Champions League Final-ah Barcelona vs Man Utd/Schalke

    Champions League Final May ni 28 a khelh turah Barcelona chuan an Spanish Club pui Real Madrid lakah goal aggregate 3 - 1 a hnehna changin Final an inhlangkai ta.
    Kan hriat tawh angin Semi Final 1st leg an khelah Barcelona hian Real Madrid hi 2 - 0 in an va hneh tawh a, Thawhlehni zan hian Barcelona hian Real Madrid hi lo mikhual ve leh thungin goal 1 ve ve thunin an lo draw pui a. Amaherawhchu, 1st leg khelah Barca hian 2 - 0 laia hnehna an lo chan tawh avangin goal aggregate 3 - 1 in hnehna an chang ta a ni.

    Thawhlehni zan inkhelah pawh hian 1st leg ang thovin Barca lam hian ball an chang tamin Real Madrid lam an bet leh hle a. Mahse, Barca lam hian Away goal 2 neisaa khel an nih vang nge goal an thun thei lawk bik lova, hun chanve chhung hian a tu ve ve lam mah hian goal an thun thei lo ve ve a ni.
    Hun chanve hnulamah Real Madrid hian Barcelona hi 2 - 0 tala an hneh let ve chuan Final lut turin chance an nei ve leh thei dawn tih hrereng chungin tan an rawn khawh viau dawn a, mah se Barca laka thil ropui an thlen tir thei chuang lo.
    Second half an khelh tan atanga minute 9 chiah a liam hman tihin mual neitu Barca lam tan hian Pedrito chuan goal rawn thunin, Real Madrid tan Final lut turin Barcelona leh thal tur chuan beisei a bo sawt hle a. Mahse, he an si phurh hi Marcelo chuan Real Madrid tan minute 64 naah a rawn sut ve leh a, mah se, hei bak hi he inkhelah goal dang a luh belh theih tak loh avangin 1 - 1 in  inhnehtawk mah se, goal aggregate 3 - 1 in Barcelona hian hnehna changin Champions League Final an inhlangkai ta a ni.
    Nizan khan Manchester United chuan Schalke chu Semi Final 2nd leg an khelhpui bawk a. 1st leg an lo khelh tawhah Manchester United hian 2 - 0 vekin hnehna an lo chang tawh a, nizan inkhel result kan hre hman lo nain nizan inkhelah thil mak a thlengte a nih ngawt loh chuan May ni 28 hian Barcelona leh Manchester United ten Champions League Final hi an khelh ngei a beisei awm hle.