Insumdawn tawnna turah hnuhma thar a awm lo Kalpawhna kawng siam hna an thawk mek

Lunglei 9th May  :  Hnahthial MJA member ten India leh Bangladesh insumdawnna hmunpui tur Kawrpuichhuah an tlawh a, hmalakna thar hmuh tur a awm lo. A kalpawhna kawng siam hna an thawk mek.
    Hnahthial MJA Sub. Division member te tan an bialtu MLA Pu John Siamkunga’n tour an neihna tur sum a pek hmangin Chanchinbu mite hian Saiha, Lawngtlai, Lunglei, Tlabung leh Kawrpuichhuah an tlawh a, member kalte hi Pu Lalbuatsaiha Convener (Hnahthial Today), Pu VL. Liansanga Secretary (Calathea), Pu C. Lalzarzova (Dasac Cable), Pu C. Lalnghakliana (Hnahthial Times) te an ni.

    May 4 khan Hnahthial atangin Saiha an lut a, a tukah Lawngtlai tlawhin an riak a, May 6-ah Lunglei lutin Tlabung an pan a, Lunglei atangin Lunglei Times Editor in a tawiawm a, May 7 zingah Insumdawn tawnna tur Kawrpuichhuah an tlawhin India leh Bangladesh inrina Bangladesh ram Theka bul thlengin Speedboat in an kal. Kawrpuichhuah-ah hian sorkar hnuhma thar hmuh tur a awm lo. Kawrpuichhuah panna kawng Tlabung atanga PWD in laih erawh hna chak taka kal pui mek a ni a, SatGuru company Guwahati-in hnathawkin km.15 a thui hnathawk tur hian cheng nuai 521.18 in agreement an ziak tih Er. C. Laldintluanga SDO, PWD in Lunglei Times a hrilh. Nakumah black topping nen vek he kawng hi peih fel vek hman tura a ni.
    Chanchinbu mite hian Border fencing an en nghal bawk a, Tlabung a Phar damdawi In tlawhin heta enkawl lai mi 5 te tan tanpuina pawisa an hlan bawk a ni.
    Hnahthial MJA Press Tour hi Tlabungah Er. C. Laldintluanga SDP, PWD in lo mikhualin kum 100 chuang kalta a Sap hovin IB an sak tawh PWD in uluk taka an enkawl zuiah chanchinbu mite hi a thlen tir a, an ei leh in turte a lo ngaihtuah sak vek bawk a, Kawrpuichhuah an tlawhnaah hian Er. J. Lallianzuala JE, PWD in a hruai a, Tlabung atanga chanchinbu chhuak Pahehli Editor B. Lalthianglhlima’n a tawiawm bawk.
    Hnahthial chanchinbu mite hian inrinni kalta zan dar 7 khan Lunglei an lo lut a, Hotel Grand-ah MJA Lunglei aiawhin Pu Lalrintluanga Khiangte Vice President MJA Lunglei leh Pu TC. Lalnghakliana DIO, Sr. Adviser ten Hotel Grand-ah an lo dawng sawng a; zanriah an kil ho.
    Hnahthial MJA te hian anmahni lo dawngsawngtu MJA Lunglei hruaitute hnenah hian an mamawh leh hmalakpui an ngaihna kawng hrang hrangte an thlen a, Pu Rintluanga Vice President chuan MJA Lungleiah thlena a theih ang anga hmalak pui an nih tur thu a hrilh. Hnahthial MJA te hian zanriah an kil hnuah Hnahthial panin an chhuahsan leh nghal a ni.