Mizoram aiawh turin thlan a ni a, nimin khan Aizawl panin a phei a ni. Aizawl-ah hian thlakhat chhung Coaching Camp a nei leh phawt dawn a ni.

Vawiinah inthlang dawn

    Vawiin chawhnu dar 1:00 pm hian Lunglei Dist. Badminton Association chuan kum 2011 - 2013 chhung atana an hruaitu tur Bazar veng YMA Recreation Hall-ah an thlang dawn a, O.B mi 9 thlan chhuah turah nomination mi 20 awm tawhin floor atangin mi 3 nominate theih a la ni dawn a ni. Inthlanpui tur hian Lalmuanzuala Editor the Lunglei Tribune leh T. Sainghinglova AIR te ruat an ni. Assn. member-te chu inthlannaah hian kal theuh turin an inhriattir nghal a ni.

CT. Lalrinawma Lungleiah

    CT Lalrinawma Cambadia rama Missionary chu tunlai hian Lungleiah la awm mekin, April 2(Sat) ah South East Asia Missiona Soceity (SEAMS) 2nd Annual Prayer Meet, Aizawla neih tura tel turin a kal ang a, April ni 8 hian Mizoram a chhuahsan tawh ang.  A rual hian mi 4 in Cambodia leh Vietnam-a mission short-term hmang turin an zui dawn a; zaithiam Pensy-i pawh a passport a fel hman chuan Cambodia-ah hian a chho ve ang.